جەكسەنبى, 26 قاڭتار 2020
بايقاۋ! 1346 0 پىكىر 25 قىركۇيەك, 2019 ساعات 17:26

«كۇي – امانات» اتتى بايقاۋ وتەدى

ورازبەك سارسەنوۆ 1923 جىلى 17 قازان كۇنى بۇرىنعى شىمكەنت وبلىسى ارىس اۋدانىنداعى بايىرقۇم ەلدى مەكەنىندە دۇنيەگە كەلگەن. مەكتەپتە وزات وقىعان العىر دا زەرەك جاس 9 كلاستى 5 جىلدا ءتامامداپ شىعادى. كەيىن تۇركىستانداعى كوللەدجدى پەداگوگ ماماندىعى بويىنشا اياقتاپ، بايساقال اۋىلىنداعى مەكتەپكە مۇعالىم بولىپ ورنالاسىپ، ءبىر جىلدان كەيىن مەكتەپتىڭ ديرەكتورى بولىپ تاعايىندالادى. بالالارى ەر جەتكەسىن، ولاردىڭ  بولاشاعىنا الاڭداعان  ورازبەك ساۋدا جاعىنا اۋىسىپ، ءومىرىنىڭ سوڭىنا دەيىن سول سالادا ەڭبەك ەتكەن.

ورازبەك كۇيشى 1969 جىلى وبىر اۋرۋىنان قايتىس بولعان. سول جىلى كوكتەم كەش كەلىپتى.  جەتىنشى مامىر كۇنى تاڭەرتەڭ:  «دومبىرامدى بەرىڭدەرشى»، –  دەپ قولىنا جان سەرىگىن العان كۇيشى «قىزىلقۇم» كۇيىن شەرتىپ وتىرىپ: «وسى سالالى ساۋساقتار دا ءبىر كۇنى توپىراقتا ءشىريدى-اۋ!» – دەگەن ەكەن.  بۇل سوزدەردى ەشكىم ەلەمەگەن. 9  مامىر كۇنى ساعات 10 شاماسىندا ول ءومىردى، بالالارىن قيماي كوز جۇمادى.

ورازبەك كۇيشى وزبەكستاننىڭ مەملەكەتتىك تەلەارناسىنان اپتاسىنا  ءبىر رەت بەرىلەتىن «زامانداس» مۋزىكالىق باعدارلاماسىنا   1967 جىلى ارنايى شاقىرىلىپ، ءوزىنىڭ 7 كۇيىن جازدىرىپتى. ورازبەكتىڭ  كۇيلەرى مەن ولەندەرىندە مۇڭ، جەر مەن ەلگە دەگەن ساعىنىش باسىم. ومىردەن ەرتە كەتەتىنىن سەزگەندەي قايران كۇيشى قايىرىمدى، مەيىرىمدى، وتە كەڭ ادام بولعان ەكەن. اسىرەسە، جەتىم-جەسىرلەرگە قول ۇشىن بەرىپ، قولىنان كەلگەن كومەگىن اياماپتى.

كۇيشىنىڭ بالالارى دا دومبىرا شەرتىپ ءان ايتقانمەن، ونەر جولىنا تۇسپەگەن. كوزى تىرىسىندە  بالالارىنا ولەڭ جاتتاتىپ، دومبىرا تارتقىزىپ، ونەرگە باۋلىعان ورازبەكتىڭ  اڭشىلىق ونەرى دە بولعان. ەل قيىنشىلىقتان ەسىن جيماعان ۋاقىتتا اڭعا كەتىپ، قويان، قىرعاۋىل، تۇلكى اتىپ، بۇكىل ەلگە تاراتىپ بەرەدى ەكەن.

جيدەلىبايسىن كۇي مەكتەبىنىڭ وكىلى، ورازبەك كۇيشىنىڭ ۇرپاقتارى اكەلەلەرىنىڭ كۇي-اماناتىن ناسيحاتتاۋ ماقساتىندا ەلىمىزدەگى كۇيشىلەر اراسىندا بايقاۋ جاريالايدى.

بايقاۋدىڭ تالاپتارى:

1. ۆ كونتاكتە الەۋمەتتىك جەلىسىندەگى كۇلاينا ورازبەكقىزىنىڭ https://vk.com/id366513476 پاراقشاسىندا ورازبەك كۇيشىنىڭ جەتى كۇيى بەرىلگەن. كۇيشى مىندەتتى تۇردە «كۇلتىر-ماماي» كۇيىن جانە قالعان التى كۇيدىڭ بىرەۋىن ءوز تالعامىنا قاراي ورىنداۋى ءتيىس. كۇيشىلەر بايىرعى قۇيماقۇلاق داستۇرىمەن، كۇيلەردى ەستۋ ارقىلى الادى.

2. كۇيشى ءوزىنىڭ اتى-ءجونىن، قىسقاشا ءومىربايانىن جازىپ، كۇيلەردىڭ wafe نەمەسە ۆيدەو نۇسقاسىن sarsenova.001@mail.ru پوچتاسى مەن Whatsapp نومەرىنە 10-شى جەلتوقسانعا دەيىن جىبەرۋى كەرەك.

بايقاۋ قورىتىندىسىن بەلگىلى كۇيشىلەر: قازاقستاننىڭ ەڭبەك سىڭىرگەن قايراتكەرى، پروفەسسور جانعالي ءجۇزباي، قۇرمانعازى اتىنداعى قۇك دوتسەنتى، بىرنەشە كۇيشىلەر كونكۋرسىنىڭ لاۋرەاتى مۇرات ابۋعازى جانە «ءجۇسىپ» كۇيىنىڭ اۆتورى، ءجۇسىپ سارسەنۇلىنىڭ نەمەرەسى ءمادي كوشىكباەۆ شىعارادى. جەڭىمپاز كۇيشىلەردى 2019 جىلعى جەلتوقساننىڭ 16-ى كۇنى كۇلاينا ورازبەكقىزى فەيسبۋك پاراقشاسىندا جاريالايدى.

سىيلىق قورى:

باس جۇلدە: - 200 000 تگ

ءى-ورىن: - 120 000 تگ

ءىى-ورىن: - 80 000 تگ

ءىىى-ورىن: - 50 000 تگ

كۇيدىڭ مر3 نۇسقاسى قاجەت دەيتىندەر رەداكتسيا القاسىمەن حابارلاسۋى كەرەك.

Abai.kz

0 پىكىر