Düysenbi, 10 Tamız 2020
COVID-19 QAZAQSTANDA. Jwqtırğandar — 99442. Jazılğandar — 72523. Qaytıs bolğandar — 1058
Aqmıltıq 1851 38 pikir 3 Mausım, 2020 sağat 13:50

Aşarşılıqtı «genocid» dep moyındatatın uaqıt jetti!

Mäjilistegi «Aq jol» partiyasınıñ deputattarı Ükimetke saual joldap, qazaqqa qarsı qasaqana jasalğan Aşarşılıqtı resmi türde «genocid» dep tanıp, qwqıqtıq bağa berudi talap etipti.

Mäjilistiñ bügingi otırısında atalğan talaptı, deputattıq saualdı «Aq jol» frakciyasınıñ deputatı Berik Düysembinov aytqan. QR Prem'er-ministriniñ orınbasarı Eralı Toğjanovqa joldanğan deputattıq saualda QR Sırtqı ister ministrligi aşarşılıqtı genocid retinde halıqaralıq deñgeyde (BWW, EIQW, AQŞ Kongressi, Evroparlament t.b.) moyındatu jwmıstarın bastauı kerektigi aytılğan.

Biz öz kezegimizde atalğan deputattıq saualdı qaz-qalpında jariyalağandı jön kördik...


QR Prem'er-Ministriniñ orınbasarı

E.Toğjanovqa!

Qwrmetti Eralı Lwqpanwlı!

Elimiz keşe ğana sayasi quğın-sürgin jäne aşarşılıq qwrbandarın eske alu künin atap ötti. Däl osı küni Prezident Q.Toqaevtıñ «Tarihi ädildikti qalpına keltiru jwmıstarın ayaqtap, sayasi quğın-sürgin qwrbandarın aqtau üşin arnayı komissiya qwru» jönindegi tapsırması jariyalandı. Öte özekti tapsırma. «Aq jol» partiyası Prezident tapsırmasın qoldaydı jäne onıñ jwmısına öz ökilderin jiberuge dayın ekenin habarlaydı.

Sonımen qatar, tarihi ädildikti qalpına keltiru üşin «Aq jol» partiyası bol'şevikterdiñ totalitarlıq biligi wyımdastırğan qazaq jerindegi Aşarşılıqqa resmi türde «genocid» dep qwqıqtıq bağa berudi talap etedi.

Mısalğa älem «genocid» dep moyındağan Ukrainanıñ «Golodomorınan» 3 million 900  mıñ adam qaza tapsa, sol ukrain sarapşılarınıñ aytuınşa, Qazaqstanda aşarşılıqtan 4 million astam otandastarımız qwrban bolğan. Qazaq eliniñ sanı 70 payızğa azayıp ketti.

Belgili aqın Qazıbek Isa:

«Qolın jayıp nan swrağan säbiler,
O düniede dwğa swrap jür äli…» - dep jazğanday, künäsiz ketken beykünä jandar aldında bizdiñ borışımız äli ötelgen joq.

Osığan baylanıstı elimizdiñ Sırtqı ister ministrligi aşarşılıq mäselesin genocid retinde halıqaralıq deñgeyde (BWW, EIQW, AQŞ Kongressi, Evroparlament t.b.) moyındatu jwmıstarın bastauı kerek dep oylaymız.

Sol jıldarı, öz elin, auılın azaptı ajaldan qwtqaramın dep, totalitarlıq, qanişer sayasatqa qarsı, qarulı köterilis jasağan jüzdegen  batırlarımız älige deyin aqtalğan joq. Olar «basmaç» degen mazaq attan äli arıla almay jür. Tarihşılardıñ derekteri boyınşa, qazaq dalasında keminde mwnday 300-den asa köterilis bolğan. Eldiñ jadında Sarqan, Balqaş, Qazalı, Qaraqwm, Irğız, Atbasar, Sarısu, Sozaq, Aday, Şwbartau, Bostandıq köterlisteri äli künge deyin saqtalğan.

Atalarımızdan bizge jetken estelikter boyınşa, bas kötergen qazaq ruların bol'şevik äskerleri artilleriyamen atqılap, qaşıp bara jatqan auıldardı aeroplanmen bombalap, şekarada wstalğan qorğansız bosqındardı pulemetpen bala-şağasımen qosa, qoyşa kırğan.

Mısalı, şığıstağı qazaq-qıtay şekarasındağı ataqtı «Aq-nayman qırğını» degen qandı oqiğa el esinde saqtalsa da, resmi türde äli moyındalmağan; al osı zastavanıñ atı bertinge deyin sol qırğındı tikeley basqarğan qızıl äskerdiñ atımen atalıp keldi. 2012 jılı «Qarasu» şekara punktiniñ qwrılısı kezinde, Şu özenniñ jağasınan jergilikti qariyalardıñ aytuınşa 30-şi jıldarı atılğan äyeldermen balalardıñ toptalıp jatqan süyekteri tabıldı.

Osınday tarihi aqtañdaqtar Ertis pen Şuda ğana emes, Jetisu men Sır boyında, Kaspiy öñirinde de orın alğan.

Elimizben birge, aşarşılıq pen repressiya orıs, ukrain, özbek, wyğır, tatar, qırğız basqa da Qazaq Respublikasında ömir sürgen adamdardıñ basınan ötken.

Ärine, mwnday qwjattardı anıqtap, halıqqa jariya etip, elimizdiñ mıñdağan nağız qwrbandarın aqtap, adal tarihi bağa beretin kez keldi.

Sonımen qatar, soñğı jıldarı bizdiñ bayqauımızşa, keybir äleumettik toptarda, kerisinşe stalinizmdi qayta nasihattau bastaldı. Sol sebepten, «Aq jol» demokratiyalıq partiyası elimizde de-kommunizaciya wstanımın memleketimizdiñ resmi sayasatınıñ bir böligi boluın qalaydı.

Biz ondağan jıl boyı kirme ügit-nasihatpen ömir sürgen ağa buınnıñ közqarasımen sanasıp, olardıñ Otanımız üşin qosqan qajırlı enbegine qwrmetpen qaraymız.

Alayda, ötken zaman täuelsiz wlttıñ keleşegine böget emes, baspaldaq boluı tiis. Qazaq eliniñ bolaşağın totalitarlıq ideologiya emes, jalpıadamzat örkenietine bağıttalğan, keleşektiñ ara-jigin ajırata biletin jaña, Täuelsizdiktiñ wrpağı ayqındauı qajet.

Sonda ğana Aşarşılıq pen sayasi kwğın-sürgin qayğısınıñ tereñ wğınıp, 30 jıl bwrın Twnğış Prezident N.Nazarbaevtıñ bastağan qwrbandardıñ aqtau jwmısı şın maqsatına jeter.

Berik Düysembinov jäne «Aq jol» frakciyasınıñ deputattarı.

Abai.kz

38 pikir