Seysenbi, 7 Şilde 2020
COVID-19 QAZAQSTANDA. Jwqtırğandar — 41065. Jazılğandar — 13614. Qaytıs bolğandar — 188
Sayasat 3441 3 pikir 8 Säuir, 2020 sağat 11:44

Täjin täuekelmen jwmıs istedi

Bügin belgili memleket jäne qoğam qayratkeri Marat Mwhanbetqazıwlı Täjin 60 jasqa toldı.

Sovet Odağı ıdırağanda, täuelsiz, jas memlekettiñ irgesin qalap, ayağınan tik twrğızu oñay bolğan joq. Sayasi qwrılımdı özgertip, jaña narıqtıq qatınastar ornatu, älemdegi barlıq elmen terezesi teñ barıs-kelis jasau, qısqası tıñnan türen salu üşin Elbası öz komandasın jasaqtadı. Bwl komandanıñ bir böligi öz elimizde, KSRO aumağında eñbek etip, közge tüsken käsibi mamandardan qamtılsa, endi bir böligi qayta qwru zamanında joğarı bilim alğan, jañaşa oylaytın, özgeris pen jañalıqqa janı qwştar jas mamandar edi.

Sol bir uaqıt belesinde jas sayasatkerlerge ülken, jauaptı jwmıstar senip tapsırıldı. Osı buınnıñ wşar basında ğılımi orta men prezident apparatında sınaqtan ötip, örimdey jasında tereñ bilimi, sabırlı minezimen ülken memlekettik müddeni tüp nısana etken, memleket jäne qoğam qayratkeri Marat Mwhanbetqazıwlı Täjin twrğanı aydan anıq.

Almatı halıq şaruaşılıq institutın, Äl-Farabi atındağı Qazaq WU aspiranturasın bitirgen soñ, Wlıbritaniyada London Universitetinde ğılımi täjiribeden ötken Marat Täjinniñ jalındı jastıq şağı täuelsizdiktiñ şwğılalı tañımen twspa-tws keldi. Ol bar bilimi men parasatın eliniñ erteñi üşin jwmsadı.

Täjinniñ sabırlı minezi men tereñ bilimi, wzaqtı oylaytın köregendigi memlekettiñ kädesine jaradı. Ol Elbası men elitanıñ, halıqtıñ senimine bölendi, işki sayasat pen sırtqı sayasatta barlıq mañızdı qwrılımdardıñ tetigin wstap, mindetin abıroymen ötedi.

Täuelsizdik jıldarındağı Marat Mwhanbetqazıwlınıñ eñbek jolı eldiñ köz aldında. Sondıqtan, biz Täjinniñ soñğı üş jıl auqımındağı jemisti qızmetine az-kem toqtalğandı jön kördik.

2017 jılğı qañtarda, Elbasınıñ wyğaruımen, Marat Mwhambetqazıwlı QR Prezidenti äkimşiligi basşısınıñ birinşi orınbasarı bolıp tağayındaldı.

Täjin osı lauazımğa kelgende, jasıratını joq, eldegi ideologiya şatqayaqtap, keri ketip twrğan edi. İşki sayasatqa jauaptı qwrılımdar eldegi aqparattıq-ideologiyalıq saladağı mäselelerden alıstap ketti, osı salanıñ tizginin wstağan basşılarğa degen qoğamnıñ, ziyalı qauımnıñ swraqtarı köbeye tüsken.

Soğan anıq kuälik etetin bir mısal keltireyin. Täuelsizdik jıldarı Otanğa oralğan qandastarımızdıñ jalpı sanı millionnan asqan bolatın. Soğan qaramastan, biz aytıp otırğan uaqıtta  köşi-qon sayasatına qarsı kommerciyalıq kanaldar men baspasöz qwraldarı arqılı, aşıq-kömeski türde şabuıldar üdep ketkenin jaqsı bilemiz.

Keybir sarapşılar, tipti, «şettegi qazaqtardıñ salt-sanası, dästüri, jazuı mülde basqa. Sondıqtan şeteldegi qazaq pen Qazaqstan qazağın bir wlt deuge kelmeydi» dep kesip-pişti. Endi bireuler «bwlar bwrınğı bay-kulaktardıñ twqımı, qiındıq kezinde qaşıp ketip, endi dayarğa mayar bolıp kelip jatır. Özimiz qinalıp jürgende, bwlarğa üy, jer berip nege äspetteymiz», «Özimiz nanğa, suğa jarımay otırğanda, bwlarğa nege kottedj salıp beremiz?» dep daurıqtı. Bwnıñ ayağı 2013 jılı köşi-qon zañına jaña tüzetuler engizilgende, qandastardan azamattıq alu üşin 4 jıl kütetin, bankke kepil aqşa qoyılatın jaña tarmaqtar engizildi. Äri kelgen elinen köşi-qon parağınan şığu, sottalmağan degen eki anıqtama alıp keletin boldı. Sonımen köş tığırıqqa közge körinbeytin qoldıñ köseuimen tireldi. Bwl – bir ğana mısal.

Baspasözde Alaş Orda, jer, köşi-qon turalı äñgime qozğamauğa ideologiya salasınıñ basşıları jasırın bwyrıq bergeni turalı qaueset jeldey esti. Äsirese, qazaqtildi ortada, qazaq qoğamında mwnday şekteuler zañdı narazılıq ta tuğızıp jattı.

Unitarlı memleket qwru jolındağı işki-sırtqı sayasatımız, otarsızdandıru üderisin bir arnağa tüsiru jolındağı şaralarımızdıñ keybireui körinbeytin kedergige wşırap jatsa, keybireui qiındıqpen, mısıq tabandap alğa jıljıdı.

Osınıñ bäri Täuelsizdigimizdiñ üşinşi onjıldığında memleket üşin, qoğamnıñ damuı üşin jaña ideologiyalıq wstanımdar men közqarastardıñ, jaña bastamalardıñ auaday qajet ekendigin körsetkendey edi.

Sözi men isi alşaq ketpeytin, eşqaşan populizmge boy wrmaytın strateg, ülken bilim iesi Marat Täjin ideologiyanı qolğa alğan kezde, elimizdiñ işki-sırtqı ahualı qısqaşa osınday bolatın. Köp keşikpey-aq jağday tübegeyli oñala bastadı.

2017 jılı 12 säuirde Elbası N.Nazarbaev «Bolaşaqqa bağdar: Ruhani jañğıru» attı maqalasın jariyaladı. Elimizdiñ sayasi ömirinde, bolaşaq damuında mañızdı röl atqaratın bwl qwjat, ä degende «biz qayta tüleudiñ ayrıqşa mañızdı eki procesi – sayasi reforma men ekonomikalıq jañğırudı qolğa aldıq», dep atap ötti.

Ruhani jañğıru sayasi, ekonomikalıq jañğırulardıñ ajıramas böligi ekendigi qadap aytıldı. Eñ bastısı, «Ruhani jañğıru» bağdarlaması deklarativti küyde, söz jüzinde qalğan joq. Bağdarlama ayasında elimizdiñ mädeni-ruhani damuına alğışart bolatın keşendi jobalar jasaldı.

«Tuğan jer», «Jaña gumanitarlıq bilim. Qazaq tilindegi 100 jaña oqulıq» jobaları sätimen iske astı.

2018 jılı 21 qaraşada Elbası «Wlı dalanıñ jeti qırı» attı, 2017 jılı säuirde jariyalağan «Bolaşaqqa bağdar: Ruhani jañğıru» bağdarlamasınıñ jalğasın jariyalap, öziniñ sayasi, ruhani  jigerin körsetip, ötkenge degen qwrmet, keleşekke degen senimin keñinen payımdadı.

Bwl eki qwjattıñ dayındalıp, halıq arasında keñinen nasihattaluı, iske asırıluı kezdeysoqtıq emes ekenin, mwqiyat josparlanıp, el tağdırın özgertetin wzaq strategiya üşin dayındalğanın biz bügin ğana sezine bastağandaymız.

Eñ bastısı, osı eki qwjattıñ aralığında wzaq jıl ırğalıp-jırğalıp, äldekimniñ qabağına qarap, jaltaqtap jürgen jobamız – latınğa köşu mäselesi tübegeyli şeşildi. Latınğa köşu jobası qoğamda qızu talqılanıp, zor qoldauğa ie boldı.

«Jaqsınıñ jaqsılığın ayt – nwrı tasısın» degen halqımız. Joğarıdağı memleket üşin, bolaşaq üşin tağdırlı, jauaptı bastamalardı iske asırudıñ bası-qasında Marat Täjinniñ jürgenin atap aytuğa tiispiz.

2019 jılı naurızda elimizde twñğış ret bilik tranzitiniñ örkenietti, beybit auısu procesi sätimen jüzege astı. Qasım-Jomart Toqaev Qazaqstannıñ ekinşi prezidenti bop resmi saylandı. Osı twsta M.Täjin Qazaqstan Respublikasınıñ Memlekettik hatşısı bolıp tağayındalıp, Qasım-Jomart Kemelwlımen birge, jemisti qızmetin jalğastırdı. Bwl da el prezidentteriniñ Täjinge degen zor seniminiñ körinisi bolsa kerek.

Bir sözben aytqanda, üş jılğa jeter-jetpes uaqıtta ideologiya salasında ğasırlıq mañızı bar şarualar atqarıldı. Bwrınğı ketken qatelikter tüzelip, keleşektiñ kökjiegi tipti de jarqıray tüsti.

Bügingi künniñ biiginen qarasaq, Marat Mwhanbatqazıwlı öziniñ qayratkerlik, azamattıq täuekeliniñ arqasında, otanşıldıq, memleketşildigi men tereñ parasat-payımınıñ arqasında el basşılarınıñ da, eldiñ de rizaşılığına bölengenine köz jetkizemiz.

Ol elge özi qızmet etip qana qoyğan joq, soñınan elge qızmet etuge tiis twtas sayasi buındı tärbieledi. Qazirgi kezde Marat Mwhanbetqazıwlınıñ şäkirtteri är salada eline abıroylı eñbek etip jür. Bwl wlı mwrattar men ülken maqsattar jolındağı twlğalardıñ ğana qolınan keletin izgi is bolsa kerek.

Büginde Marat Mwhanbetqazıwlı Täjin Qazaqstannıñ Çehiyadağı Tötenşe jäne ökiletti elşisi. Elin süygen qayratker wlğa tek zor tabıstar men amandıq tileymiz!

Omaräli Ädilbekwlı,

«Jebeu» qoğamdıq birlestiginiñ törağası.

Abai.kz

3 pikir