Senbi, 19 Qırküyek 2020
COVID-19 QAZAQSTANDA. Jwqtırğandar — 107199. Jazılğandar — 101822. Qaytıs bolğandar — 1671
46 - söz 3404 3 pikir 4 Tamız, 2020 sağat 19:05

Araq pen virustıñ ayırmasın qoydan swrañız

Ötken ğasırdıñ 90-şı jıldarı plastik bötelkege qwyılğan qıtay arağınıñ zamanı tuğan. Sol sasıq araq ayırbas valyutasınıñ rolin atqarıp kete jazdadı. Araqqa susağan köpşilik qolda bardı sol şölmektiñ sanımen ölşedi. Tipti bir qoydı bir şölmek araqqa ayırbastadı-au! Qwnı ketken qayran Şopan ata! Tört tülik piriniñ birinen ayırılıp qaluğa az qaldıq. Birneşe ret süzgiden ötpegen spirttiñ plastikpen reakciyağa tüsip, ulı susınğa aynalatınına da qaramadı ğoy, şirkinder!

Pandemiyağa eş qatısı joq bolsa da qanşa azamat sol plastik şölmektegi u araqtıñ qwrbanı boldı. Ol qwrbandardı sanın da eşkim bilmeydi. Biraq, az emes. Endi, mine, pandemiyamen jarısıp plastik qwtığa, "bakalajkağa" qwyılğan araq tağı payda bolıptı. Anau-sınau emes, 5 litrden. Bwl aldıñğısınan da arzan ba dersiñ?! 3000 men 7000 teñge aralığında satıladı deydi. Esepteyik: qazir auılda bir qoydıñ bağası 40-50 mıñ teñgeniñ mañayında. Ortaşa eseppen bir qoyğa 7 plastik araq aluğa boladı. 5 litrlik 1 plastigiñiz 10 bötelke araq. 7 plastigiñiz 70 şölmek. 70 bötelke! Arzan. Dükendegi 3 bötelkeniñ orına 10 şölmek araq alasız. Mäsele onıñ bağasında da emes, Mäsele: 70 bötelke araq bir auıldağı qanşa adamdı ulaytındığında. 5 litr plastik qwtıdağı arağıñız 5 litr virusqa aynalıp ketui op-oñay närse eken. Söytip, Kovidke kök it qosılıp, pandemiya - tandemiyağa aynalıp ketpese deñiz?!

Olay deuge sebep te joq emes, qazir endi pandemiya qwrbandarınıñ qatarına plastik ıdıstağı araqtan ulanıp ölgenderdiñ sanı qosıldı. Tipti, birden köbeyip baradı. Bwnıñ bärine sebep: araq kovid virusın öltiredi eken degen jalğan aqparat. Onsız da Aziyada araq işuden aldına jan salmay twrğan qazaqqa bwl kädimgidey jaqsı sıltau, jelpildegen jeleu. Onıñ üstine kündiz-tüni qoltığıña qıstırıp jüruge tiis antiseptigiñiz de sol - spirt.

Sondıqtan da qazir qay jaqtan qanşa spirt äkelemin deseñiz jol aşıq tärizdi. Mınaday uaqıtta antiseptik äkelgenge janınan bezgen bireu bolmasa kim qarsı twradı?! Täj-tajaldıñ diagnozın däl tabudıñ jolın tappay jürgende, antiseptik pen ulı araqtı şatastırsaq, swmdıqtıñ kökesi sol bolatın şığar? Onda 5 litrlik plastiktegi arağıñız şın mäninde 5 litr virusqa aynalatını anıq! Onıñ ayırmasın qazir kimnen swraymız? Qoydan basqa.

Serik Janbolattıñ jazbası

Abai.kz

3 pikir