Senbi, 11 Şilde 2020
COVID-19 QAZAQSTANDA. Jwqtırğandar — 56455. Jazılğandar — 32500. Qaytıs bolğandar — 264
Sañlaq 1621 2 pikir 10 Naurız, 2020 sağat 13:35

Eleusinov eks älem çempionımen jwdırıqtasadı

Qazaqstandıq käsipqoy boksşı Daniyar Eleusinov (9-0, 5 KO) kelesi jekpe-jegin bwrınğı älem çempionına qarsı ötkizedi. 

Bwl turalı Matchroom Boxing promouterlik kompaniyası mälimdedi.

Qazaqstandıq Olimpiada çempionı 17 säuir küni Okson-Hillde (AQŞ, Merilend ştatı) ötetin boks keşinde öner körsetedi. Qarsılası - Namibiya eliniñ ökili Djulius Indongo (23-2, 12 KO). 37 jastağı bwl boksşı birinşi jartılay orta salmaqta üş nwsqa boyınşa (IBF, IBO jäne WBA (Super)) älem çempionı bolğan.

Djulius Indongo

Djulius – asa täjiribeli boksşı. Ataqtı boxrec reytingisinde öz salmağında 33-şi orında twr (Eleusinov 77-şi satıda). 2008 jılı ötken Bekin Olimpiadasına qatısqan. 2009 jılı käsipqoy boksqa bet bwrğan.

2016 jılğa deyin Djulius öz otanında 20 jekpe-jek ötkizip, eşqaysısında jeñilgen joq. 2016 jıldıñ kökteminde Indongo Reseyde eki twjırım boyınşa älem çempionı (IBO, IBF) Eduard Troyanovskiydi birinşi raundta nokautqa jiberip, sensaciya jasadı. Osıdan keyin boks älemi Indongonı tanıdı.

2017 jılı afrikalıq boksşı Wlıbritaniyada Riki Bernsti jeñip, tağı bir mañızdı belbeu - WBA twjırımı boyınşa çempiondıq ataqtı jeñip aldı.

Indongo tipti sol jıldıñ özinde absolyutti älem çempionı atanu mümkindigine ie bolğan. Biraq ekinşi sensaciya orın alğan joq. 2017 jılı 19 tamızda amerikalıq Terens Kroufordtan (36-0, 27 KO) jeñilip, çempiondıq belbeulerdi biriktire alğan joq. Bwl nambiyalıq boksşınıñ mansabındağı alğaşqı jeñilisi bolatın.

Osodan keyin Indongo WBC uaqıtşa çempiondığı üşin ötken jekpe-jekte amerikalıq Redjis Progreysten jeñildi.

2019 jılı Djulius tek bir ğana jekpe-jekti ötkizdi. Bwl jolı amerikalıq Karltavius Djons Djonsondı nokautpen jeñgen. Sodan beri ol şarşı alañğa şıqqan joq.

Al Daniyar Eleusinov soñğı jekpe-jegin ötken jıldıñ jeltoqsan ayında ötkizdi. Ol kezde amerikalıq Alan Sançesti (20-5-1, 10 KO) tehnikalıq nokautpen jeñgen bolatın.

Quanış Qappas

Abai.kz

2 pikir