Senbi, 15 Tamız 2020
COVID-19 QAZAQSTANDA. Jwqtırğandar — 102287. Jazılğandar — 80716. Qaytıs bolğandar — 1269
676 0 pikir 8 Şilde, 2020 sağat 00:44

Qazaqstandıq farmkompaniya täuiligine 300 mıñ dana medicinalıq maska dayındaydı

Pandemiya eldegi farmacevtika salasına da äser etti. Olar qarantin kezinde üzdiksiz jwmıs istedi. Medicinalıq mekemelerdi jeke qorğanıs qwraldarımen qamtamasız etti. Solardıñ qatarında Qazaqstanğa jäne şet elge tanımal «Dolce-Pharm» kompaniyası bar.

Öndiristik keşen Almatı oblısına qarastı Intımaq auılında ornalasqan, onda 450 adam jwmıs isteydi. Zauıtta altı öndiris cehı bar. Atap aytsaq, sterildengen jäne sterildenbegen qolğaptar öndiretin ceh, däri-därmekter şığaratın (belsendirilgen kömir) cehı, türli maskalar dayındaytın avtomattandırılğan ceh, tigin öndirisi jäne barlıq operaciyalarğa arnalğan jiıntıqtar şığaratın ceh, zararsızdandıru cehı jäne analizder jinauğa arnalğan plastik öndiretin ceh.

«Qazir biz üş auısımda küşeytilgen rejimde jwmıs istep jatırmız. Pandemiya kezinde qosımşa jwmıs orındarın aştıq. Naurız ayınan beri 100 adam jwmısqa qabıldandı. Nätijesinde qazir bizde 450 jwmısşı bar. Tötenşe jağday kezinde keñse qızmetkerleriniñ ıñğaylılığı men qauipsizdigi üşin Almatı oblısında tolıqqandı jwmıs isteuge jağday jasaldı – jatın orın, tamaq, kölik. Zauıtta sanitarlıq-dezinfekciyalıq jwmıs rejimi qatañ saqtaladı. Bizde koronavirus jwqtırğandar joq. Tek baylanısta bolğandar boldı, olar birden oqşaulandı, - dedi «Dolce-Pharm» kompaniyasınıñ atqaruşı direktorı Säule Mäkişeva.

Onıñ aytuınşa, qazir zauıt jeke qorğanıs qwraldarın şığaradı.

«Qazir bizde maskalar men kostyumder jetkilikti. Qoymanı toltırıp jatırmız. Qolğaptarğa qatıstı kişkene problemalar bar, öytkeni biz olardı Malayziyadan satıp alıp, zararsızdandırıp, orap qaptaymız. Pandemiya bastalğalı beri maskalar men qolğaptar bükil älem boyınşa şamamen 10 esege qımbattadı. Sondıqtan endi biz memlekettik wyımdarğa 2015 jılı bekitilgen eski bağamen qolğap bere almaymız. Kelissözder jürgizilude. Mäsele Ükimet deñgeyinde şeşilude. Sondıqtan biz qosımşa kelisimge qol qoyılğanğa deyin qolğap jetkizudi toqtata twrdıq», - dep tüsindirdi ol.

Sonday – aq, ol tötenşe jağday kezinde şikizat jetkizude türli problemalar bolğanın atap ötti. Tuındağan mäsele ministrlikterdiñ aralasuımen oñ şeşimin tapqan.

«Bwrın maskanıñ köterme bağası 19 teñgeden bolatın, pandemiya kezinde bağa köterildi. Qazir 65-96 teñge aralığında. Bwl şikizatqa baylanıstı. Barlıq şikizat jetkizuşileri swranıstıñ ösuine oray bağanı kürt köterdi. Biz şikizattı Qıtay, Resey jäne Türkiyadan jetkizemiz», - dedi käsiporınnıñ atqaruşı direktorı.

Onıñ aytuınşa, qazir jetkizuşilermen eki kelisimşart bar. COVID-19 baylanıstı medicinalıq qwrılğılardıñ bağası qayta qaraldı. «Bizde kelisim boyınşa 10 türli zat bar. Mäselen, qolğap, maska, kostyum bağası 5-10 esege östi», - dedi spiker.

Büginde zauıtta 2,5-3 mln maska bar. Täuligine 300 mıñğa juıq maska men 150 mıñ steril'di qolğap şığarıladı.

Abai.kz

0 pikir