26-tamyz kýni Jambyl oblysynyng Bayzaq audanyndaghy әskery qoymalar jarylyp, 16 adam qaza tapty. Búl tәuelsiz Qazaqstan tarihyndaghy alghashqy jarylys emes edi. Aza tútu kýnin jariyalaugha sebepker bolghan qayghyly oqighadan keyin múnday oqigha qaytalanbaydy dep sengen edik. Alayda aragha eki ay salmay jatyp, Taraz halqy taghy da jarylystyng tars etken dauysyn estidi. 10-qazan kýni taghy da jarylys boldy. Abyroy bolghanda zardap shekkender joq. 

Jarylys jayly elimizding qorghanys ministri resmy týrde bylay dep mәlimdeme taratty: "2021 jyldyng 10 qazanynda saghat 7.20 shamasynda Jambyl oblysynyng Sarykemer auylyndaghy injenerlik oq-dәriler qoymasynyng aumaghynda búryn zaqymdanghan jarylghysh zattar órtendi.

Jarylys saldarynan oq-dәrilerding qaldyqtary men bólshekteri jan-jaqqa úshpaghan. Búl júmystan tys uaqytta oryn aldy. Jaqyn jerde adamdar bolmaghan. Ghimarattar men qúrylystar zaqymdalmaghan. Audandaghy ahual túraqty.

Aldaghy uaqytta da búnday jaghdaylar oryn alu mýmkin. Odan bólek, qoyma aumaghynda qauipti oq-dәrilerding baqylanatyn jarylystary jýrgiziletin bolady. Qazirgi uaqytta a.j. 26 tamyzynda órtengen qoymanyng tehnikalyq aumaghyn jarylghysh zattardan tazartu júmystary jalghasuda" dedi. Ministrlikting jauabyndaghy "aldaghy uaqytta da búnday jaghdaylar oryn aluy mýmkin" degen mәlimdemesi alandatarlyq.

30 jyldyng ishinde әskery qoymalarda ongha juyq jarylys bolghanyn esepke alsaq, mәlimdemening mәnin týsinuge bolatyn shyghar. Mysaly bizdegi әskery qoymalardyng órtke oranuy men jaryluyn qarap kórelik.

2001 jyl, 8-tamyz. Qaraghandy oblysy, Balqash qalasynan 45 shaqyrym jerde ornalasqan Toqrau auylyndaghy әskery qoyma 1 aptaday órtke oranghan bolatyn. Ol jerde Aughan soghysynan qalghan Kenes әskerining snaryad pen minalary, 1998 jyly Armeniyada bolghan iri jer silkinisi saldarynan mәjbýrli týrde kóshirilgen әskery qúraldar saqtalghan edi. Órtting qatty bolghany sonshalyqty eshqanday órt sóndiru kólikteri jaqynday almaghan. Al sol kezdegi premier-ministr Qasym-Jomart Toqaev Toqrau auylynan 35 shaqyrym qashyqtyqta operativti shtab qúryp, júmys isteydi. Búl oqighagha biyl jiyrma jyl tolghanyn eskersek, eki ondyqtan keyin de qoymalarda qaru saqtau mәselesi týbegeyli sheshilmegenin týsinuge bolady.

2009 jyl, 20 nauryz. Arys qalasynan 7 shaqyrym qashyqtyqta ornalasqan “Qazarsenal” JShS qoymasynda әskery snaryadtardy utilizasiyalau barysynda 3 jarylys bolyp, oqigha saldarynan 4 adam kóz júmdy, 16 adam auruhanagha týsti. Búl Arys manyndaghy alghashqy iri jarylys bolatyn. Arys halqy aragha jyldar salyp taghy birneshe jarylys bolatynynan habarsyz edi.

2009 jyl, 8 shilde. Almaty oblysy, Ile audanyna qarasty Qaraoy poselkesinde ÚQQ qarasty shekaralyq qyzmetting әskery qoymasyndaghy jarylystan 20 jastaghy әskery qyzmetshi qaza tapqan. Búl is jayly naqty aqparattar az, ony qoymanyng ÚQK-ge tiyesili boluymen týsindiruge bolatyn shyghar.

2013 jyl, 27 tamyz. Jambyl oblysy Qorday audanynyng "Otar" stansiyasynda ornalasqan "Qazaqjarylysónerkәsibi" AQ aumaghynda oq-dәrilerdi joi júmystaryn jýrgizu barysynda jarylys boldy. 8 adam auyrlyghy әrtýrli termiyalyq kýiik alyp, onyng 4-ui kóz júmdy.

2014 jyl, 26 mausym. Arys qalasyndaghy "Qazaqjarylysónerkәsibi" aksionerlik qoghamy aumaghynda jarylys bolyp, sol mekemedegi 32 jastaghy әiel men 26 jastaghy er adam qaza tapqan. 1 adam jaraqat aldy. Qaza tapqandardyng otbasyna - 1 mln tenge, zardap shekkenge - 200 myng tenge kóleminde aqsha berildi. 2015 jyly qarashada Arys qalasyna qarasty poligon aumaghynda jarylys bolyp, 1 adam mert boldy. 2019 jyly,  24 mausymda Arys qalasynan birneshe metr ghana qashyqtyqta ornalasqan әskery qoymadaghy jarylys kýlli Qazaqstandy kýnirentip ketti. Jarylystan 4 adam qaza tapty. Ekonomikalyq shyghyn ondaghan mlrd tengege deyin jetti. Aragha eki jyl salyp 2021 jyldyn, 26 tamyzynda Jambyl oblysy, Bayzaq audany, Qaynar auylynan 1 shaqyrym qashyqtyqta ornalasqan әskery qoymanyng jarylysynan 16 adam qaza tauyp, 98 adam jaraqat aldy. Búl adam shyghyny boyynsha eng iri jaralys boldy.

Endi mine taghy jarylys. Oqighadan eshkim zardap shekpese de, oqighanyng qaytalanuy biylik organdarynyng jýieli júmysyna degen el senimine selkeu týsiretini anyq. Elimizdegi qoymalardyng sapasy qanday? Álemdik standartqa say ma? Qoymanyng órtke qarsy qúrylghylary qashan janartylghan? Eldi-mekenderden qoymalardy tolyqtay alys qashyqtyqqa ornalastyru qashan iske asady? Jarylys boyynsha shendiler jauapqa tartyldy ma? Mysaly Bayzaqtaghy órtke oranghan qoymagha órt sóndirushilerdi jibergen basshylardyng búiryghy qanshalyqty zangha say? Súraq kóp, jauap az, tipti keybirine mýlde joq.

Mysaly Tarazda joyqyn jarylysqa soqtyrghan әskery bólim men injenerlik oq-dәriler orny 1972 jyldan beri bar. Al, respublika aumaghynda 58 qaru-jaraq saqtaytyn nysan bolsa, sonyng 18-i eldi mekenderge jaqyn ornalasqan. 18 qoyma el túratyn auyl men audangha qabystyra jayghasqan. Yaghny 18 aimaq kýkirtting ýstinde otyrghanday kýy keshude degen sóz. Ministrlik búl mәselelerdi sheshemin degenshe, taghy bir jarylys tars etpese bolghany.

Aytpaqshy Bayzaqtaghy jarylystan keyin qorghanys ministri bolghan Ermekbaev óz erkimen júmystan ketu turaly ótinish jazghan bolatyn. Eki jylda eki birdey jarylys bolghanyn eskersek, ministrding búl sheshimin týsinuge bolady. Al Arys jarylysynda sógis alyp, Bayzaq jarylysynda ministr tizginin ústaghan su jana qorghanys ministri Bektanov Múrat Kәribayúly keshegi jarylys jayly әli ýnsiz.

Abai.kz