Düysenbi, 6 Şilde 2020
COVID-19 QAZAQSTANDA. Jwqtırğandar — 41065. Jazılğandar — 13614. Qaytıs bolğandar — 188
Apat 1567 1 pikir 28 Mamır, 2020 sağat 16:14

Blok-bekettegi jol apatı. Kim ötirik ayttı?

Almatı qalası men Almatı oblısı arasındağı blok-bekette bolğan qayğılı oqiğa jaylı aqparat ärtürli bolıp twr. Aldımen patrul' köligin soqqan jeñil avtomobil' jürgizuşisi bwrın policiyada jwmıs istegeni turalı aqparat taradı. Biraq Almatı qalalıq PD baspasöz hatşısı Saltanat Äzirbek bwl aqparattı joqqa şığardı. Artınşa, Almatı policiya departamentiniñ bastığı Qanat Taymerdenov küdiktiniñ policiyada qızmet istegenin rastadı.

«Ol policiyada altı jıl qızmet etti, qızmettik mindetterin tiisinşe orındamağanı üşin tört tärtiptik jaza aldı. Bwl onıñ işki ister organdarınan ketuine sebep boldı. Biraq ol odan keyin de özi üşin dwrıs qorıtındı jasay almadı. Zañdı bwzıp, rölge mas küyinde otırıp, qılmıs jasadı», - degen edi Qanat Taymerdenov.

Alayda bwl aqparattıñ da tübi şiki sekildi. Öytkeni kölik tizgininde bolğan Azat Azamatovtıñ äkesi 31 arnağa bergen swhbatında apat bolğan küni wlınıñ kezekşilikte bolğanın aytadı.

Özi de işki ister organdarında 28 jıl jwmıs istegen Talğat Mwqaşevtıñ aytuınşa, Azat Azamatovtı bwrınğı policiya degen aqparat jalğan. Ol tipti osı aydıñ basında ğana leytenant şenin alğan. Koronavirus kezinde demalıssız jwmısqa şığıp, şarşap jürgen.

«Koronavirus üşin mülde demalğan joq. 18-19 kün jwmıs istedi. Jol apatı tañğı 5-te bolğan, sol uaqıtta wyıqtap qalğan boluı mümkin dep oylaymın. Adam demalmay jwmıs istese, rölde otırıp wyıqtap qaluı mümkin. Iä, ol zañ boyınşa jol apatı üşin jauap berui kerek. Biraq men onıñ äriptesterin qasaqana qağıp öltirdi degenge senbeymin», - dedi Azattıñ äkesi.

İşki ister organdarında wzaq uaqıt qızmet etip zeynetke şıqqan Mwqaşev oqiğanıñ anıq-qanığı kamerağa tüsui kerek ekenin aytıp otır. Ol qwrılğınıñ isten şıqqanına kümän keltirdi.

«Qaytıs bolğan jigit balasınıñ şildehanasına şaqırğan eken. Ekeui aralasqan. Söyte twra, qalay qılmısqa bardı dep oylaysızdar. Qasındağı joldasına qasqır da qastıq qılmaydı. Bwl oqıs oqiğa ğoy. Qaytıs bolğan azamattardıñ ata-anasına, tuıstarına qayğırıp köñil aytamın», - dedi Mwqaşev.

Esteriñizge sala keteyik, 25 mamır küni Almatı oblısı, Qarasay audanı, Köksay ıqşamaudanındağı blok-bekette bolğan qayğılı oqiğadan eki policiya qızmetkeri köz jwmdı. Bireui auır jaraqat alıp, auruhanağa jetkizilgen.

1992 jılğı azamat mingen kölik aldımen baqılau-ötkizu beketine, sosın policiya köligine soğılğan.

Qayğılı oqiğadan keyin İİM tekseris jürgizip, aldın alu jwmıstarın jürgizude olqılıqtar orın aldı degen şeşimge toqtağan. Tärtip bwzğan qızmetkerlerge der kezinde tiisti şaralar qoldanılmağan eken. Sonımen qatar, BAQ-qa aqparattı bwrmalap wsınu faktisine de bağa berilgen. Söytip, ministr Erlan Twrğımbaevtıñ bwyrığı boyınşa 9 policeyge tärtiptik jaza berilgen3 policey qızmetinen bosatılğan.

Abai.kz

1 pikir