سارسەنبى, 13 قاراشا 2019
720 0 پىكىر 8 قازان, 2019 ساعات 11:53

تۇركىمەنستان ەل كونستيتۋتسياسىن وزگەرتپەك

تۇركىمەنستاندا كونستيتۋتسيانى وزگەرتۋ بويىنشا كوميسسيا جۇمىسىن باستادى. بۇل تۋرالى تدح مەملەكەتتىك اگەنتتىگى حابارلادى.

مالىمەتكە سايكەس، كوميسسيانىڭ العاشقى وتىرىسى 4 قازاندا ءوتىپ، جاڭا ورگاننىڭ توراعا ورىنباسارى بولىپ، پارلامەنت سپيكەرى گۇلشات مامەدوۆا تاعايىندالعان. ال كوميسسيانىڭ توراعاسى پرەزيدەنت گۋربانگۋلى بەردىمۇحامەدوۆتىڭ ءوزى.

ول وتىرىس كەزىندە «الەمدە ەكونوميكالىق جانە ساياسي جاعداي تەز وزگەرىپ جاتقاندىقتان، اتا زاڭعا وزگەرىستەر كىرگىزۋ قاجەت» دەگەن.

تۇركىمەنستان كونستيتۋتسياسى سوڭعى رەت 2016 جىلى قىركۇيەكتە وزگەرتىلىپ، پرەزيدەنتتىككە ۇمىتكەرلەردىڭ جاسى 70-تەن اسپاۋى ءتيىس دەگەن شەكتەۋ الىنىپ تاستالعان.

كونستيتۋتسيانىڭ ءۇش جىل بۇرىنعى جاڭا رەداكتسياسىندا ەۋروپاداعى قاۋىپسىزدىك جانە ىنتىماقتاستىق (ەقىۇ) ۇيىمىنىڭ دەموكراتيالىق ينستيتۋتتار جانە ادام قۇقىقتارى جونىندەگى بيۋروسىنىڭ ۇسىنىستارى ەسەپكە الىنبادى.

بۇل جولى كونستيتۋتسيالىق رەفورمادا حالىق ءماسليحاتىن رەفورمالاپ، ەكى پالاتالى پارلامەنت جۇيەسىن ەنگىزبەك. سوندا حالىق ءماسليحاتى پارلامەنتتىڭ جوعارعى پالاتاسى بولماق.

تۇركىمەنستان اتا زاڭى 1992 جىلى قابىلدانىپ، سودان بەرى التى رەت وزگەرتىلدى.

Abai.kz

0 پىكىر