سەنبى, 16 قاراشا 2019
1173 3 پىكىر 14 قازان, 2019 ساعات 10:49

باس پروكۋراتۋرا «اق جول» پارتياسى كوتەرگەن ماسەلەنى قاراستىرماق

باس پروكۋراتۋرا «اق جول» پارتياسىنىڭ سۇراۋى بويىنشا اۋىل مەملەكەتتىك ورگانداردىڭ شارۋاشىلىعى كاسىپكەرلەرىنە سۋبسيديانى توقتاتۋىنا بايلانىستى ماسەلەنى قاراستىرماق.

باس پروكۋراتۋرا مەن «اتامەكەن» ۇلتتىق پالاتاسى ۇيىمداستىرعان بيزنەستى قورعاۋ جونىندەگى فورۋمدا «اق جول» پارتياسىنىڭ جەتەكشىسى ازات پەرۋاشەۆ ەلىمىزدىڭ باس پروكۋرورى عيزات نۇرداۋلەتوۆكە اۋىل شارۋاشىلىعى كاسىپكەرلەرىن قولداۋعا باعىتتالعان ءوتىنىشىن جەتكىزگەن بولاتىن.

باس پروكۋرور وتىنىشپەن تانىسىپ، ونى ءوزىنىڭ ورىنباسارى بولات دەمباەۆقا تاپسىردى.

ەستەرىڭىزگە سالا كەتسەك، 9 قازان كۇنى ماجىلىستە بيۋدجەت تالقىلاۋى بارىسىندا ازات پەرۋاشەۆ مەملەكەتتىك ورگانداردى كرەستياندىق جانە فەرمەرلىك شارۋالىقتارعا ۋادە ەتىلگەن سۋبسيديالارىن تولەمەۋىنە  بايلانىستى قاتتى سىنعا العان بولاتىن.

ول «اق جول» پارتياسىنىڭ اۋىل كاسىپكەرلىگىن قورعاۋ ءۇشىن سوتقا بارۋعا دا دايىن ەكەنىن اتاپ ايتقان.

«بۇكىل قازاقستان بويىنشا جۇزدەگەن-مىڭداعان شارۋالار مەملەكەتكە سەنىم ارتىپ، بار اقشالارىن سالىپ، نەسيە العاندا (ول ءۇشىن بارلىق بيۋروكراتيانىڭ توزاعىنان ءوتىپ) – نە سەبەپتى مەملەكەتتىك ورگاندار ۇيقىدان ەندى ويانعانداي باس تارتىپ وتىر؟ ارتىق كەتسەم كەشىرەرسىزدەر، بۇل اۋىل شارۋاشىلىعى مينيسترلىگىنىڭ اۋىلدى «لاقتىردى» دەگەن ءسوزى  ەمەس پە؟! ءبىزدىڭ فراكتسيا اۋىل شارۋاشىلىعىن سۋبسيديالاۋعا قاراجات ءبولۋدى تالاپ ەتەدى»، - دەپ ايتقان بولاتىن ول ءوز سوزىندە.

«اق جول» جەتەكشىسىنىڭ بۇگىنگى باس پروكۋرورعا ءوتىنىشى دەپۋتاتتاردىڭ بۇل ماسەلەدە العان بەتتەرىنەن قايتپايتىنىن دالەلدەپ وتىر.

«اق جول» پارتياسى مەن ونىڭ پارلامەنتتىك فراكتسياسى سايلاۋالدى باعدارلاما بويىنشا جۇمىستارىن جالعاستىرىپ، وتاندىق بيزنەس مۇددەسىن قورعاۋداعى جۇمىسىن ءارى قاراي جالعاستىرا بەرەدى.

Abai.kz

3 پىكىر