سەيسەنبى, 22 قازان 2019
ەل ءىشى... 1190 11 پىكىر 9 قازان, 2019 ساعات 16:06

ازات پەرۋاشەۆ: اۋىل شارۋاشىلىعى مينيسترلىگى اۋىلدى «لاقتىردى» ما؟

«اق جول» پارتياسى اۋىل شارۋاشىلىعى مينيسترلىگىن اۋىلدا كاسىپ قىلعاندارعا سۋبسيديا تولەمەگەنى ءۇشىن سوتقا بەرمەك. بۇل تۋرالى ازات پەرۋاشەۆ 2019-2021 جىلدارعا ارنالعان رەسپۋبليكالىق بيۋدجەتكە تولىقتىرۋلار مەن وزگەرتۋلەر ەنگىزۋدى تالقىلاۋ بارىسىندا ايتتى.

ءوز سوزىندە ول بيىلعى كوكتەمدە، ياعني 13 ناۋرىزدا «اق جول» فراكتسياسىنىڭ اۋىل شارۋاشىلىق وندىرۋشىلەرىنىڭ سۋبسيديا قارىزىن وتەۋ ماسەلەسىن شەشۋدى سۇراعانىن ايتتى.

«تولىقتىرىلعان بيۋدجەتتەن كورىپ وتىرعانىمىزداي، بۇل ماسەلە ءالى دە شەشىلمەگەن سىڭايلى. 37 ملرد تەڭگە سوماسىنداعى قارىز وتەلمەگەن. قارجى مينيسترلىگىنىڭ تۇسىندىرۋىنشە اۋىل شارۋاشىلىق مينيسترلىگى جاڭا تاسىلدەردى قولدانۋعا ارنالعان سۋبسيديالاۋدىڭ تيىمدىلىگىن ەسەپتەپ بەرۋى كەرەك ەكەن. 

الايدا بۇدان بىرنەشە جىل بۇرىن سۋبسيديالاۋ باعدارلاماسى مەكەمەارالىق كەلىسسوزدەردەن ءوتىپ، ونىڭ تيىمدىلىگى الدىن الا ەسەپتەلىپ، سودان سوڭ عانا بەكىتىلدى ەمەس پە؟

ەندى نە سەبەپتى بۇكىل قازاقستان بويىنشا جۇزدەگەن-مىڭداعان شارۋالار مەملەكەتكە سەنىم ارتىپ، بار اقشالارىن سالىپ، نەسيە العاندا (ول ءۇشىن بارلىق بيۋروكراتيانىڭ توزاعىنان ءوتىپ) – نە سەبەپتى مەملەكەتتىك ورگاندار ۇيقىدان ەندى ويانعانداي باس تارتىپ وتىر؟ ارتىق كەتسەم كەشىرەرسىزدەر، بۇل اۋىل شارۋاشىلىعى مينيسترلىگىنىڭ اۋىلدى «لاقتىردى» دەگەن ءسوزى  ەمەس پە؟!

جۇمىسسىزدىقپەن كۇرەسكە باعىتتالعان قاراجات وسىندا جۇمسالۋى ءتيىس! اتاۋلى الەۋمەتتىك كومەك الۋشىلاردىڭ سانى وسكەنىن دە وسىدان ىزدەۋىمىز كەرەك! 

اۋىل ازاماتتارىن وندىرىستىك كاسىپتە قولداۋدىڭ ورنىنا شەنەۋنىكتەر بوس جۇرگەندەرگە كومەك كورسەتىپ الەك. 

بۇل ەكونوميكالىق ساياسات ەمەس، «قيسىق اينالاردىڭ پاتشالىعى»! ءبىزدىڭ فراكتسيا اۋىل شارۋاشىلىعىن سۋبسيديالاۋعا قاراجات ءبولۋدى تالاپ ەتەدى»، - دەدى پەرۋاشەۆ. ول «اق جول» پارتياسىنىڭ اۋىل كاسىپكەرلىگىن قورعاۋ ءۇشىن سوتقا بارۋعا دا دايىن ەكەنىن اتاپ كورسەتتى. 

پارتيا جەتەكشىسى تيىسىنشە شاعىمدى اۋىل شارۋاشىلىعى مينيسترلىگىنە دايارلاپ جاتقانىن ايتتى. 

Abai.kz

11 پىكىر