Jeksenbi, 20 Qırküyek 2020
COVID-19 QAZAQSTANDA. Jwqtırğandar — 107199. Jazılğandar — 101822. Qaytıs bolğandar — 1671
Körşiniñ köleñkesi 4602 23 pikir 20 Säuir, 2020 sağat 12:38

Putinniñ añsağan «jwmağı» - KSRO!

Kreml'diñ qojayını Vladiimir Putin bwrınğı Sovet odağın qayta qwrğısı keletinin bwl jolı aşıqtan aşıq ayttı. «Rossiya 1» arnasına. «Moskva. Kreml'. Putin» deytin bağdarlamada. «Birigu - bwrınğı Sovet odağı elderiniñ barlığına payda äkelmese, ziyanı joq», - dep söyledi.

Putin 2019 jıldıñ 1 qazanında Eravanda jürgen saparında, özine tikeley bağınıştı, pro-kreml'dik propogandanıñ aytaqtağı aytarşısına aynalğan «Rossiya 1» arnasınıñ tilşilerine swhbat bergen. Qıp-qısqa äñgime. Al onı älgi arna mine, şığarıp otır eken.

Sonımen Putin bwl jolı ne dedi? Ret-retimen jazayıq...

«Ötken şaqtıñ, äsirese Sovet odağınıñ, Sovet imperiyasınıñ qayta qwrıluına qatıstı qanday da bir ürey-qorqınıştan arılğan soñ, küş biriktirudiñ barlığı üşin paydalı ekeni turalı tüsinik tuadı. Bwl mümkindikti, bwl basımdıqtı processtiñ barlıq qatısuşıları körip, bilip otır. Biz äri qaray jıljıp, jaña qadam jasap, alğa basıp kelemiz», - depti Vladimir Putin.

Putin: Ortaq tilimiz - orıs tili

Resey prezidenti öz sözinde: «birikken kezde ğana bäsekege qabilettilik degen boladı. Bwrınğı KSRO elderi üşin de solay», - dep söylepti.

«Bizdiñ ortaq tilimiz bar. Wltaralıq, memleketaralıq qarım-qatınas tili - orıs tili. Barlıq elde orısşa erkin söyleydi. Bwl ülken basımdıq. Bizde bwrınğı ortaq memleketimizden qalğan ortaq transport, ortaq energetika,  ortaq baylanıs infraqwrılımdarı bar. Bwl tağı bir basımdıq», - deydi Vladimir Putin.

Äsili, orıs aqparatınıñ, aqparatşılarınıñ eki auız sözinde bir soqtığıp, süykenip söyleytini - AQŞ pen Batıs, odan qalsa ukrain ğoy. Bwl jolı da Batıstağılardı, Europanı bir süzip ötipti. Orıstıñ, Kreml'diñ aynalasına toptasuğa käri qwrlıqtağılar qarsı bolatının aytıp, «alañ» boptı. Al bärin bilgiş Bäkeñ (Vladimir) onı da bir jayğap qoyıptı. «Bizdi köre almaydı», - dep köñil jwbatıptı.

«Olar özderiniñ bastı bäsekelesteriniñ damığanın, öskenin qalamaydı. Al biz qalaymız. Sondıqtan, bwl bizdiñ azamattarımızdıñ twrmıs-küyin jaqsartuğa jasalapı otırğan qadam. Bwl twrğıdan, tañ qalatın eşteñe joq. Biz bwdan da qarqındı jwmıs jasaytın edik», - depti Putin.

Bıltır... 

Bıltır ğana, 2019 jıldıñ jeltoqsanında Vladimir Putin qasına qıruar tilşini toptap alıp, swhbat ötkizgen. Sonda Ekinşi düniejüzilik soğıstağı jeñistiñ 75 jıldığın toylau taqırıbı da söz boldı.

«Biz soğıs jaylı faktilerdi bwrmalap, Keñes äskeriniñ tarihi jeñisin qaralap, ötirikti qosıp, bizdi nacizmmen teñ qoyğısı keletinderdiñ auzın jauıp, ünin mäñgige öşiremiz. Biz olarğa bwltartpas ayğaqtar men tarihi qwjattar, fil'mderdi wsınatın bolamız»,- dep söylegen Putin.

Putinniñ paradına qatısu mindet

Odan säl bwrınıraqta Resey prezidenti 75 jıldıqtıñ qwrmetine qolındağısı men qorasındağı bar qaruınıñ tegi jaqsıların terip, äskeri äleuetin älemge äygileytin älemet bir parad ötkizetinin aytqan eken.

Maqwl ğoy, ottı qarudıñ tür-türin Qızıl alañda sappen tizip, äskeri parad ötkizu – Kreml' ideologiyasınıñ bwljımas dästürine aynalğalı qaşan. Sondıqtan, eren sanamay, «jıldağısınşa öter» dep qoya salar ma ek. Joq. Bwl jolı Vladimir Putin «bwrınğı bodan elderdiñ basşılarınıñ barlığı Mäskeuge kelip, paradtı birge körui kerek», - dep söylegen.

Putin: Men Sovet odağınıñ joqtığına ökinemin

«Men Sovet odağınıñ joqtığına ökinemin. Bwl olardıñ qwqığı. Biraq eger bizdiñ memleketaralıq qatınastarımızdıñ bügingi erekşelikterine baylanıstı keybir memleket basşıları kelmese, olar üşin bwl ülken qatelik boladı dep oylaymın. Sebebi bwl olardıñ öz Otandarınıñ täuelsizdigi üşin soğısıp, ömirlerin qiğan adamdarğa layıqtı qwrmet körsetpeytindigin bildiredi», - depti Putin.

Sonımen, Putinniñ pikirinşe eger Sovet armiyası jağında soğısqan nemese bwrın odaqtas bolğan, Kreml'diñ şaqırtuın alğan elderdiñ basşıları Mäskeuge äskeri parad köruge kelmeytin bolsa – onda bwl ülken qatelik eken. Tipti, soğısta şeyit ketkenderge degen qwrmetsizdik boladı-mıs.

Putinniñ jwmağı

Esteriñizde bolsa, 2018 jılı orıs prezidenti Vladimir Putin külli älemge külki boldı. Iä, Kreml'diñ 2000-jıldan bergi qojayını, KGB-nıñ tülegi, eli senbese de, El'cini sengen Putin külli älemniñ külkisine qaldı. Qalay deysiz ğoy, aytayıq.

Reseyde «Valday» forumı degen bir jiın ötti. Sol jerde söztalqığa qatısıp, oy bölisken orıs prezidenti halqınıñ jarım böligi qayırşılıqqa salınıp, ekonomikası qwldırap, öndirisi ölimşi bolğan qazirgi Reseydiñ öktemdigin, älde jeke ambiciyasın tanıtqısı keldi me, äyteuir, beysayasi sözder ayttı.

Rezidenciyası mäyithana men molağa aynalğan Putin: «Endeşe agressor bilsin. Bäribir kek, eseniñ qaytarılatının bilsin. Ol jer betinen joq boladı. Al biz şe? Biz sol agressordıñ qwrbanımız. Biz azaptaluşı retinde jwmaqqa kiremiz. Al olar, olar – öledi. Öytkeni, olar keşirim swrap ta ülgermeydi», - dedi.

«Oybay-şınımen, solay dep pe?», deytinder bolsa, mine orısşası: «Nu da, no togda agressor, on vse ravno doljen znat', çto vozmezdie neizbejno, çto on budet uniçtojen, a mı jertvı agressii, i mı kak muçeniki popadem v ray, a oni prosto sdohnut, potomu çto oni daje raskayat'sya ne uspeyut».

Aytpaqşı, Putin osı sözderdi aytqan forumnıñ taqırıbı – «Biz ömir süretin älem: XXI ğasırdağı twraqtılıq pen damu», dep ataladı.

Söytip, alda-jalda  yadrolıq soğıs bola qalsa, Putinniñ jauları tozaqqa, al özi jwmaqqa baradı eken. Putin jañağı sözderdi aytqanda zaldan qarqıldağan külki estildi. Öytkeni, Kreml'diñ twrğını qanşa kijinip söylese de, bwl külkili edi.

Tüyin. Jatsa, twrsa esilderti eski odaq bolğan Kreml'diñ qojayını KSRO-nı qayta qwru turalı bügin ğana aytıp otırğan joq, rasında. Bwğan deyin de birneşe jerde şwbarlap söylep, şet jağasın aytıp jwrdi. Odan qalsa, salğılasqanda öz tükirikterine özderi şalala söyleytin älgi sarjağal sayasatker sımaqtardıñ auzına sap beretin.

Orısta Sovet odağın qayta qwru turalı kimder aytpadı deñiz... Jirinovskiy, Zyuganov, Limonov, Bogdasarov, Kalaşnikov, Solov'ev, Skabeeva, Kiselev... Bwl tizimniñ tübine bügin jetpeysiz. Putinnen bastap, Dumanıñ deputattarı, Medved'ev pen Mişustinniñ ministrleri men olarğa täueldi jaldamalı jazarmandar... Ayta berseñ, tipti köp.

Bolaşaqtı soğıspen bağalaytın adamnıñ äuelgi ambiciyası - ekonomikalıq odaqtı sıltauratıp, eski odaqtı tiriltu! Dwrısı joğarıda: «Biz jwmaqqa baramız», - dep söylegen Putinniñ añsağan «jwmağı» - KSRO bolsa kerek. Qoş, mwnı qazaqtağı azamattıq qoğam men ondağı esti jürt eki bastan bilip otır ğoy. Tek, eski şekpennen şıqqan bizdiñ biliktegi biraz däu bilse deymiz... «Estitin memleket», - dedi ğoy. Estip qalar...

Nwrgeldi Äbdiğaniwlı

Abai.kz

23 pikir