Düysenbi, 10 Tamız 2020
COVID-19 QAZAQSTANDA. Jwqtırğandar — 99442. Jazılğandar — 72523. Qaytıs bolğandar — 1058
Araşa 3176 12 pikir 30 Jeltoqsan, 2019 sağat 16:39

Wstazdardıñ jaqsı isin joqqa şığaru kimge kerek?

Videodan skrinşot

Jaqında ğana Senatta «Pedagog märtebesi turalı» zañ jobası maqwldanıp, mwğalim qwqığın zañ boyınşa qorğaytınımız aytıldı. Biraq wstazdar moyınına äkimşilik tarapınan ğana emes, halıq tarapınan da artılğan mıñ-san mindet juıq arada jeñildey qoymaytın sekildi.

Mwğalimderdi äkimşilik ärtürli jwmıstarğa jegip äurelese, qarapayım halıq wstazdardıñ är qadamın añdıp, qısımğa alıp otır. Sodan barıp bilim salasındağı kez-kelgen dau-damayğa tek mwğalimder ğana kinäli bolatın jağday qalıptastı. Mwğalimder balanı oqıtu kerek, balanıñ amandığana kepildik etui kerek, mıñ türli kündelik-jurnaldar toltıru kerek, onıñ sırtında biliktiñ ügitşisi bolu mindeti tağı bar. Söyte twra, osınşa jwmıs atqarıp jürip tapqan jalaqılarına mereke-meyramda kişigirim otırıs jasasa da kinäli boladı...

Biıl Almatı qalası Jetisu audanı oqu bölimine qaraytın mektepter men balabaqşalardıñ direktorları jaña jıldı toylaudan bas tartıp, ünemdelgen qarjığa otbasında qiınşılığı bar balalarğa kömek jasadı. Atalğan bilim böliminiñ qwramındağı 21 mektep pen 22 balabaqşanıñ basşıları bwl igilikti isterin respublikadağı özge de qızmetkerlerdiñ qoldauın swrap, videoündeu jariyalaydı. Nätijesinde bwl çellendj ülken qoldau tauıp, alqauğa bölenedi.

Erekşe ayta keterligi, bwl qayırımdılıq şarasına tek direktorlar ğana qatısadı. Al qarapayım mwğalimder men tärbieşilerdiñ bwğan qatısı joq. Olar mereke toylay ma, qayırımdılıq jasay ma - öz erikteri.

Söytip, videoündeu jariyalanadı, onı Qazaqstan telearnası efirde körsetedi. Keyin Almatı qalası, Jetisu audanı bilim bölimine qarastı № 143 mekteptiñ direktorı Saurıqova mektep wjımımen birge jaña jıldıq otırısqa qatısadı. Onda da wjımdı qwttıqtap qana qaytadı. Saurıqova hanım - qayırımdılıq şarasına qatısıp, belgilengen qarjısın qosqan adam. Al odan keyin onıñ öz wjımın qwttıqtap, merekelik keşke baruğa äbden qwqığı bar.

Biraq, osını äldekimder äleumettik jelide jariyalap, "bwlar közboyauşılıq jasadı. "Merekeni toylamaymız" dep alıp, sözderinde twrmadı. Qarjını toylauğa şaştı" degendey söz taratıp, şu şığarğan. İstiñ aq-qarasımen tanıspağan köpşilik jel sözge erip, aqedil wstazdardıñ jaqsı isin joqqa şığarıp, eş negizsiz sınap-minegen.

Bwl jerde mektep basşıları jaña jıldı toylaudan öz erikterimen bas tarttı, qayırımdılıqqa jwmsalğan qarjını öz jalaqılarınan şığardı. Öte igilikti, maqtauğa twralıq is. Al özge wstazdarğa mwnday şekteu joq. Qarapayım wstazdar men tärbieşiler tuıstarımen, wjımmen merekeni atap ötse, oğan eşkim qoy demeydi. Tipti merekeden bas tartıp, qayırımdılıq jasauğa wstazdar qauımı mindetti de emes. Tınbay jwmıs istep, tauıp otırğan jalaqısın qayda jwmsasa da özderi biledi. Soğan qaramastan buınsız jerden pışaq wrıp, wstazdardı kinälau adamşılıqqa jatpaytın äreket ekenin aytqımız keledi.

Biz istiñ män-jayın bilu üşin atalğan Bilim böliminiñ basşısı Saltanat Amangeldiqızına habarlastıq.

Saltanat Amangeldiqızı, Almatı qalası, Jetisu audanı Bilim böliminiñ basşısı:

- Bizdiñ Bilim bölimine 21 mektep pen 22 balabaqşa qaraydı. Biz aqıldasıp, öz audanımızdağı mektep basşıları men balabaqşa meñgeruşileri merekelik otırıstan bas tarttıq. Bwnday merekelik bas qosuğa öz qaltamızdan aqşa şığaratınımız anıq. Sol otırıstı wyımdastırmay, aqşamızdı jinap, qiınşılığı bar balalarğa kömektesu qajet dep şeştik. Bwl şeşim tek direktorlarğa ğana baylanıstı. Audanımızdağı eki mıñnan asa mwğalimdi merekeni toylamay, qayırımdılıq jasañdar dep mäjbürley almaymız. Ol - wstazdardıñ öz erkindegi şarua.

Söytip, 43 mekemeniñ basşısı birigip, demeuşilerdi qosa eseptegende jeti jüz mıñnan asa qarjı jinap, 22 balanıñ otbasına kömektestik. Keyin videoündeu jasap, elimizdiñ är tükpirindegi äriptesterimizdi bizdiñ qadamdı qoldauğa şaqırdıq. Biz joldağan çellendj keñ taralıp ketti.

Al şu şağarğan jağday mınau: biz qayırımdılıq jasadıq, çellendj joldandı. Keyin mağan № 143 mektep direktorınıñ mindetin atqaruşı Saurıqova Ğaziza kelip, mektep wjımı jaña jıldıq bas qosu wyımdastırıp jatqanın aytıp, soğan barıp, qwttıqap qaytuğa rwqsat swradı. Al men wstazdardı merekelik bas qosudan tiyuğa qaqım joq ekenin, mektep wjımınıñ otırısın şektemeytinimdi ayttım.

Somen Ğaziza hanım wjımdastarınıñ bas qosuına barıp, qwttıqtaydı. Osını bireuler videoğa jazıp alıp, äleumettik jelide taratıp jatır. Birinşiden, biz jalpı mwğalimderdi merekelik keşten şektegen joqpız. Tek direktorlar men meñgeruşiler ğana jaña jıldıq keşten bas tarttı. Ekinşiden, № 143 mektep direktorınıñ mindetin atqaruşı Saurıqova Ğaziza qayırımdılıq şarasına qatıstı, qarjısın qostı. Keyin aldın-ala belgilengen wjımdastar bas qosuına barıp şıqtı. Negizi osı otırısqa barmay-aq ta qoyu kerek edi. Biraq, biz, videoündeu jariyalağan 43 basşı, bas qosıp otırsaq bir jön. Bwl jerde mülde bölek äñgime. Otırıs jasağan biz emes, bir mekteptiñ wjımı ğana...

Onıñ üstine, biz qayırımdılıqtı öz qaltamızdan şığarğan aqşağa jasadıq. Memlekettik qazınadan aqşa alıp otırğan joqpız. Bwnday qayırımdılıq şaraların üş jıldan beri jasap jürmiz. Eşkimge aytıp, jariyalap ta jatqan joq edik. Endi osı igi isterimizdiñ bärin joqqa şığarıp, negizsiz kinälap otır.

P.S. Rasında, bwl rette mektep direktorları men balabaqşa meñgeruşileriniñ qayırımdılıqqa qadam basqan qareketin joqqa şığarıp, Bilim böliminiñ igilikti isin manswqtau nege kerek boldı? Sonda älemjelide ärkim olarğa älimjettik jasay berui kerek pe? Wstazdardı wltaraq etudi qaşan qoyamız? Bizdiñ portal bwl taqırıptı aldağı künderi tağı da qauzaytın boladı.

Quanış Qappas

Abai.kz

12 pikir