سەيسەنبى, 19 قاراشا 2019
282 1 پىكىر 9 قازان, 2019 ساعات 10:25

مەملەكەت باسشىسى ەلوردانى ودان ءارى دامىتۋ جونىندە جيىن وتكىزدى

قازاقستان پرەزيدەنتى ەلوردانى دامىتۋ جونىندە بىرقاتار ناقتى تاپسىرما بەردى.

قاسىم-جومارت توقاەۆ سوڭعى 10 جىلدا ەلورداعا تارتىلعان ينۆەستيتسيا كولەمىنىڭ ازايىپ كەتكەنىنە نازار اۋداردى. مەملەكەت باسشىسى قالا اكىمدىگى مەن سىرتقى ىستەر مينيسترلىگىنە وسى باعىتتاعى جۇمىستى جانداندىرىپ، جۋىق ارادا ناقتى ناتيجەلەرگە قول جەتكىزۋدى تاپسىردى.

– نۇر-سۇلتان ەكونوميكا مەن بيزنەس ورتاعا قولايلى جاعداي جاسايتىن قالا بولىپ قالا بەرۋى قاجەت. باستى مىندەتتەردىڭ ءبىرى – ينۆەستيتسيا تارتۋ،– دەدى پرەزيدەنت.

قاسىم-جومارت توقاەۆ وزەكتى ماسەلەلەردىڭ ءبىرى رەتىندە باسپانا بەرۋ مەن قۇرىلىس جۇمىستارىنىڭ باسەڭدەۋىن اتادى.

– ۇلەسكەرلىك قۇرىلىس ماسەلەسىن تەز ارادا شەشۋ كەرەك. قالادا 49 پروبلەمالىق نىسان بار. ونداعى قۇرىلىستىڭ اياقتالۋىن 13,5 مىڭ ۇلەسكەر تاعاتسىزدانا كۇتىپ وتىر،– دەدى مەملەكەت باسشىسى.

پرەزيدەنت ەنەرگەتيكا سالاسىنداعى نىساندار قۇرىلىسىنىڭ ۋاقىتىلى اياقتالماۋىن اتاپ ايتتى. قۇرىلىسى 2010 جىلى باستالىپ، بيىل اياقتالۋى ءتيىس جەو-3-ءتىڭ پايدالانۋعا بەرىلۋ مەرزىمى كەيىنگە شەگەرىلگەنىن مىسالعا كەلتىردى. قاسىم-جومارت توقاەۆ قالانىڭ «سارىارقا» گاز قۇبىرىنا قوسىلۋعا دايىن بولماۋىن دا سىنعا الدى.

سونداي-اق مەملەكەت باسشىسى بيزنەستىڭ دامۋىنا كەدەرگى كەلتىرىپ وتىرعان ينجەنەرلىك جۇيەلەرگە قوسىلۋدىڭ قيىندىعىنا نازار اۋداردى.

– كوپ جاعدايدا كوممۋنيكاتسياعا قوسىلۋعا تەحنيكالىق مۇمكىندىگى جوق جەر تەلىمدەرى اۋكتسيونعا شىعارىلادى نەمەسە الدىن الا جازىلعان تەحنيكالىق تالاپتار قۇرىلىس بارىسىندا وزگەرىپ جاتادى. بۇعان جول بەرۋگە بولمايدى. بەرىلەتىن جەر تەلىمدەرى بارلىق جۇيەلەرگە قوسىلۋعا دايىن بولۋى كەرەك،– دەپ تاپسىردى پرەزيدەنت.

قاسىم-جومارت توقاەۆ قولما قول اقشاسىز ەسەپ ايىرىسۋ ۇلەسىن ارتتىرۋ قاجەتتىگىن ايتتى. قازىر ەلوردادا ول نەبارى 9 پايىزدى قۇرايدى.

– اتالعان پروبلەما قالا تۇرعىندارى مەن قوناقتارىنا جايسىز جاعداي تۋعىزىپ قانا قويماي، «كولەڭكەلى ەكونوميكانىڭ» ورىستەۋىنە اكەپ سوعادى. قارجى مينيسترلىگى قالا اكىمدىگىمەن بىرلەسىپ قالاداعى ساۋدا نۇكتەلەرى مەن قىزمەت كورسەتۋ سالالارىنداعى باقىلاۋ-كاسسالىق اپپاراتتاردى، كارتالىق تەرمينالداردىڭ بولۋىن قاتاڭ باقىلاۋعا الۋى قاجەت،– دەدى مەملەكەت باسشىسى.

پرەزيدەنت ازىق-تۇلىك جانە كۇندەلىكتى تۇتىنۋ تاۋارلارىنىڭ قىمباتتىعىنا نازار اۋداردى. ونىڭ ويىنشا، باعانىڭ قىمباتتىعى – ينفراقۇرىلىم مەن ازىق-تۇلىك بەلدەۋىنىڭ ناشارلىعى، ساۋدا ورىندارىنىڭ جەتىسپەۋشىلىگىنىڭ ايعاعى.

قاسىم-جومارت توقاەۆ نۇر-سۇلتان قالاسى مەن اقمولا، قاراعاندى، پاۆلودار وبلىستارىنىڭ اكىمدىكتەرىنە تاۋار وندىرۋشىلەرمەن جانە ساۋدا جەلىلەرىمەن تىكەلەي بايلانىس ورناتۋدى تاپسىردى.

مەملەكەت باسشىسى ءوز ءسوزىنىڭ باسىم بولىگىن قالا تۇرعىندارىنىڭ الەۋمەتتىك تۇرمىس جاعدايىن جاقسارتۋعا ارنادى. ونىڭ ويىنشا، ىشكى ميگراتسيالىق پروتسەستەرگە باقىلاۋدىڭ بولماۋىنان جىل سايىن قالا حالقىنىڭ سانى ارتىپ، ول ءوز كەزەگىندە الەۋمەتتىك ينفراقۇرىلىمعا، سونىڭ ىشىندە مەديتسينا مەن ءبىلىم سالاسىنا سالماق تۇسىرۋدە.

پرەزيدەنت ءبىلىم بەرۋ ۇيىمدارىندا ورىن جەتىسپەۋشىلىگىن ايتتى. ول مەكتەپتەر مەن مەكتەپكە دەيىنگى ءبىلىم بەرۋ مەكەمەلەرىندەگى ورىن تاپشىلىعىن شەشۋ ءۇشىن جەكەمەنشىك ارىپتەستىكتى كوبىرەك تارتۋدىڭ ماڭىزدىلىعىن ايتتى.

قاسىم-جومارت توقاەۆ مەديتسينالىق قىزمەتتىڭ ساپاسىن ارتتىرۋدى دا اتاپ ءوتتى. بۇل تۇرعىدا 60 جىلدان بەرى كۇردەلى جوندەۋ جۇرگىزىلمەگەن ورتالىق تەمىرجول اۋرۋحاناسىنىڭ اپاتتى جاعدايىن مىسالعا كەلتىردى.

سونىمەن قاتار مەملەكەت باسشىسى سپورتتىق نىسانداردىڭ قالا تۇرعىندارى ءۇشىن قولجەتىمدى بولۋى ءۇشىن قاجەتتى شارالار ۇيىمداستىرۋدى، «قازاقستان» جانە «تولقىن» سپورت كەشەندەرىندە قايتا جوندەۋ جۇمىستارىن جۇرگىزۋدى تاپسىردى.

پرەزيدەنت ەلوردادا تۇرعىندارىنىڭ ءومىر سۇرۋىنە مەيىلىنشە قولايلى جاعداي جاساۋ كەرەكتىگىنە كوڭىل ءبولدى. پرەزيدەنتتىڭ پايىمداۋىنشا، نۇر-سۇلتان – «ءتورت قۇبىلاسى تەڭ قالا» قاعيداتىمەن دامۋى قاجەت. نەگىزگى مىندەت – جول سالۋ جانە جوندەۋ، ورتالىق كوممۋنيكاتسيالاردى تارتۋ، شەتكى كوشەلەر مەن «ميچۋرينو»، «ينتەرناتسيونالنىي»، «كۇيگەنجار» ەلدى مەكەندەرىن جارىقتاندىرۋ.

قاسىم-جومارت توقاەۆ قالا تۇرعىندارىنىڭ قوزعالىسىن قامتاماسىز ەتۋ ماسەلەسىن دە اينالىپ وتپەدى. بۇل تۇرعىدا مەملەكەت باسشىسى جەڭىل رەلستى كولىك (LRT) قۇرىلىسىن سىنعا الدى.

– ۇكىمەت پەن اكىمدىككە LRT قۇرىلىسىن قايتا باستاۋ جانە ءبىرىنشى كەزەڭىنىڭ اياقتالۋ مەرزىمىن ناقتى بەلگىلەۋدى، سونىمەن قاتار، ەكىنشى كەزەڭنىڭ كەستەسى مەن جۇزەگە اسىرۋ تەتىكتەرىن ايقىنداۋدى تاپسىرامىن،– دەدى پرەزيدەنت.

سونداي-اق مەملەكەت باسشىسى ۇكىمەت پەن اكىمدىككە كوشەلەردەگى كولىك كەپتەلىسىن ازايتۋ ماقساتىندا قالانىڭ ينتەللەكتۋالدىق كولىك جۇيەسىنىڭ تيىمدىلىگىن قامتاماسىز ەتەتىن شارالار قابىلداۋدى تاپسىردى. ناقتى ايتقاندا، قاسىم-جومارت توقاەۆ سارايشىق جانە سارىارقا كوشەلەرىندەگى كەپتەلىستى ازايتۋ ءۇشىن ەسىل وزەنى ارقىلى تاۋەلسىزدىك داڭعىلىنا دەيىن كوپىر سالۋدى ۇسىندى.

پرەزيدەنت نۇر-سۇلتان اعىلشىن تىلىندە قىزمەت كورسەتەتىن حالىقارالىق ورتالىق رەتىندە دامي بەرۋى كەرەك دەدى.

– شەتەلدىك ساراپشىلار مەن ينۆەستورلارعا اعىلشىن تىلىندە «ءبىر تەرەزە» قاعيداتى بويىنشا قىزمەت كورسەتۋدى ۇيىمداستىرۋ كەرەك. ول ءۇشىن قالا اكىمدىگى «استانا» حالىقارالىق قارجى ورتالىعى ەكسپات ورتالىعىنىڭ مۇمكىندىگى مەن تاجىريبەسىن پايدالانۋى ءتيىس،– دەدى مەملەكەت باسشىسى.

قاسىم-جومارت توقاەۆ ەلوردانىڭ قارقىندى دامۋى ءۇشىن  تۇرعىندارىنىڭ قاۋىپسىزدىگىن قامتاماسىز ەتۋ ماسەلەسى دە وزەكتى ەكەنىن ايتتى.

– جىل باسىنان بەرى بالالاردىڭ تەرەزەلەردەن، بالكوننان قۇلاۋ سالدارىنان 14 توسىن جاعداي تىركەلدى. قۇرىلىس نورمالارىندا قاۋىپسىزدىكتىڭ ناقتى پارامەترلەرىن كۇشەيتۋ قاجەت دەپ سانايمىن،– دەدى پرەزيدەنت.

مەملەكەت باسشىسى قالانىڭ بىرقاتار پروبلەمالارىنا توقتالىپ، ولاردى شەشۋ جونىندە ناقتى تاپسىرما بەردى.

Abai.kz

1 پىكىر