Düysenbi, 1 Mausım 2020
COVID-19 QAZAQSTANDA. Jwqtırğandar — 11308. Jazılğandar — 5587. Qaytıs bolğandar — 41
46 - söz 1334 15 pikir 30 Naurız, 2020 sağat 11:33

Jer Ananıñ köz jası

Bügingi tañda resmi jäne täuelsiz bwqaralıq aqparat qwraldarında, äleumettik jelilerde jaman indetke baylanıstı türli boljamdar men saraptamalardan köp närse joq. Soñğı kezde olardıñ bärin oqıp, taldap qorıtuğa şamamız da kelmey qaldı. Men virusolog ta, politolog ta, ğalım da emespin - qarapayım adammın. Cunamiday bolıp ketken aqparat tasqınınıñ qaysısı şındıq, qaysısı ötirik ekenin men de senderden artıq bilmeymin.

Äytkenmen, bes uaqıt namaz oqitın mwsılman balası retinde bir närseni jüregim sezedi. Bwl äldekimder aytıp jürgendey, Qıtaydıñ nemese AQŞ-tıñ oylap tapqan auruı emes, wlı Jaratuşınıñ adamzattı tekseru üşin jibergen – ülken sınağı.

Qazir seniñ jeke basıñ men otbasıñnıñ ömirin ataq-därejeñ de, baylığıñ da, mansabıñ da, tipti, patşalıq biligiñ de qwtqarıp qala almaydı. Däl bügin otbası dep atalatın şağın memleketiñdi auru men ajaldan aman alıp qalatın – ol seniñ aqıl-parasatıñ men tözimdiligiñ ğana.

Bayağıda äjem marqwm ünemi «Allanıñ qwdireti – äydik. Minez körsetse. asıp-tasığan bayıñnıñ da, däuleti tasığan patşañnıñ da ayağın bir etikke tığadı» degendi qwlağıma jii qwyatın. Osı sözdiñ şındıq ekenine meniñ közim bügin anıq jetti.

Jiırmasınşı ğasırdıñ aşarşılıq, jappay repressiya, qandı-qırğın soğıs siyaqtı näubattarı älemdi sabasına tüsirip, biraz uaqıt täubasına keltirgendey bolğan-tın. Ökinişke qaray, soñğı elu jılda biz qaytadan sonıñ bärin wmıtıp, añğa, tipti añnan da beter maqwlıqqa aynala bastappız.
Alpauıt memleketterdiñ imperiyalıq egoizmi künnen-künge küşeyip, özderinen basqalardı el sanaudı qoydı. Äsirese, soñğı jiırma-otız jılda Ejen Ioneskanıñ «Müyiztwmsıq» p'easasındağıday küştilerdiñ aytqanı ğana zañ, küştilerdiñ aqılı ğana aqıl, küştilerdiñ mädenieti ğana mädeniet, küştilerdiñ ornatqan tärtibi ğana tärtip degen twrğıdağı jabayı bwyrıqqa älem könip, eti ölip ketip, moyınsınğanday da bolğan. Endi mine qwdireti küşti Qwday minez körsetip, osı payımımızdıñ qanşalıqtı dwrıs, qanşalıqtı bwrıs ekenin saralatıp, irip-şiregen bayıñdı da, siñiri şıqqan kedeyiñdi de üyine qamap, oylandırıp qoydı. Biz Qwdaydan küşti emes ekenbiz.

Iya, wlı Jaratuşı bükil adamzattı äp-sätte sabasına tüsirdi. Äytpese, biz Jer-Anamızdıñ bar ekenin esimizden şığarıp, onıñ qoynındağı qazba-baylıqtardı qwnığa tonaudan basqanı wmıtıp ketip edik. Tabiğattı qorğau, ekologiya, salasında jürgen mamandar bizdiñ közimizge bosqa nan jep jürgen beyşaralarday bolıp körinetin. Janımızdıñ rahatı, dünieniñ qızığı men baylıqtan basqağa köñil bölmey ketken toğışarlığımız bizdi bir kwnde osınday hälge tüsirdi. Erteñimizdiñ ne boların, bir Qwdaydan basqa eşkim bilmeydi.

Jwrttıñ bäri jappay jamandap jatqan qıtaydı meniñ de wnatıp twrğanım şamalı. Biraq, bärin tek solarğa jauıp, özimiz süttey aq, sudan taza periştedey boluğa tırısıp, aqtalmay-aq qoyayıqşı. Bwl jaman indettiñ bizdiñ jerimizge keluine bärimiz de kinälımız. Qıtaydan bolmasa, ol planetamızğa basqa bir jaqtan kelui de ıqtimal-twğın. Öytkeni, Tabiğat-Ana degen qasietti wğımnıñ biz üşin män-mağınası joq bos sözge aynalıp ketkenine qay zaman.

Soñğı jıldarı qanşama kiik, balıq tağı da basqa jan-januarlardıñ qırılıp qalğanın esiñizge tüsirip köriñizşi. Biz oğan qattı män berdik pe, sebebin izdep kördik pe? Joq. Jer-Anamızdıñ köz jası jibermeydi, tabiğatqa jasap jatqan qiyanatımızdı Alla aldımızğa keltiredi degen oy köñilimizdi mazalamadı. Endi, mine sonıñ zardabın tartıp jatırmız.

Amangeldi Keñşilikwlınıñ äleumettik jelidegi jazbası

Abai.kz

15 pikir