10 قازان الماتى قالاسىندا، پولشادا 24-ءشى قاراشا كۇنى وتەتىن  «بالالار ەۆروۆيدەنيەسى-2019» بايقاۋىندا قازاقستاندى تانىستىراتىن ەرجان ماكسيمنىڭ «ارماننان قالما!» («Don’t forsake your dream») كونكۋرستىق ءانىنىڭ تۇساۋ كەسەرى ءوتتى.

ءباسپاسوز وتىرىسىنا «بالالار ەۆروۆيدەنيەسىندە» قازاقستاندى تانىستىراتىن وكىل ەرجان ماكسيم، ەرجان ماكسيمنىڭ اناسى گۇلميرا الىبەك پەن «حابار» تەلەارناسىنىڭ ديرەكتورى دينارا بيسەمبينا قاتىستى.

«ارماننان قالما!» («Don’t forsake your dream») ءانىنىڭ اۆتورلارى- حاميت شانعاليەۆ، دانيار الدابەرگەنوۆ جانە  تيمۋر بالىمبەتوۆ. سونداي-اق، ءدال وسى كۇنى كونكۋرستىق انگە تاسپالانعان بەينەبايانىنىڭ  دا  رەسمي تۇساۋ كەسەرى بولدى. بەينەباياننىڭ رەجيسسەرى – الەكساندر فلومبويم، پروديۋسەرى – سەرگي رۋتسكي. ءتۇسىرىلىم جۇمىستارى الماتى قالاسىندا جۇرگىزىلگەن.

«ءاننىڭ ماعىناسى – ارمانداۋدىڭ ماڭىزدىلىعى جانە ارمانعا جەتۋ جولىنداعى قيىندىقتارعا  بەرىلمەۋ قاجەتتىلىگى جايىندا. وزىمە بۇل ءان كەلەدى دەپ ويلايمىن. بەينەباياندا مەن،  حانشايىم بولۋدى اڭساعان كىشكەنتاي قىزدىڭ ارمانىن ىسكە اسىرۋشى سيقىرشىنىڭ  ءرولىن سومدايمىن. بۇل مەنىڭ العاشقى بەينەبايانىم. بارلىعىڭىزعا ۇنايدى دەپ سەنەمىن»، - دەدى ەرجان ماكسيم.

قازاقستان  2019 جىلدىڭ 24 قاراشاسىندا پولشانىڭ گليۆيتسەسىندە وتەتىن «Junior Eurovision Song Contest» حالىقارالىق ءان كونكۋرسىنا بيىل ەكىنشى مارتە قاتىسۋدا.

«حابار» اگەنتتىگى 2016 جىلدىڭ 1 قاڭتارىنان باستاپ كونكۋرستى ۇيىمداستىراتىن ەۋروپالىق حابار تاراتۋ وداعىنىڭ (EBU) قاۋىمداسقان مۇشەسى بولىپ تابىلادى، ۇزاق كەلىسىم سوزدەر جۇرگىزگەننەن كەيىن، بايقاۋعا قاتىسۋ ءۇشىن ەلدەن ۇمىتكەر ۇسىنۋعا مۇمكىندىك بەردى»، - دەدى «حابار» تەلەارناسىنىڭ ديرەكتورى دينارا بيسەمبينا اننىڭ تۇساۋ كەسەر شاراسىندا.

«حابار» اگەنتتىگى بيىل ۇلتتىق ىرىكتەۋ وتكىزبەي-اق، ەرجان ماكسيمدى ۇسىنۋ تۋرالى شەشىم قابىلدادى.

«ول بىلتىرعى ەۆروۆيدەنيە قارساڭىندا وتكەن ۇلتتىق ىرىكتەۋگە قاتىسىپ، ەكىنشى ورىندى يەمدەنگەن بولاتىن. ەرجان  رەسەيدەگى «گولوس» جوباسىنىڭ قاتىسۋشىسى رەتىندە تەك قانا قازاقستان عانا ەمەس، الىس-جاقىن شەت ەل كورەرمەندەرىنە دە تانىمال. حالىقارالىق ارەنادا ەلىمىزدىڭ ابىرويىن لايىقتى دارەجەدە قورعايتىنىنا سەنىمىمىز مول», - دەپ ويىن اياقتادى ول.

انىقتاما ءۇشىن: Junior Eurovision بايقاۋىنىڭ شارتى بويىنشا، فينالدا قاتىسۋشىلار ەش جەردە جاريالانباعان  كومپوزيتسيانى تابيعي داۋىستا ورىنداۋى قاجەت. جەڭىمپاز قازىلار القاسى مەن قاتىسۋشى مەملەكەتتەردىڭ داۋىس بەرۋى ارقىلى انىقتالادى. قازىلار القاسىنا 5 ادام كىرەدى – 3 ەرەسەك جانە 2 بالا. ەرەسەكتەر «ەۆروۆيدەنيەسىنەن» ايىرماشىلىعى كەلەسى بايقاۋدى ۇيىمداستىرۋ قۇقى جەڭىمپازعا بەرىلمەيدى، بۇل جاس ورىنداۋشىلارعا ارتىق قىسىم بولماۋى ءۇشىن ىستەلگەن شارا. بيىل جارىسقا 19 ەل قاتىسادى، ولاردىڭ قاتارىندا البانيا، ارمەنيا، اۆستراليا، بەلارۋس، فرانتسيا، گرۋزيا، يرلانديا،يسپانيا، يتاليا، قازاقستان، مالتا، سولتۇستىك ماكەدونيا، پولشا، پورتۋگاليا، رەسەي، سەربيا، نيدەرلاندى،ۋكراينا مەن  ۋەلس بار.  العاش رەت «Junior Eurovision Song Contest» 2003 جىلى كوپەنگاگەن (دانيا) قالاسىندا 16 مەملەكەتتىڭ قاتىسۋىمەن وتكەن بولاتىن. ال تەلەكورەرمەندەردىڭ جانە قازىلار القاسىنىڭ ورتاق شەشىمىمەن جەڭىمپازدى انىقتاۋ 2008 جىلدان باستاپ مۇمكىن بولدى، وعان دەيىن داۋىس بەرۋ كورسەتىلىم كەزىندە كورەرمەندەرمەن جۇزەگە اسقان ەدى. 2007 جانە 2008 جىلدارداعى  داۋىس بەرۋدەن تۇسكەن پايدا «UNICEF» جولداندى».

ەرجان ماكسيمنىڭ بەينەبايانى:

Abai.kz