2019 جىلدىڭ 25-ءىنشى قازانى. قازاقسستاندىق جانە شەتەلدىك اقپارات اگەنتتىكتەرى: «مىڭداعان اڭدار قىرىلدى: ۇقك كيىك ءمۇيىزىن كونتراباندالىق جولمەن ساتپاق بولعان ۇقت مۇشەلەرىن قولعا ءتۇسىردى» دەگەن حاباردى جارىسا جاريالادى. سەبەبى بۇل اقپاراتتى تاراتقان ۇقك-ءنىڭ قىزمەتكەرلەرى الماتى مەن شىمكەنتتە، اتىراۋ، اقتوبە، باتىس قازاقستان، قىزىلوردا، تۇركىستان وبلىستارىنىڭ اۋماعىندا كيىك اتۋمەن اينالىسقان ۇيىمداسقان قىلمىستىق توپتىڭ 18 مۇشەسىن ۇستاعان.

جەدەل تەرگەۋ توبى قىلمىسكەرلەردى ءتىنتۋ كەزىندە 1 توننا 118 كەلى (3 مىڭنان استام تىرشىلىك يەسى) كيىك ءمۇيىزىن تاركىلەيدى. مامانداردىڭ ەسەپتەۋىنشە، ۇقت-تىڭ زاڭسىز قىزمەتىنەن مەملەكەتكە 5,6 ملرد. تەڭگە (!) كولەمىندە شىعىن كەلگەن. قىلمىستىق توپتىڭ 18 مۇشەسىنىڭ 9-ى سوتتىڭ سانكتسياسى ارقىلى قاماۋعا الىنعان. ۇقك-ءنىڭ مالىمەتى بويىنشا، قىلمىستىق توپ ۇزاق ۋاقىت بويى ارەكەت ەتىپتى. جازىقسىز جانۋارلاردى قويشا قىرعان جاۋىزدار اتىپ العان كيىكتەردىڭ ءمۇيىزىن ساتۋمەن، كونتراباندالىق جولمەن قىتايعا جونەلتۋمەن اينالىسقان.