Särsenbi, 27 Mamır 2020
COVID-19 QAZAQSTANDA. Jwqtırğandar — 8969. Jazılğandar — 4613. Qaytıs bolğandar — 37
Alañ 681 5 pikir 25 Naurız, 2020 sağat 11:39

Ashat Aymağambetovtiñ ata-analarğa jazğan hatı

Qwrmetti ata-analar!

Balalarımızdıñ köktemgi kanikulı 16 naurızda bastaldı. Qazirgi kezde ata-analardıñ basım böligi üyde jäne balalarğa 21 künge sozılatın demalıstı qızıqtı äri paydalı ötkizuge kömektese aladı.

Meniñ wlım – törtinşi sınıp oquşısı. Özi kitap oqığandı jaqsı köredi. Mısalı, oqu jılı bastalğalı «Robinzon Kruzo», «Tom Soyerdiñ bastan keşken oqiğaları», «Meniñ atım – Qoja», «Köşpendiler» trilogiyası kitaptarın birge oqıp şıqtıq. Süyikti kitabımız – «Kapitan Granttıñ balaları». Sonday-aq ejelgi grek jäne mısır mifteri men añızdarın qızığa oqıp şıqtıq.

Ata-analardıñ balalardı kitap oquğa baulığanı öte mañızdı. Eger bala Sizdiñ kitap oqıp otırğanıñızdı jii bayqaytın bolsa, özi de qolına kitap alatın boladı.

Mağan bala kezimde ğılımi fantastika janrında jazılğan tuındılar wnaytın. Ayzek Azimovtıñ, Rey Bredberidiñ, ağayındı Strugackiylerdiñ, Klifford Saymaktıñ, Robert Haynlaynnıñ eñbekteri qiyalımdı oyatatın. Osı avtorlardıñ tuındıların oqıp, küni boyı hikayalardıñ mazmwnın oylap jüruşi edim.

Osılayşa, eseye kele, ğılımi ädebietterge degen qızığuşılığım arttı.  Sondıqtan, balalardı osı janrğa baulu öte mañızdı dep oylaymın. Bala künde oqığan süyikti tuındılarıñızdı balalarıñızğa wsınıp köriñizder. Eñ bastısı, bala üyde kitaptı neğwrlım köp oqitın bolsa, mektep bağdarlamasın soğwrlım jeñil meñgeretinin wmıtpañızdar.

Kitap oqudan bölek, otbasımen tanımdıq videolardı qarauğa boladı. Mısalı, videosabaqtardı, treningter men ğılımi täjiribelerdi, TED-konferenciyaların jäne t.b. Bizdiñ ministrliktiñ saytınan bilim beru resurstarınıñ tizimin taba alasızdar. Aytpaqşı, qazirgi kezeñde bilim beruge bağıttalğan sayttardı paydalanu barısında trafik eseptelmeydi, yağni tegin boladı. Ol üşin biz internet provayderlerimen kelisim ornattıq. Bwl qosımşa bilim beru ortalıqtarı, kurstar men sekciyalar jwmısın toqtatqan kezeñde öte ıñğaylı bolmaq. Sonday-aq, bwl – balalardı onlayn-formatta bilim aluğa ikemdeuge jaqsı mümkindik, bolaşaqta paydası tietini de sözsiz.

Ata-analardıñ basım böligi kanikul ayaqtalğan soñ, oqu procesi qalay wyımdastırılatının uayımdauda ekenin bilemin. Qazirgi uaqıtta oqudı qaşıqtan jürgizuge kömektesetin aqparattıq jüyelerdi dayındap, testileudemiz. Keybir sabaqtardı telearnalar arqılı ötkizuge boladı. Bwl format bizdiñ oquşılar men wstazdar üşin üyrenşikti emes, sondıqtan pedagogterdiñ jwmısına tüsinistikpen jäne qwrmetpen qaraularıñızdı swraymın. Olar oquşıların sağındı jäne mektepke keler sätin asığa kütude.

Bwl – ministrdiñ emes, jağdayğa baylanıstı balalarımızda kenetten payda bolğan bos uaqıttı tiimdi ötkizudi jäne osı kezeñ bizdi balalarımızben jaqındastıra tüsudi qalaytın äkeniñ wsınıstarı ğana. Balapandarımızdıñ baqıttı boluı biz ben Sizge tikeley baylanıstı.
Öziñiz ben jaqındarıñız aman bolğay!

İzgi nietpen,
Ashat Aymağambetov.

Abai.kz

5 pikir