Düysenbi, 1 Mausım 2020
COVID-19 QAZAQSTANDA. Jwqtırğandar — 11308. Jazılğandar — 5458. Qaytıs bolğandar — 41
Körşiniñ köleñkesi 12831 33 pikir 2 Säuir, 2020 sağat 17:40

Aytaqtağı attanşı Qazaqstandı tağı da tildedi

Bıltır mausım ayında Reseydiñ federativtik arnasında «Veçer s Vladimirom Solov'evım» deytin habarda orıstıñ öñkey sarjağal sayasatşısımaqtarı jiılıp, Resey şekaralarına jaqın ornalasqan AQŞ-tıñ biologiyalıq zerthanaları turalı talqı jasaptı.

Sodan qızdı-qızdığa kelgende, äuelden pro-kremldik ideologiyanıñ aytaqtağı abalağına aynalğan Vladimir Solov'ev qojayını basqarıp otırğan elge böten piğıldılar qauip töndirip twr degen üreymen, jat ta kep alañdaptı. Solov'evtiñ sözinşe, AQŞ Resey şekarasına jaqın jerde biologiyalıq bomba ornalastırğan-mıs. Jäne onısı Qazaqstanda eken, tağı.

Solov'evtiñ kezekti şouı

«Ukraina, Gruziya, Qazaqstan, Äzirbayjan, Armeniya, Özbekstanda Pentagonnıñ baqılauımen jäne qarajatımen amerikandıq biologiyalıq zerthanalar jwmıs isteydi. Resmi türde olardıñ mindeti - qauipti infekciyalar men virustardı zertteu. Al, şın mäninde, olardıñ qızmetkerleri biologiyalıq material jinaydı. Eñ aldımen Resey azamattarınan. Qauipti aurulardıñ qozdırğıştarın bakteriologiyalıq qaru retinde paydalanu tehnologiyası jasaluda. Onı adamdar, januarlar men ösimdikter arasındağı infekciyanıñ tuındauımen sıltauratu - amerikanıñ astırtın soğıs koncepciyasına säykes keledi»,- deydi.

Sol habarğa sarapşı bop qatısqan Duma deputatı, Reseydiñ bwrınğı bas därigeri Gennadiy Onişenko deytin adam bükil älemde AQŞ armiyasınıñ 22 mamandandırılğan ğılımi instituttarı jwmıs istep jatqanın aytıp, Solov'evtiñ sözin şoqtandıra tüsipti.

«Solardıñ biri Vladimir Volfoviçtiñ otanı (Jirinovskiy Qazaqstanda tuğan –red.) Qazaqstanda. Ötken jılı olar Alekseevkağa qarağanda anağwrlım ülken zerthananı tapsırdı. Onda barlıq virustarmen jäne qauiptiliktiñ eñ joğarı deñgeyimen jwmıs jasay alasız. Onıñ üstine äskeri mikrobiologtar jwmıs isteydi», -depti Onişenko.

Älgini esti sala, jañağı Solov'ev zerthanalardı joyıp jiberu kerek, degen wsınıs-pikirin aytadı.

«Al, onı joyıp jiberuge bola ma? Eger onıñ qayda ornalasqanın bilsek, ne isteu kerek? Jay ğana joyıp jiberu kerek», -deydi. Deydi de, Izraildiñ wlttıq qauipsizdik şaraların, onıñ işinde basqa elderdegi qauip-qaterdi küşpen joyatın täjiribesin mısal etedi.

Al Onişenko bombalau arqılı mäsele şeşilmeytinin alğa tartıp söyleydi.

«Siz zerthanalardı bombalağıñız kele me? Elestetip köriñizşi, Almatıda milliondağan adam bar. Ol jerde meniñ obağa qarsı institutım bolğan. Men onı Odaqtıñ Densaulıq saqtau ministrliginde jürip baqılap, basqarıp otırdım. Ol kezde qalanıñ şetinde twrdı. Qazir ol qalanıñ ortalığında. Onı joyıp jibere alasız ba?»,- deydi.

;fbclid=IwAR2dMJzgQkpgk6scJc0269T1kKtDdUolGSH6bsvWR8ZrtM2YPGtzGgVVK9Q

«Almatını bombalau kerek»

Älgi jerdegi äñgime osılay jalğasa beredi. Bağdarlamanıñ wzaqtığı 3 sağattan asadı eken. Ondağı barlıq dialogtı terip jazıp jatudıñ özi artıq.

Bıltırğı jılğı bwl äñgimenı bügin nege aytıp otırmız? Keşeli-beri äleumettik jelide jañağı Vladimir Solov'evtiñ «Almatını bombalau kerek» degen qiındı dialogı tarap jatır. Jay tarap jatqan joq, äleumettik jeli qoldanuşılarınıñ aşuın tuğızuda. Öziñiz oylap qarañızşı, böten bir memlekettiñ telearnasında, onda da federativti arnada öñkey sayasatkerler, tipti resmi bilik ökilderi jiılıp ap, özge bir memlekettiñ qalasındağı nısandı bombalau turalı äñgimelesedi. Aşıqtan-aşıq. Bwl neni bildiredi? Bwl jay ğana qoqan-loqı körsetu nemese qorqıtu emes. Bwl basınu! Kerek deseñiz, Täuelsizdikti moyındamau!

Jalpı, Solov'ev mwnday sala-qwlaş, qisıq-qıñır sözderin bwğan deyin de talay ret aytqan. Al Reseydiñ memlekettik arnası onı sayasi sıpayılıqqa salınıp jatpastan, jariyalap keldi.

«Maydannıñ Qazaqstanğa bağıttaluın kütemiz be?»

Esteriñizde bolsa, osıdan eki jıl bwrın ol Siriya mäselesine qatıstı Qazaqstannıñ beytarap wstanımın sınap söylegen. 

«Qazaqstannıñ mwnday tüsiniksiz poziciyası alğaş emes. Älde biz Qazaqstanmen aradağı baylanısta birnärse bilmeymiz be? Aramızdan qara mısıq ötti me? Nemese kelesi Maydannıñ Qazaqstanğa bağıttaluın kütemiz be?», - degen ol kezde.

Qazaqstan biliginiñ reakciyası

Oğan Qazaqstannıñ sol kezdegi Sırtqı ister ministriniñ orınbasarı Erjan Aşıqbaev mäymüñkelep jauap bergen. Nazarbaev pen Putinniñ arasındağı diplomatiyalıq qarım-qatınas jaqsı ekenin alğa tartıp, mwnday mäselede ministrlik resmi wstanımğa den qoyatının aytqan.

Bwdan soñ, Qazaqstannıñ qwzırlıları Reseylik «Rossiya-1», «Kul'tura», «NTV-mir» telearnalarınıñ habar taratuına tıyım salğan. Alayda, ol qarsılıqtıñ küşi bar-joğı jartı künge jetken. «Oybay, körermender narazılıq aytıp jatır», degen jalañ sıltaumen älgi arnalar qaytadan habar tarata bastadı.

Özgelerdiñ reakciyası

Salıstıru üşin aytayıq, ötken jıldıñ qañtar ayında Latviya aqparattıq keñisikti Kreml' propogandasınan qorğau üşin  Reseydiñ «Rossiya RTR» kanalına tıyım salu turalı şeşim qabıldağanın mälimdedi.

Sonday-aq, biıl aqpan ayında Ukraina  Reseydiñ tağı üş telearnasınıñ jwmısına şekteu qoydı.

Al bizde şe? Bizde Qazaqstannıñ Täuelsizdigin moyıntamaytın arna, «Qazaqstan da Maydannıñ kebin kigisi kele me?», dep doq körsetken arna, «AQŞ-tı jeñu üşin Almatını bombalau kerek», degen arna emin-erkin habar taratıp jatır. Ol tügili, jañağı Vladimir Solov'evtiñ Qazaqstanğa kelip-ketu qwqı da şektelmegen. Onıñ däleli, qaysıbir jılı Almatığa kep, aqıl satıp ketken. Sol kezde de Solvo'evtiñ swmpayılığı turalı aytuday-aq, aytıp, dabıl qaqqan edik. Sırtqı ister ministrligi estise de, estimegendey bolğan.

Solov'ev kim?

Solov'ev – orıs şovinizmniñ attanşısı, orıs sayasatınıñ şolaqbelsendisi. Kreml'diñ köseui, sayasi dezinformator, su jwqpas swqitı, su tañday sudıraqmeti. Qazaqstanda dini nasihatşı dep tanılğan twlğa. Kreml'diñ däldüriş diplomattarınıñ auzınan aytılğan şovinistik äm basqınşılıq piğıldağı pikirlerdi aşıq nasihattap jürgen adam.

QR SİM bastağan birqatar qwzırlı organdardıñ nazarına! Elimizdi tildep, şekarasına şüylikken, Täuelsiz Qazaqstannıñ territoriyalıq twtastığın bwzğısı keletin şovinist Vladimir Solov'evke tıyım joq pa?

Abai.kz

33 pikir