Düysenbi, 10 Tamız 2020
COVID-19 QAZAQSTANDA. Jwqtırğandar — 99442. Jazılğandar — 72523. Qaytıs bolğandar — 1058
2380 58 pikir 5 Şilde, 2020 sağat 18:47

Nazarbaev älemdegi barlıq qazaqtıñ qamqorı boldı

Keñes odağınıñ irgesi ıdıray bastağan sätte, älemniñ är şalğayında jürgen isi qazaq balasınıñ añsarı Qazaqstanğa audı. Baltıq jağalauı elderi bayağıda bölinip ketti. Orta Aziyada birinşi bolıp, Qırğızstan öz täuelsizdigin jariyaladı. Arı qaray, keñestik respublikalar kezegimen bölinip ketip jattı. Biz demimizdi işimizge tartıp, Qazaq eliniñ täuelsizdik jariyalauın taqatsızdana küttik. Aqparat tapşı. Bar sengenimiz – "Azattıq radiosı". Köp tileui – köl ğoy. Ol künge de jettik. Alaştıñ soñğı twyağı Hasen Oraltay ağamız "Azattıq" radiosınıñ efirinen süyinşi swrap, 1991 jılğı 16 jeltoqsanda Qazaqstan Respublikasınıñ täuelsizdik jariyalağanın jetkizdi. Küytin qalasındağı inistitutta oqıp jürgemiz. Al, quan! Al, toyla!

Senesiz be, qaşan Qazaqstanğa oralğanğa deyin bizdiñ aramızda Qazaqstan men Nwrswltan Nazarbaevtan özge äñgime bolmaytın. Kündiz-tüni aytudan bir jalıqqan emespiz. Bılayşa aytqanda, biz bügingi pandemiyamen auırğan sekildi, Qazaqstanmen, Nazarbaevpen auırdıq. Es-aqıl tügel osı jaqqa auıp ketken. Qwdalıqta da, toyda da, ölimde de aytatınım eki-aq äñgime – Qazaqstan jäne onıñ prezidenti Nwrswltan Nazarbaev! Boldı, özge söz qızıq emes, dämsiz. Qalada da, dalada da solay. Eki adamnıñ bası qosılsa boldı, "Qazaqstan...", "Nazarbay..."-dep bastap, aq tañnan qas qarayğanşa guletemiz de otıramız.

Jañılmasam, Nwrswltan Nazarbaev Qıtayğa twñğış ret 1991 jılğı şilde ayında keldi. Twp-tura 51 jastağı kezi ğoy. Men biıl, mine, elu birdemin. Ortalıq telearnanıñ keşki jañalıqtarınan QHR törağası Czyan Czemin'niñ saltanattı qarsı alu sätin öz közimizben körip, qattı quanğanım esimde. Oğan deyin Qıtay törağası Czyan Czemin'niñ qasınan qazaq balasın körgen emespiz. Tipti, ol öñimiz twrmaq, tüsimizge kirmeytin qwbılıs edi. Tek, AQŞ-tıñ, Wlı Britaniyanıñ, Germaniyanıñ... basşıları ğana kezdese aladı dep, oylaytınmın.

Äli köz aldımda twr, teledidardı tesip, kirip kete jazdap, tönip otırmız. Nwrswltan Äbişwlı Qıtay basşısımen birge balpañ-balpañ basıp, qatar kele jatır... Birese, ornımızdan atıp twrıp, üyge sıymay, alswrıp, ketemin. Birese, qayta kelip teledidarğa telmirem. Körgen tüstey bolıp, jañalıq zu etip öte şıqtı. Endi täñerteñgi qaytalanatın habardı tağatsızda küttik. Oğan deyin körşi-qolañ jiılıp alıp, Nwrswltan Äbişwlınıñ kelisti keskinin, balapandap basqan jürisin, kere qarıs aşıq mañdayın jarısa söz etemiz. Qazaqtıñ da osınday sımbattı patşanıñ bolğanıp aytıp, al kep dürildep maqtanamız...

Söytip, biz üşin bwl bir tañğajayıp oqiğa boldı. Endi oylasam, bir jağı jastıq albırttıq bolsa, ekinşi jağınan boydağı qazaqı qan eken ğoy bizdi älekke salıp, alıp wşırıp jürgen.

Nwrswltan Nazarbaevtıñ Qıtayğa kelui men QHR Törağası Czyan Czeminniñ onı öte joğarı deñgeyde qarsı aluı – bige qazaq degen wlttıñ şın mäninde keremet halıq ekenin jüregimizben sezdirip, eñsemizdi köterip ketti.
Aytpaqşı, biz "Azattıq" radiosımen birge, "Qazaq radiosın" da üzbey tıñdaytınbız. "Qazaq radiosında" kündelikti jañalıqtarmen qatar, än-küyler, öner adamdarı jaylı äñgimeler köbirek beriledi.

Sol qwt qonğan 1991 jıldı ayaqtap, jaña jıldı qarsı alar twsta – 31 jeltoqsanda biz "Qazaq radiosınan" Qazaqstan Respublikasınıñ Prezidenti Nwrswltan Nazarbaevtıñ sañqıldağan öz dauısın estidik. Ol prezidenttiñ kündelikti qızmet barısında aytılıp jatatın sözi emes, arnayı şeteldegi qazaqtarğa – bizge arnağan tarih Ündeui bolatın. Eşteñeden tayınğan joq,

"...Biz täuelsiz memleket boldıq, bizdiñ esigimiz sizderge aşıq, keliñder, men şaqıram!.." degen mazmwndağı jalın atqan, sağınışqa tolı şaqıru. Eñ keremeti, Nwrswltan Äbişwlınıñ är sözi anıq jäne nıq senimge tolı edi. Tıñdağan bizdiñ boyımızğa eşkim toqtata almaytın bögeu bermes alıp küş bitirdi Twñğış Prezidenttiñ bwl sözderi!

Onsız da qozıp twrğan delebe odan arı tınışımızdı ketirdi. Söytip, wşarğa qanat tappay jürgen künderdiñ birinde Ürimji jaqtan "Bes jazuşı Qazaqstanğa köşkeli jatıptı!"-degenbir keremet jañalıq jetti bizdiñ qwlaqqa.

Osılayşa, Şıñjañdağı köştiñ alğaşqı señin jazuşılar Jaqsılıq Sämitwlı, Twrsınhan Zäken jäne Armiyabek Sağındıqwlı bastağan bes otbası bwzdı.

"Alısta jürgen ağayınğa aq tilek" attı sol ataqtı Ündeudiñ mına bir böligin oqısañız, Elbasınıñ elden tıs jerde jürgen bauırlarına degen qamqor köñiliniñ qalay ekenine birden köz jetkizesiz:

– Qımbattı otandas­tar! Ejelgi atamekeninen jıraqtap qalğan sizderdi keşegi künge deyin ata-baba jerine qaytıp kele alamız ba degen swraqtıñ alañdatıp kelgenin men jaqsı bilemin. «Tuğan jerdiñ tütini de ıstıq» deydi halqımız. Qandas bauırlarımızdı bayırğı ataqonısına tartu maqsatında adam pravosı turalı elaralıq erejelerdi basşılıqqa ala otırıp, Qazaqstan Ükimeti «Basqa respublikalardan jäne şetelderden selolıq jerlerde jwmıs isteuge tilek bildiruşi bayırğı wlt adamdarın Qazaqstanda qonıstandıru tärtibi men şarttarı turalı» arnayı qaulı qabıldadı. Sondıqtan atamekenge kelemin deuşi ağayındarğa jol aşıq. Ata-baba äruağı aldarıñızdan jarılqasın!"

Qayta dauıstap oqıñızşı, ".. atamekenge kelemin deuşi ağayındarğa jol aşıq. Ata-baba äruağı aldarıñızdan jarılqasın!". Jüregiñdi jwlıp alatın qanday ğajap söz bwl!

Öz memleketiñniñ basşısı öz auzımen şaqırıp twr. Endi osıdan artıq qanday söz kerek bizge?! Boyıñda janıñ bolsa, "Nwrağam, qaydasıñ?!"-dep, jayau bolsa da tartıp ketuiñ kerek qoy birden!

Söytsek, qasietiñnen aynalayın Nwrekem El täuelsizdigin jariyalaymay twrıp, 18 qaraşada Qazaq KSR Ministrler Keñesine «Basqa respublikalardan jäne şetelderden selolıq jerlerde jwmıs isteuge tilek bildiruşi bayırğı wlt adamdarın Qazaq KSR-inde qonıstandıru tärtibi men şarttarı turalı» №711 Qaulı qabıldatıp, bizdiñ bolaşaq tağdırımızdı öz qolımen aldın-ala şeşip qoyğan eken ğoy.

Nwrswltan Äbişwlınıñ eñ keremet kemeñgerligi dep, Qazaqstannıñ Täuelsizdigin jariyalamay twrıp, birinşi kezekte birden alıs-jaqın şetelderde tarıday şaşırap jürgen qazaqstarın eske alğanın, solardıñ elge oraluına mümkindik jasauın tebirenispen, bek rizalıqpen atap ötkim keledi!

Mine, kemeñgerlik. Mine, tuğan halqına degen Wlı mahabbat. Mine, batıldıq pen jürektilik! Biz Elbasımızdıñ bwl jaqsılığın eşqaşan wmıtpaymız. Biz oğan mäñgi rizamız!

Men "Alısta jürgen ağayınğa aq tilek" attı sol qasietti Ündeudiñ osı böligin şetten oralğan jäne oraludıñ sät-sağatın kütip otırğan är qazaq ramkağa altın ärippen jazıp, törine ilip qoyuı, wrapaqtan-wrpaqqa jattatıp otıruı kerek dep esepteymin!

Qazir Wlt Köşbasşısı Nwrswltan Nazarbaevtıñ, Prezident Qasım-Jomart Toqaev är jıldarı jazğan kitaptarın oqıp otırsaq, Nwrswltan Äbişwlınıñ qazaq köşi turalı jasağan Wlı eñbekterin körip, qayran qalasıñ! Elbası är retki şetelge jasağan saparı barısında, eger barğan elinde qazaq bolsa, eñ aldımen solardıñ jağdayın aytıp, mäselesin köterip otırğan. Olardıñ Atajwrtına köşu mäselesin biik deñgeyde kelisipey ketken kezi joq. Şıñjañğa, tipti Qwljağa deyin at basın bwrıp, Jänäbil Sımağwlwlı, Ashat Kerimbaywlı bastağan el ağalarımen äldeneşe märte kezdeskenin, qandastarınıñ üyine deyin barıp, törinde otırıp şay işkenin men öte jaqsı bilem.

Qwdayğa şükir, Twñğış Prezident Nwrswltan Nazarbaevtıñ Alla bergen aqıl-parasatı men talantınıñ arqasında Qazaqstan älemde öz ornı bar keremet memleket boldı. Sol Wlı memleketke älemniñ är şalğayınan bir millionnan astam qandasımız kelip, irge tepti. Olar ösip-önip, baqıttı ömir sürip jatır. Sonıñ bireui – menmin!

Elu jasqa tolğan ımda arnayı qwttıqtauın jiberdi Elbası. Ol qwttıqtaudı men mağan ğana emes, jäne sol alıstan oralğan ağayınğa degen jürekjardı sälemi men qwrmeti dep bağaladım.

Toqırau jıldarınıñ qiınşılığına qaramastan, Täuelsizdiktiñ alğaşqı on jılında Elbası Jarlığımen qandastarımızğa baspana berilip otırdı. Odan keyingi on jılda är jılı 20 mıñ otbasına deyin kvota bölinip twrdı. Qazir de Ükimet ayqındağan öñirlerge qonıstanam degen ağayınğa köp-körim aqşa berilude.

Özekti örteytin bir ökiniş – sol bir köl-kösir, keñir zamanda qandastarımızdıñ Qazaqstanğa qauırt-qauırt, lek-legimen köşip kelip almağanı. Äsirese, Qıtaydağı qazaqtar! Bauırlarımız erkindik pen bostandıqtan göri, qu dünieni qımbatqa balap, tapjılmay otırıp aldı. Ärine, oğan Qazaqstan men onıñ Basşısı kinäli emes. Memlekettiñ ekonomikalıq jağdayı naşar kezde köşip kelgen qazaqtar aştan ölip, köşten qalğan joq. Eñbek ete bilseñ, twrmısıñ da jaqsı boladı.
Tipti, Nwrswltan Nazarbaev prezidenttik ökilettigin merziminen bwrın toqtatqalı jatqanda arnayı Jarlıq şığarıp, belgili-belgisiz sebeptermen, Täuelsizdikten beri qwjatsız jürgen, qwjattarınıñ jaramdılıq merzimi ötip ketken neşe on mıñdağan qandastarımızdıñ ötken jıldıñ soñına deyin qwjattanıp aluına mümkindik jasap berip ketti ğoy, şirkin. Bwğan qalay razı bolmaysıñ, qwrmetti meniñ jerlesterim men tağdırlastarım!

Qazaqstannıñ öz täuelsizdigin jariyalap, däl bügingi künge jetkenge deyingi basıp ötken barlıq jolı men kezeñi köz aldımızda sayrap twr. Şınımdı aytsam, är küni Nwr-Swltanğa qarap, keremet bir tätti tüs körgendey sezim qwşağında jürem. Meniñ bwl sözimdi oqığan keybir ağayın senbeui, meni "jağımpaz" sanauı mümkin. Joq! Qazaqstan turalı meniñ közim jetistikten basqanı köriñkiremeydi, qwlağım jaqsılıqtan basqanı estiñkiremeydi. Sebebi, biz şette jürip, "Täuelsiz Otan" degenniñ zarın äbden tartqan, bodandıq pen kiriptarlıqtıñ kesepatın äbden körgen halıqtıñ wrpağımız. Altı-jeti million qazaq äli sırtta jür. Tuma-tuıstarımızdıñ basım böligi sayasi ezgi men adam tözgisiz azaptı, mine, äli tartıp otır. Bizge toyıp sekiruge, astam söyleuge äli erte. Aqıl aytıp, sınap-minep otırğannan göri, birdeme istep jibergimiz-aq keledi. Keyde soğan mümkindigimiz bolmay, qolımız baylanıp qalıp jatadı...

Biz Nwrswltan Äbişwlın erekşe jaqsı köremiz. Eñbegin bağalap aytudan, jazudan jalıqqan emespin. Jıldar ötip, jastıqtıñ buı basılıp, jasımız eluden asqan sayın, Wlt Köşbasşısınıñ şettegi qazaqtı köşirip aludağı orasan zor eñbegine işiñ jılıp, jüregiñ eljirey tüsedi eken. Tipti, keybir ağayınnıñ oğaş äreketi men qisınsız sözinen wyalatın, qısılatın sätter de boladı. Otan men onıñ är basşısı bizdiñ arqa süyer Alatauımız, qimas dosımız bolıp seziledi. Olar seniñ adal köñil, tüzeu nietpen aytqan är aşı sınıñdı jigitşe kötere biledi. Mwndayda köñiliñ asqaqtap, janıñ jadırap ketedi. Mine, öz memleketiñniñ qasieti men qadırı degen osı bolar.

Qısqası, Nwrswltan Äbişwlına eki düniede rizamın!

Ideal memleket eşbir älemde joq. Bar bolsa, ol da salıstırmalı dünie. Tipti, bar degen künniñ özinde, mäñgilik emes, olardıñ da ağat qadam basatın, tüzu jerde sürinetin, sodan aqsaytın twstarı boladı. Bolıp ta jatır. Är adam özin bilip, deñgeyin bağalap, qabıletine qaray jwmıs istese, erteñgi künimiz tipti de jaqsarıp, keremet el bolamız.

Memleket qwru, onı aynalasımen terezesin teñestire bilu – oñay şarua emes. Memleket qwru bılay twrsın, bar memleketinen ayırılıp qalıp jatqan halıq qanşa ma?! Demek, Elbası Nwrswltan Nazarbaev tuğan halqı üşin qolınan kelgenniñ bärin jasadı. Qazaqtıñ qolın Ata-babası armandağan jağdayğa jetkizdi. Eşkimnen aşqaşan tayınğan joq! Älemniñ barlıq eliniñ basşılarımen qazağı üşin qasqayıp twrıp, söylesti, tilin taptı, sözin ötkizdi... Ol endi bügin barlıq maqtaular men marapatqa layıq!

"Nwrswltan Nazarbaev!" degende, birinşi sözdi Onıñ Köşi-qon sayasatınan bastau kerek!

Men Qazaqstan Respublikasınıñ azamatı retinde Nwrswltan Äbişwlınıñ esimi men qwrmetine jasalıp jatqanın igi isterdiñ bärin dwrıs dep sanaymın!

Al, jetispey jatqan, jetpey qalğan twstar bolsa, Prezident Qasım-Jomart Toqaev bastağan ekinşi buın onı tolıqtıruğa, toltıruğa mindetti. Endi Nwrswltan Nazarbaev turalı bir auız artıq söz aytu kerek emes!
Äuelgi sözimizge oralsaq, Nwrswltan Nazarbaev älemdegi bar qazaqtıñ qamqorı, tiregi boldı. Al, bügin Ol – qazaqtıñ aybatı! Bizge biik minbede twrıp, "...keliñder de, aynalayın, qazağım, küniñdi körip, bayıñdar!"-dedi!

Bile-bilsek, Nwrswltan Äbişwlınıñ sol "Aynalayın!" degen bir auız sözinde Künniñ nwınan da ıstıq jılu bar!

Bizdiñ jauramay, dirdektemey jürgenimiz sol "Aynalayınnıñ" arqası!

Mine, asa märtebeli Nwrswltan Äbişwlı 80 jasqa toldı. Özi qwrğan memleketiniñ sıyı men qwrmetin öz közimen körip, halqınıñ ıqılasın sezinip jatır. Bwl – ekiniñ birine bwyıra beretin baqıt emes! Bar küşimen kündiz-tüni arpalısıp qızmet etken jandarğa ğana tiesili märtebe. Onıñ ar jağında tuğan halqınıñ biik parasattılığı men Sarıarqaday keñ peyildigi jäne kemeñgerligi jatır.

Asa märtebeli Nwrswltan Äbişwlı!

Tağı qaytalap aytam, men Sizge eki düniede rizamın!

Siz şaqırıp, jolımızdı aşpasañız, qazir qayda jürerimdi bir Qwdaydıñ özi ğana biledi. Sizge senip keldik. Senim artığımen aqtaldı. Kele almay jatqan el üşin, ärine, Siz kinäli emessiz! Esikti ayqara aşıp, zañ-jarlığıñızdı erte bastan kemeldep qoydıñız. Siz jäne Sizdiñ buın öz qolımen irgetasın berik qalağan "Qazaqstan" degen qasietti memleketi bar, endi ol qazaq eşqaşan dalada qalmaydı. Qaldırmaymız da!

Sizdi seksen jasqa toluıñızben özimniñ jäne älemniñ är şalğayında jürgen sol barşa qandastarıñızdıñ atınan şın jürekten qwttıqtaymın!!
Jambıl atamnıñ jasına keliñiz!!!

Auıt Mwqibek
"Nur Otan" partiyasınıñ qızmetkeri,
QR Prezidenti janındağı Wlttıq qoğamdıq senim keñesiniñ müşesi.

Abai.kz

58 pikir