Beysenbi, 4 Mausım 2020
COVID-19 QAZAQSTANDA. Jwqtırğandar — 11796. Jazılğandar — 6240. Qaytıs bolğandar — 48
Sañlaq 1946 6 pikir 24 Naurız, 2020 sağat 19:01

Eldegi jağdayğa bizdiñ «millioner» futbolşılardıñ reakciyası qanday?

Koronavirus derti twtas dünieni tabanınan tik twrğızdı. Älemdi alañdatqan atı jaman auıru ökinşke oray bizdiñ eldi de aynalıp ötken joq. Elde tötenşe jağday jariyalanıp, Almatı men Nwr-Swltan karantinge jabıldı.

Tötenşe jağday kezinde barlıq merekelik-sporttıq şaralar uaqıtşa toqtatıldı. Bizdiñ elde ğana emes, bükil älemde sporttıq jarıstar keyinge şegerildi. Älemniñ är tükpirinde ötip jatatın mıñdağan turnirler toqtap, milliondağan sportşınıñ qolı bosap, üylerinde otır.

Jay otırğan joq, dünieni dürliktirgen dertpen hal-qadirinşe küresip jatır. Biri adamzattı tazalıq saqtauğa şaqırıp, älemdik çellendj wsınsa, endi biri qayırımdılıq qorın wyımdastırıp, auırumen küresuge milliondap aqşa bölude.

Bir mısal retinde, germaniyalıq «Bavariya» futbol klubınıñ oyınşıları Yosua Kimmih pen Leon Goreckanıñ koronavirustan zardap şekkenderge kömek körsetu üşin qarjı jinap jatqanın aytsaq boladı. Qos futbolşı özderi wyımdastırğan We We Corona qorına ärqaysısı 500 mıñ eurodan audardı. Olarğa birden «Mançester Siti» oyınşısı Leroy Sane qosıldı, ol da däl osı soma mölşerinde aqşa berdi.

«Bavariya» oyınşıları koronaviruspen küreske qarjı böldi

Yosua Kimmih pen Leon Gorecka

Däl osı komandada dop tebetin şabuılşı Robert Levandovski de aurudan zardap şekkenderge kömektesuge bilek sıbana kiristi. Polyak futbolşısı äyelimen birge otbasılıq byudjetten medicinalıq tehnika satıp aluğa 1 million euro böldi.

Aladop quğan azamattardıñ adamgerşiligi jaylı aytılar äñgime bwl ğana emes. Jılına birneşe millionnan bastap, 30-40 mln. euroğa deyin jalaqı alatın europalıq futbolşılar osınau qısıltayañ kezde jalaqısın qısqartuğa da qarsı emes. Atap aytqanda Lionel' Messi bastağan «Barselona» futbolşıları klub basşıları wsınğan karantin kezinde jalaqını azaytu wsınısına kelisim berdi.

Bwl jerde kataloniyalıq klubtıñ prezidenti Hosep Bartomeudiñ oyınşılarmen ortaq til tabısa bilgenin ayta ketu kerek. Bartomeu mırza futbolşılarmen arnayı kezdesip, komandamen ortaq til tabısa bildi. Matçtar toqtap, klubtıñ kirisi azayğan kezde, şığındı qısqartu kerek ekenin futbolşılarğa tüsindire bildi.

«Barselona» prezidenti Hosep Bartomeu

Endi öz elimizdegi jağdayğa oralayıq. Bizdiñ elde de aladop quğandardıñ alatın aylığı az emes. Europadağıday 10-20 mln. bolmasa da, bir jılda birer mln. euronı qaltağa basatın «qomağaylar» bizde de bar (ärine, mwnday jalaqı legionerlerge tölenedi). Halqı qoñır qalta kün keşetin Qazaqstan şeteldik sportşılarğa jalaqı töleude älemde üzdik 20-30 eldiñ qatarında. Onıñ üstine bwl qarjınıñ bäri memlekettik byudjetten bölinedi.

Biz bwğan deyin de byudjet qarjısınıñ büyirin sorıp otırğan käsipqoy sport klubtarı jaylı jazdıq. Atap aytqanda, futboldan prem'er-ligada baq sınaytın 12 komandağa el byudjetinen jıl sayın 30-40 milliard teñge bölinetini, 2018 jılı däl osı futbolşılarğa jalaqı töleuge 80 mln. euro (33,5 mlrd. teñge) jwmsalğanı, elordalıq «Barıs» hokkey klubına 2019 jılı 3,6 mlrd. teñge bölingeni jaylı...

Endeşe el byudjetiniñ maylı jiligin müjip otırğan qazaq futbolınıñ karantin kezindegi küyi qanday? Ärine, tötenşe jağday jariyalanğalı futbol turniri toqtatılğan. Komandalar jekeley jattığuğa köşti.

Eldegi tötenşe jağdayğa bizdiñ «millioner» futbolşılardıñ reakciyası qanday? Europadağıday qor qwrıp, qarjı jinau, medicinalıq tehnika satıp aluğa aqşa bölu degen sekildi adamgerşiliktiñ ülgisin bizdiñ futbolşılardan kütpey-aq qoyıñız. Qaltasınan qarjı şığarğandı qoyıp, jalaqını qısqartuğa qarsı bolıp, şu şığarıp jatır.

Mäselen, Prem'er ligada baq sınaytın «Ertis» pen «Kaspiy» futbol klubı oyınşılar men qızmetkerlerge tötenşe jağday kezde jalaqı eldegi eñ tömengi eseptik körsetkişke teñestiriletinin habarlağan. Bwl habardı esti sala ıñırşağın bauırına ala tulağan futbolşılar joğarı-tömen arız jaza bastadı.

«Ertis» futbol klubınıñ jattıqtıruşıları, äkimşilik qwramı jäne klubtıñ futbolşıları Pavlodar oblısınıñ äkimi Äbilqayır Sqaqovqa resmi hat joldap, klub basşılığınıñ jalaqını tömendetu şeşimine üzildi-kesildi qarsı ekenin mälimdedi.

«Ertis» oyınşıları äkimge aşıq hat jazdı

Al «Qızıl-Jar» futbol klubında dop tebetin Litva qwramasınıñ qorğauşısı Vitautas Andryuşkyaviçyus çempionat toqtağan kezde de jalaqı tölenui mindetti dep esepteydi.

«Sportpen aynalısıp jürgen adamdar qazirgidey kezde sporttıq babın qalay saqtaudı biledi. Keyde mwnday demalıstar sportşınıñ jaraqatınan ayığuına paydasın tigizedi.

Matçtar ötu-ötpeuine qaramastan, klub bizdiñ Qazaqstanda jürgen ärbir künimizge jalaqı töleuge mindetti».

Bizdiñ elde öner körsetetin şeteldik futbolşınıñ tötenşe jağday kezindegi wstanımı osınday eken. Legionerlerge memlekettik byudjettiñ milliondarın sanap beruden şarşamaytın şendilerdiñ nazarına wsınıp otırımız mwnı.

Vitautas Andryuşkyaviçyus

Ädil bolu üşin «Barselona» futbolşılarımen «Ertis» pen «Kaspiy» oyınşılarınıñ tabısın salıstıruğa kelmeytinin ayta keteyik. Ispaniyalıq komandanıñ oyınşıları bizdiñ elmen salıstırğanda äldeqayda mol jalaqı aladı. Onıñ belgili mölşerin qısqartqanımen, bäribir täp-täuir tabıs tabarı sözsiz. Al bizdiñ klubtar birden eñ tömengi eseptik körsetkiş (42 mıñ tg.) boyınşa tölegeli otır. Eldegi ortaşa aylıq mölşerinen 100 ese joğarı jalaqı alıp üyrengen futbolşılar mwnday az aqşağa ärine qarsı boladı.

Tağı bir mäsele, bizdiñ eldegi basşı qızmetkerlerdiñ özimbilermendigi, KSRO kezindegidey basa bilep, şeşim şığaruı bolıp otır. Biz joğarıda «Barselona» prezidenti Hosep Bartomeudiñ oyınşılarmen arnayı kezdesu ötkizip, kelisimge kelgenin erekşelep ayttıq. Bizdiñ basşılarğa osı qadam jetisken joq. Mümkin biliksizdikten, mümkin jauapkersizdikten bolar. futbolşılarmen eş kelispey, sırttay şeşim şığarğan.

Futbolşılar jazğan aşıq hattar äleumettik jelide jariyalandı. Bwl berisi qazaq futbolın älemdik qauımdastıqtıñ aldında külkige qaldırıp, futbol älemindegi abıroyınan ayırdı. Ärisin aytsaq, mwnday arız-şağımdar halıqaralıq qauımdastıqqa jetse, klubqa ayıppwl salu, Eurokuboktardan şettetu jäne çempionattağı wpayın kemitu sındı jaza qoldanıladı (Qazaqstan futbolında mwnday jağday birneşe ret qaytalanğan).

Basşılar aqıldı bolıp, sätti kelissöz jürgize bilse bäri basqaşa bolar ma edi?! Bizdiñ futbolşılar da şeteldegidey jalaqısınıñ bir böliginen bas tartıp, tipti Europadağıday viruspen küresuge qarjı böler me edi? Bwlay bolmağan künniñ özinde «jau jağadan alğanda, etekten tartar böri» bolıp, arız jazbas edi ğoy...

Quanış Qappas

Abai.kz

6 pikir