Beysenbi, 9 Şilde 2020
COVID-19 QAZAQSTANDA. Jwqtırğandar — 53021. Jazılğandar — 35137. Qaytıs bolğandar — 264
El işi... 1366 18 pikir 27 Mamır, 2020 sağat 16:01

Wlttıq keñeste qanday mäseleler talqılandı?

Bügin prezident Qasım-Jomart Toqaevtıñ qatısuımen Wlttıq keñestiñ üşinşi otırıs ötti. Bwğan deyin mälim bolğanday, keñes otırısı bilim beru, densaulıq saqtau mäselelerine arnaldı.

Sonımen Wlttıq keñes otırısında qanday wsınıstar aytıldı? Qanday mäseleler talqılandı? Prezident Toqaev ne dedi? Keñestiñ onlayn otırısında Prezident aytqan bastı taqırıptıq tezisterge şolu jasadıq...

Ğılım men bilimge bölinetin qarajattı ösiru turalı...

Atalğan jiında Memleket basşısı Bilim berudi jäne ğılımdı damıtudıñ 2025 jılğa deyingi memlekettik bağdarlaması boyınşa reformalardı qayta qarau qajettigin ayttı. 2025 jılğa deyin bilim salasına bölinetin qarajat 6 ese, ğılımğa bölinetin qarjı 7 ese ösetin boldı.

«Endi bwl salanıñ mañızı arta tüsetini anıq. Tipti ekonomikanıñ özi soğan täueldi bolmaq. Biz bilim men ğılım salasınıñ bolaşaqtağı rölin ayqın tüsinuimiz kerek. Bükil memlekettik sayasattı soğan säykes jüzege asıramız», - dedi Qasım-Jomart Toqaev.

Sonday-aq, Ol jıl sayın keminde 100 ğalımnıñ älemdegi jetekşi zertteu ortalıqtarında ğılımi tağlımdamadan ötuine qarjı bölinui kerektigin jäne birlesken zertteuler jürgizu üşin jetekşi şeteldik ğalımdardı tartu qajettigin ayttı.

JOO oqıtuşılarınıñ jalaqısın köbeytu turalı...

«Qazirgi tañda köpşilik oqıtuşılardıñ eñbegi qanşalıqtı mañızdı ekenin tüsindi dep oylaymın. Biz «Pedagogtar märtebesi» zañı ayasında mwğalimderdi ıntalandıru şaraların qarastırdıq. Biraq is jüzinde JOO oqıtuşılarınıñ jalaqısı mektep mwğalimderiniñ jalaqısınan az bolıp qaldı. Osığan oray, Ükimet JOO oqıtuşılarınıñ eñbekaqısın köbeytu mäselesin qarastıru kerek», - dedi prezident Toqaev.

Studentterge jeñildetilgen nesie beru turalı...

Qasım-Jomart Toqaev jastardı joğarı bilimmen qamtamasız etu üşin olarğa jeñildetilgen nesie berudi wsındı.

«Az qamtılğan otbasılar, azamattar men jastardıñ äleumettik älsiz sanattarı üşin grant sanın köbeytu mäselesin qarastıru kerek. Joğarı bilim aqısın töleu üşin jeñildetilgen nesie beru - qoldaudıñ tağı bir türi bolar edi. Ükimetten, sonday-aq Wlttıq keñes müşelerinen osı mäsele boyınşa öz wsınıstarın berudi swraymın», - dedi Toqaev.

Qala men auıl mektepterin teñestiru turalı...  

«Kelesi bir mañızdı mindet – qalalıq jäne auıldıq mektepter arasındağı alşaqtıqtı azaytu. PISA mälimetteri boyınşa qazir aradağı alşaqtıq 1,5 jıldı qwraydı. Barlıq balalar twrğılıqtı jerine nemese äleumettik jağdayına qaramastan sapalı bilimge qol jetkizui kerek. Ayta ketu kerek, qalalıq jäne auıl twrğındarı arasındağı bilim alşaqtığı ürdisi birqatar memlekette bar», - dedi Ol.

Oqulıqtıñ sapası turalı...

«Elimizde oqulıqtardıñ sapası mäselesi jii köteriledi. Bilim sapası aynalıp kelgende oqulıqtıñ sapasına baylanıstı. Bwl – aksioma. Sol sebepti ğılımi-praktikalıq saraptamağa qoyılatın talaptı edäuir arttırıp, oqulıqtardıñ aprobaciyasın tüpkilikti türde köteru kerek. Bwl – Bilim jäne ğılım ministrliginiñ mindeti. Men tipti onı basımdıqqa ie tapsırma dep aytar edim», - dedi Prezident.

Sonday-aq, qazirgi tañda elimizdegi oqulıqtardıñ sapası öte naşar ekenin aytıp:

«Zañnamalıq türde sol oqulıqtardı jazatın adamdardıñ jauapkerşiligin bekitudi tapsıramın. Naşar oqulıq dayındadıñ ba, jaramay qaldı ma – onı jazğan adam jauapkerşiligin köterui kerek. Basqaşa bolmaydı», - dedi.

42 mıñ teñge stipendiya beru turalı...

Sonımen qatar, Prezident pedagogika mamandıqtarınıñ stipendiyasın 26 mıñ teñgeden 42 mıñ teñgege arttırudı tapsırdı.

Til komitetin Bilim ministrliginiñ qaramağına beru turalı...

«Memlekettik tildi oqıtudıñ tiimdiligin barınşa arttıruımız kerek. Bwl mäselede Europa elderdiñ täjiribesine nazar audaru qajet. Olar til üyretu barısında negizinen oqu orındarındağı jastarğa köbirek män beredi.

Sondıqtan Til komitetin 2021 jıldan bastap Bilim jäne ğılım ministrliginiñ qaramağına beru kerek. Bwl qazaq tilin oqıtu ädistemesin äzirleu jäne onı üyretu isine qatıstı äleuetimizdi bir ortalıqqa şoğırlandıruğa mümkindik beredi.

Sonday-aq, mwnday qadam qoldanısqa engiziletin oqu bağdarlamalarınıñ tiimdiligin taldau jäne monitoring jürgizu jüyesin jasauğa septigin tigizedi», - dedi Prezident.

Därigerlerdiñ jalaqısın köteru turalı...

Därigerdiñ jalaqısı ekonomikadağı ortaşa jalaqıdan 2,5 ese artıq boluı kerek.

«Koronavirus pandemiyası bükil älemdegi densaulıq saqtau jüyesi üşin şın mäninde auır sınaq boldı. Bwl ahual elimizde käsibi därigerdiñ tapşı ekendigin anıq añğarttı. Bwğan eñbekaqınıñ azdığı, mamandıqtıñ bedeldi bolmauı, därigerler qwqığınıñ qorğalmauı sebep bolıp otır. Türli sala mamandarı işinde eñ tömen jalaqını däigerler aladı», - dedi Toqaev.

Osı orayda Memleket basşısı Ükimetke biıldan bastap därigerlerdiñ eñbekaqısın kezeñ-kezeñmen arttırudı tapsırdı.

«Olardıñ aylığı ekonomikadağı ortaşa jalaqıdan 2,5 ese artıq boluı kerek. Bwl körsetkişke 2023 jılğa qaray qol jetkizu qajet. Osı kürdeli kezeñde barşamız medicina mamandarınıñ qajırlı eñbegine kuä boldıq», - dedi.

20 jaña klinika salu turalı...

«Aldağı 5 jılda memlekettik densaulıq saqtau mekemelerin medicinalıq tehnikamen 100 payız qamtamasız etuimiz kerek.

Sonımen qatar jaña auruhanalar salu qajet. Jwmıspen qamtudıñ jol kartası ayasında biıldıñ özinde 24 jaña densaulıq saqtau nısanı paydalanuğa beriledi. 2025 jılğa qaray memlekettik bağdarlama boyınşa 20 iri klinika salınadı», - dedi Memleket basşısı.

Däri-därmektiñ birıñğay jüyesin qwru turalı...

Prezident Ükimet däri-därmek öndirisiniñ birtwtas jüyesin qwruı qajettigine toqtaldı.

Sonımen qatar Qasım-Jomart Toqaev elimizdiñ däri-därmekpen jäne medicinalıq önimdermen qamtamasız etu isiniñ olqılıqtarı anıqtalğandığın basa ayttı.

«Biz importqa tım täueldimiz. Şetelden keletin därilerdiñ narıqtağı ülesi 88 payızğa juıq. Formakologiyalıq zertteuler jürgizu üşin täjiribemiz jetkilikti. Ğılımi baza da, bilikti mamandar da bar. Sondıqtan Ükimet däri-därmek öndirisiniñ birtwtas jüyesin qwruı qajet. Mwnda zertteu jürgizuden bastap, önerkäsiptik deñgeyge deyingi üderister qamtıluğa tiis», - dedi Memleket basşısı.

Farmacevtika önerkäsibin damıtu turalı... 

Ükimet otandıq farmacevtika önerkäsibin damıtu josparın jasauı qajet.

«Farcevtika salasındağı sayasat işki swranıstı qamtamasız etuge, ozıq tehnologiya tartuğa jäne importtı almastıruğa bağıttalğanı jön. Osığan oray farmacevtika jäne medicina önerkäsibi salasındağı memlekettik sayasattı qalıptastıru jäne iske asıru mindeti Densaulıq saqtau ministrligine beriledi», - dedi Qazaqstan Prezidenti.

Bwl rette Qasım-Jomart Toqaev salanı damıtu jäne qalıptı, tiimdi däri-därmekpen qamtamasız etudiñ tepe-teñdigi bwzılmauı kerektigin basa ayttı.

Tüyin. Biz bügingi Wlttıq keñestiñ üşinşi onlayn otırısında prezident Toqaev toqtalğan taqırıptardı tizip şıqtıq. Siz ne deysiz?

Abai.kz

18 pikir