بەلارۋس پرەزيدەنتى الەكساندر لۋكاشەنكو قازاقستانعا كەلەدى. كورشى ەلدىڭ كوشباسشىسى 24-25 قازان كۇندەرى ەلىمىزدە رەسمي ساپاردا بولادى.

بۇل ساپارىندا بەلارۋس باسشىسى قازاقستان پرەزيدەنتى قاسىم-جومارت توقاەۆپەن كەزدەسەدى. قوس پرەزيدەنت ەكى ەل اراسىنداعى ساۋدا-ەكونوميكالىق قارىم-قاتىناستاردى تالقىلاپ، قاجەتتى كەلىسىمشارتتارعا قول قويماق.

نۇر-سۇلتاندا وتەتىن كەزدەسۋدە توقاەۆ پەن لۋكاشەنكو ونەركاسىپتىك كووپەراتسيانى كەڭەيتۋ، ەكونوميكانىڭ ءتۇرلى سالالارىندا، سونىڭ ىشىندە اۋىل شارۋاشىلىعىندا، كولىك پەن لوگيستيكادا، مۇناي-حيميا كەشەنىندە، جوعارى تەحنولوگيالار سالاسىندا ىنتىماقتاستىقتى ارتتىرۋ، ينتەگراتسيالىق بىرلەستىكتەر اياسىنداعى جانە حالىقارالىق الاڭدارداعى ىنتىماقتاستىقتى، وڭىرلىك جانە الەمدىك كۇن ءتارتىبىن تالقىلايدى.

كەلىسسوزدەر قورىتىندىسى بويىنشا ەكى جاقتى كەلىسىمدەر پاكەتىنە قول قويىلادى. سول كۇندەرى نۇر-سۇلتاندا قازاقستان - بەلارۋس بيزنەس-فورۋمى وتەدى. قازاقستان استاناسىندا بەلارۋس ديپلوماتيالىق ميسسياسى عيماراتتارىنىڭ جاڭا كەشەنىن اشۋ جوسپارلانعان.

Abai.kz