Beysenbi, 2 Säuir 2020
COVID-19 QAZAQSTANDA. Jwqtırğandar — 402. Jazılğandar — 27. Qaytıs bolğandar — 3
592 13 pikir 27 Aqpan, 2020 sağat 12:53

Zelenskiy «Qırım okkupaciyasına qarsılıq künin» belgiledi

Ukraina prezidenti "Reseydiñ Qırımdı okkupaciyalauına qarsılıq künin" tağayındau turalı jarlıqqa qol qoydı. Bwl kün jıl sayın 26 aqpanda atap ötiledi.

Däl osı küni 2014 jılı Simferopol'de qırım tatarlarınıñ mitingi ötti. Olar tübekti anneksiyalaudıñ bastaluına qarsı şıqtı. Qırımnıñ Reseyge qosıluın qoldaytındar olarğa qarsı boldı. Qaqtığıs saldarınan eki adam qaza tauıp, birneşe adam jaralandı. Kelesi küni jergilikti parlament Reseyge qosılu turalı referendum ötetinin jariyaladı.

Kreml' ökili Dmitriy Peskov Ukraina prezidenti Vladimir Zelenskiy jarlığı "qırımdıqtardıñ Reseyge qosılu turalı şeşiminiñ şınayı jağdayı men sebebin sipattamaydı" dep mälimdedi.

Bwnıñ aldında, 26 aqpanda, Kievte Age of Crimea forumında söylegen Zelenskiy anneksiyalanğan Qırım mäselesi kün tärtibinen tüspeytinin, "onı Donbastağı beybitşilikke" ayırbastamaytının mälimdegen.

Qırım tatarlarınıñ jetekşisi Mwstafa Jemilev tübektegi jergilikti twrğındardıñ qwqıqtarı bwzılıp jatqanın ayttı. Ol taraptardı halıqaralıq zañdardı saqtauğa şaqırdı. Jemilevtiñ pikirinşe, Resey Qırımnan äskerin şığarıp, şığındı tölep, agressiyağa kinälilerdi jazalauı tiis.

Resey Qırımdı 2014 jılı ötken referendum qorıtındısı negizinde anneksiyaladı. Referendum ötkizu Ukraina zañdarına qayşı keldi. Qırım anneksiyalanğan soñ AQŞ pen Euroodaq Reseyge qatıstı sankciya engizdi. Mäskeu tübektiñ Reseyge qosıluın "tarihi ädilet üstemdigi" dep esepteydi.

Abai.kz

13 pikir