Jwma, 14 Tamız 2020
COVID-19 QAZAQSTANDA. Jwqtırğandar — 101372. Jazılğandar — 76756. Qaytıs bolğandar — 1269
Qoğam 3421 4 pikir 2 Şilde, 2020 sağat 13:27

Altay Kölginov eki ottıñ ortasında qaldı ma?

Bwğan deyin Nwr-Swltan qalasınıñ äkimdigi «Astana künin» dabıralı türd ötkizgisi keletini jaylı aqparat taradı. Köpşilik bwl aqparattardı oydan qwrastırğan joq, äkimdiktiñ toy toylau josparı bolğanı şındıq.

Mäselen qalalıq äkimdiktiñ resmi saytında küni keşe Nwr-Swltanda aşıq aspan astında kino körsetilimi ötetini habarlanğan. Bwdan bölek äleumettik jelige Astana künine oray wyımdastırılatın mädeni is şaralardıñ tizimi de jariyalandı. Bwl tizim is-şaralar ötedi dep josparlanğan Nomad city hall-dıñ instagram paraqşasında jariyalanğan. Biraq bwl habarlama keyin resmi paraqşadan joyılğan körinedi.

Qazir elimiz aumağında koronavirustıñ örşip twrğanı belgili. Atalğan indetpen auırğandardıñ sanı 41 mıñnan asıp ketti. 188 adam qaytıs boldı. Memleket basşısınıñ tapsırmasımen el ükimeti tağı da karantindik şaralar engizdi. Osınday qiın kezeñde qala künin toylau ne üşin kerek boldı?

Bwl jalpı halıqtıñ swrağı jäne qarsılığı bolatın. Elorda äkimi Altay Kölginovtıñ atına aytılğan narazılıq pikir az bolğan joq. Bäriniñ aytarı: indet örşip twrğan sätte köp halıqtı bir jerge jinaudıñ jöni joq, qarjını qala künin toylauğa emes, däri-därmekke jwmsau kerek.

Halıqtıñ narazılı jauapsız qalğan joq. 1 şilde keşqwrım elorda äkimdiginiñ resmi saytı is-şaralardıñ onlayn rejimde ötetinin mälimdedi.

- Epidemiologiyalıq ahualğa baylanıstı bwğan deyin Elorda künine josparlanğan barlıq is-şaralar toqtatıldı. Şaralar tek onlayn rejimde ötedi. Bwl turalı qalalıq mädeniet basqarması habarladı. Mısalı «Dombıra küni» şarasın twrğındar Qazaqstan telearnasınan onlayn rejimde tamaşalay aladı. İs-şaralardıñ köpşiligi äleumettik sipatta boladı – erekşe qajettilikteri bar balalarğa arnalğan reabilitaciyalıq ortalıq, jwmıssız äyelderge ŞOB negizderin üyretetin «Käsipker ana» äleumettik ortalığı, Jağalau audanında jedel järdem stansası men «Doktor u doma» medicina ortalığı jäne basqa da äleumettik nısandardıñ aşıluı boladı. Şaralarğa qatısatın adamdar sanı şektelgen. Sonımen qatar üy kezegindegiler men üleskerlerge päter kiltteri tapsırıladı – qatısuşılar sanı şekteuli jäne sanitarlıq normalar qatañ saqtaladı: maska tağıp, äleumettik qaşıqtıq saqtau kerek, - dep jazdı äkimdiktiñ baspasöz qızmeti.

Endi qala künin toylau üşin halıq bir alañğa jinalmaydı. Biraq «attan tüsse de, üzeñgiden tüskisi kelmegen» qala biligi toy toylau oyınan qaytpağan sekildi. Belgilengen is-şaralardı halqtı jinap dabıralı ötkize almasaq ta, onlayn rejimde merekeleymiz dep belsenip otır.

Astana küni 2006 jıldıñ 6 şildesinen beri toylanıp keledi. «Memlekettik meyram» statusı berilgen. Dästürli türde 14 jıl boyı ötip jür (Oğan deyin qala küni 1998 jılı jaña elordanıñ twsaukeseri ötken 6 mausımda toylanatın). Demek qazaq biligi üşin «elorda küni» atap ötpese bolmaytın asa mañızdı merekeler qatarında degen söz.

Osığan qarap Altay Kölginov mırza eki ottıñ ortasında qaldı ma degen oy tuındaydı. Bir jağınan on neşe jıl boyı qalıptasqan dästürdi jalğastırğısı keledi, ekinşi jağınan indet örşip twrğanda toy toylau da oñay emes. Halıqtıñ qarsılığı da Kölginov mırzanıñ arqasına ayazday batarı sözsiz.

Qala biligi «ögizdi de öltirmey, arbanı da sındırmay» eki ottıñ ortasınan aman şığudıñ jalğız jolı onlayn toylau dep şeşken sekildi. Biılğı «elorda küni» onlayn ötedi. Bastısı atausız qalmaydı. Biraq bwrınğıday şetelden ärtis-änşi şaqırıp dabıralı toylay almaydı...

Quanış Qappas

Abai.kz

4 pikir