سەيسەنبى, 22 قازان 2019
وزەكتى 1128 2 پىكىر 7 قازان, 2019 ساعات 12:43

ساپاسىز اۋدارما - ءتىل بۇزادى، مينيستر حانىم!

بىزدەگى اۋدارما قىزمەتى دە بيزنەس ورتاعا بەرىلگەن. وكىنىشكە وراي، ءتيىستى زاڭناماعا ساي ولاردى تەكسەرىپ، جۇمىستارىنا قاداعالاۋ جاساۋعا بولمايدى. بۇل بيزنەسكە جاسالعان قىسىم بولىپ ەسەپتەلەدى. وسى ەركىندىك بۇگىندە ونسىز دا اۋدارما تىلگە اينالىپ بارا جاتقان ءتول ءتىلىمىزدى بۇلدىرۋدە...

جۋىردا يۋتۋب كانالىندا جۋرناليست امان تاسىعانعا بەرگەن سۇقباتىندا مادەنيەت جانە سپورت ءمينيسترى بۇعان مىنانداي مىسال كەلتىردى. ونىڭ ايتۋىنشا، رەسەيلىك تەلەكومپانيا ءوز كينوسىنىڭ قازاقشا ءسۋبتيترىن جاساتۋ ءۇشىن وسى اۋدارما ورتالىقتارىنىڭ بىرىنە جۇگىنگەن. ولار اقىسىن الىپ، جاساپ بەرگەن. ءتىلىمىزدى بىلمەيتىن ولار ءسۋبتيتردىڭ قالاي شىققانىن قايدان ءبىلسىن؟! ءبارى كينو وسىندا اكەلىپ كورسەتىلگەندە بەلگىلى بولدى.

سۋبيتردە قاتەدەن كوز سۇرىنەدى. سونشا قارجىعا جاسالعاننان كەيىن، ونىڭ ۇستىنە جۇمىستى ساپاسىز جاساپ وتىرعان قازاقتاردىڭ ءوزى بولسا ولار نە ىستەسىن. وسىلايشا كينو كوپشىلىككە كورسەتىلىپ كەتتى. مۇنداي مىسالدار وتە كوپ. اينالىپ كەلگەندە زارداپ شەككەن ۇلتىمىزدىڭ ءتىلى، ونىمەن سويلەيتىن از عانا قازاقتار بولدى.

كۇلدىبادامعا اينالعان سۋبيترلەر،وزگە دە اۋلارمالار تالايلاردىڭ ءتىل ۇيرەنسەك،سوزدىك قوردى دامىتساق دەگەن قۇشتارلىعىن سۋ سەپكەندەي ەتكەنى داۋسىز.سوندا دەيمىز دە وسىنداي ورتالىقتارعا ليتسەنزيا بەرۋ كەزىندە ءتىل تازالىعى، ولاردىڭ قۇرىلىمىنا قاتىستى ەرەجەلەردى ساقتاۋ، قۇنارىن تولىققاندا پايدالانۋ جونىندەگى تالاپتار نەگە قويىلماعان دەگەن وي كەلەدى.

مينيسترلىك ءبىز ولاردى تەكسەرە المايمىز، تەك قانا مونيتورينگ جاساي الامىز دەيدى. ەگەر ناقتى شارا قولدانىلماسا مۇنداي مونيتورينگتەن نە پايدا؟ ول تەك ءبىراز ادامعا جالاقى تولەۋ ءۇشىن عانا قاجەت بولىپ قالادى عوي.

وسى شارانىڭ ناتيجەسىندە اۋدارمانى تالاپقا ساي جاساماي جۇرگەن ورتالىقتاردىڭ ليتسەنزياسىن نەگە الىپ قويماسقا، نەمەسە باسقاداي شارالار قاراستىرماسقا؟! اۋدارما قازاق ءتىلىنىڭ تىنىسىن تارىلتپاي، كەرىسىنشە ونىڭ اياسىن كەڭەيتىپ، مارتەبەسىن كوتەرۋ ءۇشىن وسىنداي تەتىكتەر قاجەت سياقتى... ايتپەسە، بۇگىنگى اۋدارما كەيبىر جولبيكەلەردىڭ ءتىلىمىزدى شۇبارلاپ، وڭاي جولمەن تيىن تابۋىنىڭ عانا قۇرالىنا اينالىپ بارا جاتقانداي...

ايشا قۇرمانعالي

Abai.kz

2 پىكىر