Beysenbi, 6 Tamız 2020
COVID-19 QAZAQSTANDA. Jwqtırğandar — 95942. Jazılğandar — 68871. Qaytıs bolğandar — 1058
El işi... 2794 57 pikir 10 Şilde, 2020 sağat 14:51

Prezident Toqaevtıñ sını. Ükimet otstavkağa kete me?

Bügin prezident Qasım-Jomart Toqaev Ükimettiñ keñeytilgen otırısın ötkizdi. Oğan özi törağalıq etti. Ükimet basşısı Asqar Maminnen bastap, birli-jarım ministr esep berdi. Koronavirus indetiniñ betin qaytaru üşin osı uaqqa deyin atqarılğan häm aldağı uaqta atqaralatın jwmıstardı talqıladı. Endi ret-retimen...

Ötkende prezident Toqaev Ükimet pen Vedomstvoaralıq komissiyanıñ otırısın ötkizip, vice-prem'er Eralı Toğjanovtan bastap, birneşe respublikalıq qala men oblıs basşılarına qatañ sögis jariyalağan. Dağdarıstı kezde dwrıs jwmıs istey almağan, indetke qarsı küres şaraların layıqtı deñgeyde wyımdastıra almağan şendilerge şüylikken.

Al bügingi otırısta prezident Toqaev sol jolğı sögisten soñ jwmıs jandata tüskenin aytıptı.

«Qazirgi epidemiologiyalıq ahual qoğamdı asa qattı alañdatıp otır. Ahual öte kürdeli. Biraq alğaşqı oñ ürdister de bayqaluda. Ötken aptada men Ükimet pen äkimderge birqatar tapsırma berdim. Memlekettik komissiya öz jwmısın jandandıra tüsti», - dedi.

Söytti de, koronavirus pandemiyasına qarsı küres şaralarına byudjetten tağı 150 milliard teñge bölinetinin ayttı.

Tağı 150 milliard teñge!

«Pandemiyamen küres barısında şwğıl mäselelerdi şeşu üşin Ükimetten jäne öñirlerden 150 milliard teñge bölinedi. Bastı mindet – koronavirustıñ jwğu qarqının auızdıqtap, taraluın toqtatu jäne nauqastardı emdeu isinde aytarlıqtay nätijege jetu», - dedi.

Äri qaray, karantin rejimin baqılaudı policiya men sanitarlıq därigerlerge tapsırıp, bwl mindetti şara ekenin ayttı. Karantin talaptarın bwzğandardıñ jazalanatının eskertti.

Toqaev: Ükimet baqılağan joq!

Qazir eldegi epidemiologiyalıq ahualdıñ naşarlauı men indettiñ örşuine birinşi kezekte Densaulıq saqtau ministrligi kinäli ekenin ayttı.

«Kelesi mañızdı mindet–tolıqqandı medicinalıq kömek körsetu jäne asa qajetti däri-därmekterdi qoljetimdi etu. Densaulıq saqtau ministrligi basqaru isinde birqatar öreskel qatelikter jiberdi. Äkimderdiñ köpşiligi jwmısın tiisti deñgeyde atqarğan joq. Ükimet te baqılamadı», - dedi.

Sonımen qatar, Toqaev jiberilgen qatelikter men olqılıqtardı anıqtaytın arnayı komissiya qwru qajettigin ayttı. Prezidenttiñ aytuınşa, ol komissiya «jau jağadan alğanda, böri etekten aladınıñ» kerin keltirgen kimder ekenin anıqtap, tergep-tekseredi.

«Biz qazir därilerdiñ jetispeuşiligi men onıñ bağasın qoldan qımbattatu mäselesin şeşuge mäjbür bolıp otırmız. Bwl jağdaydı tez arada rettep, barlıq öñirdi däri-därmekpen qamtamasız etu kerek. Jwmıs jürgizilude. Endi nätije kerek», - dedi Toqaev.

«MÄMS pen «SK Farmaciya» basşıların jwmıstan şığaru kerek!»

Prezident äueli koronavirus pandemiyasına baylanıstı tuındağan qiındıqtarğa kinälilerdi jauapqa tartu kerektigin aytıp, MÄMS (Mindetti äleumettik medicinalıq saqtandıru qorı) pen «SK Farmaciya» basşıların jwmıstan şığarudı tapsırdı.

«Tuındağan qiındıqqa kinälilerdiñ bärine qatıstı tergeu jürgizu kerek. Jauapkerşilikke tartqan dwrıs. MÄMS pen «SK Farmaciya» basşısı jwmıstan şığarılsın. Kerek bolsa tergeu jürgizgen jön», - dedi Qasım-Jomart Toqaev.

Tekseris bastalıp ta ketipti. Prezident solay dedi.

«İndet kezinde osınday jolmen payda tapqısı kelgenderdi qatañ jauapqa tartu qajet. Meniñ tapsırmamnan keyin bwl bağıtta jwmıs bastalıp ketti. Onı soñına deyin jetkizu kerek. Sebebi bwl – tüptep kelgende, wlttıq qauipsizdik mäselesi», - dedi Ol.

Äri qaray: «Qazaqstanda däri-därmekter men medicinalıq bwyımdardı özimiz şığaratın uaqıt keldi. Biz qaşanğı şetelden importtalatın därilerge täueldi bolamız? Namıs qayda?», - dedi Toqaev.

Prezident qazirgi el işindegi alıp-qaşpa äñgimeler men koronavirusvke qatıstı aqparattıñ azdığına da toqtaldı.

Ras, el auzında ärtürli äñgime. «Pälen degen em eken, tügen degen jön eken» desken jwrt bazar men därihana kezip tentirep jür. Al ağartuşılıq bağıttağı aqparat joqtıñ qası. Biz bwl turalı bwrın da jazğan edik.

«Halıqtı ürey men qorqınış bilegen. Tipti olar özderine qajet emes därilerdi de satıp alıp jatır. Adamdar äleumettik jelidegi ärtürli kümändi aqıl-keñesterge qwlaq asuda. Sall-ortalıqtardıñ täulik boyı qızmet körsetuin qamtamasız etip, jwmısın küşeytu kerek», - dedi Qasım-Jomart Toqaev.

Ükimet pen äkimdikter halıqqa tüsindiru jwmıstarın dwrıs jürgizbegenin aytıp, sınadı.

«Ükimettiñ jäne äkimderdiñ qabıldanğan şaralardı tüsindiruinde olqılıqtar bar. Olardıñ qoğam pikirimen tiisti deñgeyde jwmıs istey almay otırğanı bayqaldı. Bas sanitarlıq därigerdiñ pikirine eşkim qwlaq asqan joq. Käsibi dağdı men wyımdastıru jwmısı jetkiliksiz boldı. Nätijesinde biz gumanitarlıq kömek alıp, şeteldik mamandarğa keñesteri üşin alğıs aytıp otırmız», - dedi Prezident.

Tağı bir kemşilik: «Biz jwmıstıñ täsilderin ünemi özgerte beremiz. Bwrınğı basşılıq ayaq astınan nauqastardı simptomdı jäne simptomsız dep bölu kerek dep şeşti. Qazir bwl ädistemeden bas tarttıq. Mine osınday äreketter halıq arasında kümän tuğızadı»,- dedi Toqaev.

«Olardıñ barlıq boljamı qate boldı»

Jäne ol Densaulıq saqtau ministrliginiñ bwrınğı basşılığın sınğa aldı.

«Densaulıq saqtau ministrliginiñ bwrınğı basşılığı uaqıttıñ jetkilikti bolğanına qaramastan, indetpen küreske tiisti deñgeyde äzirlene almadı. Nauqastar sanı jäne basqa da körsetkişter boyınşa olardıñ jasağan barlıq boljamdarı qate boldı»,- dedi.

Sonday-aq, ol pandemiyağa qatıstı barlıq şeşimderdi jedel qabıldau qajettigi tuğanda Ükimettiñ öreskel qatelikter jibergenin sınğa aldı.

«Bwl mäselege qatıstı Ükimet tarapınan da öreskel qatelikter jiberildi. Mwnı aşıq aytu kerek. Dağdarıs kezinde cifrlandıru qızmetiniñ de röli mülde bayqalğan joq. Cifrlıq komissarlar qanday jwmıs bitirip jatır?», - dedi Memleket basşısı.

Äri qaray, qazirgidey tötenşe jağday kezinde Densaulıq saqtau ministriniñ barlıq wsınıs-taaptarı Ükimettiñ özge de müşeleri men äkimder üşin birinşi kezekte orındalatın mindet boluı kerek ekenin ayttı.

«Bir sözben aytqanda, pandemiya kezinde Densaulıq saqtau ministrin erekşe märtebege jäne qwziretke ie dep esepteñizder. Ministrlikke pandemiyamen küres jönindegi kündelikti eseptiñ jäne aqparattıñ beriluin qamtamasız etudi Ükimet pen äkimdikterge tapsıramın», - dedi Prezident.

Sonan soñ, Ükimetke 2 apta uaqıt berdi. Eki aptada jağday oñalmaytın bolsa, Ükimet qwramın auıstıruı mümkin ekenin eskertti.

«Qalıptasqan ahual eki aptadan keyin jaqsaradı dep ümittenemin. Olay bolmağan jağdayda, jalpı Ükimettiñ osı qwramda jwmıs isteu mümkindigi turalı mäsele tuındaydı»,- dedi Toqaev.

Bwdan soñ Prezident Ükimet pen äkimdikterge pandemiyamen küres jöninde kündelikti esep berudi tapsırdı.

Tüyin. Qazir eldegi epidemiologiyalıq ahualdıñ mäz emes ekeni kündelikti aqparatta aytılıp jür. Qazir elde däri-därmek tapşılığı turalı da, auruhanalar men emhanalarda orın jäne maman jetispeuşiligi turalı da talay märte jazdıq.

Däl osı koranavirusqa qarsı küreske dep el byudjetinen neşe milliard qarjı bölindi? Solardıñ naqtı esebin kim berdi? Älginde, ministr Coy esep-qisap qılıp, 114 milliard teñgeni tügendegendey bolıp edi. Keyin ol soma ministr aytqanday 114 milliard teñge emes, 191 milliard teñge ekenin Qarjı ministri «äşkereledi». Bügin tağı 150 milliard teñge bölinetini belgili boldı. Osı qarajat qanşalıqtı tiimdi jwmsalıp jatır?

Qazir elde koronavirus jwqtırğandar sanı 55 mıñğa juıqtağan (54 747 adam). 264 adam qaytıs bolğan. Bwğan pnevmoniyamen auırıp jatqandar men osı dertten qaytıs bolğandardı qosıñız...

Bügin prezident Toqaev Ükimetke 2 aptalıq tapsırma berdi. Eki aptada jağday oñalmasa, Mamin Ükimetine tıqır tayanadı degen söz. Prezident öz sözinde: «Ükimet qwramın auıstıru», dep söyledi. Bwl ne degen söz? Tağı da ministr auısa ma, älde, Ükimet otstavkağa kete me? Siz ne deysiz?

Dayındağan Nwrbike Bekswltanqızı

Abai.kz

57 pikir