Beysenbi, 6 Tamız 2020
COVID-19 QAZAQSTANDA. Jwqtırğandar — 95942. Jazılğandar — 68871. Qaytıs bolğandar — 1058
46 - söz 717 3 pikir 15 Şilde, 2020 sağat 15:48

Jılu jürekti jılıtadı...

Bayqasaq, bizdiñ qazaqtıñ bükil qasieti osınday qiın sätte sınaladı eken. Qaybir jılı elordada bes qız örtenip ölgen kezde, Arısta jarılıs bolğanda, Maqtaaraldı su basqanda birinşi bolıp qol wşın sozğan osı halıq edi. Qazir de sol halıq auruhanalarda qat bolıp twrğan ottegi koncentratorın alu üşin, tınıs ala almay qinalıp jatqan jandardıñ ömirin saqtap qalu üşin jantalasuda...

Qayırımdılıqqa şaqırğan Qayrat Joldıbaywlına jwrt 100 million teñgeden astam aqşa audarıptı. Jeli belsendileri Aynwr Twrsınbaeva, Däulet Mwqaevtıñ oqırmandarı jiıp bergen aqşağa 825 apparatqa tapsırıs beripti. Onıñ 125-i endigi elge jetipti. Sırımbek Tau bastağan jigitter "Şwğıla" qorımen birigip "Ömir sıyla" akciyası arqılı 1000 ottegi koncentratorın almaqşı. QMDB-nıñ "Zeket" qorı da "Ömirge ümit sıyla" akciyasın bastap, apparat aluğa aqşa jiıp jatır. Tipti ötkende bir kişkentay balanıñ tuğan künine dep jıl boyı jiğan bar aqşasın apparatqa berip jatqanın körgende (videodan), közge jas üyirildi...

Mwnıñ bäri neni bildiredi? Bizdiñ qazaq qanday qiın şaqta da osılay jwmıla ketedi, auzınan jırıp basqağa bergisi, özgege kömekteskisi kelip twradı jäne eñ keremeti olardıñ eşqaysısı sol sauaptı isi üşin qayırım swramaydı. Osı jıluğa aqşa qosıp jatqandardıñ köbi – ne baspanası, ne köligi, tipti qızmeti de joq eñ qarapayım jwrt. Qalay ğana meyirlenbeysiñ!

Bwl qasiet bizge qaydan keldi? Qan arqılı siñdi. Qazaqta asar, jılu, bayğazı, erulik, keusen, baylau, şülen, sauın deeep kete beretin qayırımdılıqtıñ san atası boldı. Köbin qazir wmıtıp baramız. Ottegi koncentratorına aqşa jinau – osındağı jılu dästüri. Qazir damığan elderde "kraufanding" degen närse bar. Ol – osı jılu jinaudıñ zamanaui türi. Biraq olar bireuge bir tiın beru üşin büge-şügesine deyin swrap, zerttep barıp beredi. Al bizdiñ qazaq qaltasındağı barın şın senimmen, şınayı köñilmen wsınadı.

Bwrınğı qazaq toq adamnıñ aş adamğa, sau adamnıñ nauqas adamğa, bay adamnıñ kedey adamğa jılu berui – Qwday aldındağı qarız dep bilgen. Quanatınımız, qazir de solay. Alla bizdi osı qasietimizden ayırmasın! Jılu jürekti jılıtadı. Jıluğa aqşasın qosqan, dwğasın qosqan barşa qayırımdı jandardı Täñir jarılqasın!

Serikbol Hasannıñ jazbası

Abai.kz

3 pikir