سەنبى, 16 قاراشا 2019
956 8 پىكىر 16 قازان, 2019 ساعات 16:21

"قىتايدان قاشقان" ەكى قازاقتىڭ ۇستىنەن سوتقا دەيىنگى تەرگەۋ باستالدى

ۇقك شەكارا قىزمەتى "قازاق-قىتاي شەكاراسىن كەسىپ ءوتىپ، قازاقستانعا كەلگەن" شىڭجاڭ قازاقتارى مۇراگەر ءالىمۇلى مەن قاستەر مۇساحانۇلىنىڭ ۇستىنەن سوتقا دەيىن تەرگەۋ باستادى. بۇل تۋرالى ۇقك شەكارا قىزمەتىنىڭ ءباسپاسوز قىزمەتى حابارلادى.

شەكارا قىزمەتىنىڭ حابارلاۋىنشا، ءالىمۇلى مەن مۇساحانۇلىنىڭ ۇستىنەن سوتقا دەيىنگى تەرگەۋ قىلمىستىق كودەكستىڭ 392-بابى 1 بولىگى، ياعني "قازاقستان شەكاراسىن زاڭسىز كەسىپ ءوتۋ" بابى بويىنشا ءجۇرىپ جاتىر.

ۇقك مۇساحانۇلى جىلقى ۇرلىعىنا بايلانىستى قىلمىستىق جاۋاپكەرشىلىكتەن قاشىپ، 2006 جىلى 21 ماۋسىمدا قازاق-قىتاي شەكاراسىن بۇزعانىن مالىمدەدى. "سول كەزدە ول قىتايعا قايتارىلعان" دەپ مالىمدەدى شەكارا قىزمەتىنىڭ ءباسپاسوز قىزمەتى.

شەكارا قىزمەتى ءالىمۇلى مەن مۇساحانۇلىنا قاتىستى سوتقا دەيىنگى تەرگەۋ حالىقارالىق قۇقىقتار مەن قازاقستان زاڭىنا ساي ءجۇرىپ جاتقانىن حابارلادى.

30 جاستاعى قاستەر مۇساحانۇلى مەن 25 جاستاعى مۇراگەر ءالىمۇلى ءدوربىلجىڭ ايماعىنان جولعا شىعىپ، 1 قازاندا قىتاي شەكاراسىنان وتكەندەرىن ايتقان. وزدەرىنىڭ ايتۋىنا قاراعاندا، قازاق-قىتاي شەكاراسى ارالىعىنداعى بەيتاراپ اۋماقتا بەس كۇندەي ءجۇرىپ، قازاننىڭ 6-سى كۇنى شىعىس قازاقسان وبلىسىنىڭ زايسان، شىلىكتى، ماڭىراق اۋىلدارىنىڭ تۇسىنان قازاقستانعا وتكەن. كەيىن جولاي تاكسي جالداپ، 10 قازاندا قازاندا الماتىعا "كەلگەن".

14 قازاندا الماتىداعى ادام قۇقىعىن قورعاۋ بيۋروسىندا وتكەن ءباسپاسوز ءماسليحاتىندا قاستەر مۇساحانۇلى شىڭجاڭداعى لاگەردە قاماۋدا وتىرىپ شىققانىن، ال مۇراگەر ءالىمۇلى سول جاقتا قىسىم كورگەنىن ايتقان. ءباسپاسوز ءماسليحاتىنان كەيىن ولاردى شەكارا قىزمەتىنىڭ وكىلدەرى الىپ كەتكەن.

15 قازاندا ءالىمۇلى مەن مۇساحانۇلىن شەكارا قىزمەتى تەرگەۋ امالدارى ءۇشىن شىعىس قازاقستانعا جەتكىزگەن.

Abai.kz

8 پىكىر