بۇل تۋرالى حالىقارالىق «Qazaq kuresi» فەدەراتسياسى، قازاقستان رەسپۋبليكاسى قازاق كۇرەسى فەدەراتسياسى، وڭىرلىك جانە شەتەلدىك فەدەراتسيا مۇشەلەرىنىڭ بىرلەسكەن وتىرىسىندا تالقىلاندى.

جيىن بارىسىندا قازاق كۇرەسىنىڭ وركەندەۋى، ونداعى وزگەرىستەر ماسەلەلەسى ءسوز بولدى. فەدەراتسيا سپورتتىق-تەحنيكالىق كوميتەتىنىڭ توراعاسى ج.قونىسپاەۆ قازاق كۇرەسىنىڭ وركەندەۋى جولىنداعى وليمپيادالىق باعىتتا جاسالىناتىن جۇمىستار لەگىن ۇسىندى. ونىڭ ايتۋىنشا بۇگىندە قازاق كۇرەسىن وليمپيادالىق ويىندار قاتارىنا ەنگىزۋ ءۇشىن بىرقاتار جۇمىستار اتقارۋ قاجەت. وسى ورايدا، فەدەراتسيا عىلىمي-ادىستەمەلىك كوميتەتىنىڭ توراعاسى ە.مىرزابوسىنوۆ قازاق كۇرەسىندەگى وزگەرىستەردى عىلىمي-كەشەندىك جۇمىس توبىن قۇرۋدى (تەرميندەردى قالىپتاستىرۋ، دايىندىق ادىستەمە جۇمىستارىن جۇرگىزۋ، قازاق كۇرەسىن مەكتەپ باعدارلاماسىنا ەنگىزۋ باعىتىندا ۇسىنىستارىن ءبىلدىردى. سونىمەن قاتار، ە.مىرزابوسىنوۆ قازاق كۇرەسىنىڭ ەرەجەسىنە وزگەرىستەر مەن تولىقتىرۋلار ەنگىزۋ قاجەتتىگىن ايتتى.

قازاق كۇرەسىنىڭ دامۋ تاريحى تەرەڭدە جاتىر. توي-تومالاق، جيىن-مەرەكە، ءتۇرلى باسقوسۋلار پالۋانداردىڭ بەلدەسۋىنسىز وتكەن ەمەس. قازىرگى تاڭدا ەلىمىزدە جەكپە-جەك ونەرىن الەمدىك باسەكەگە لايىقتى سپورت دەڭگەيىنە شىعارۋ ماڭىزدى مىندەتتەردىڭ بىرىنە اينالىپ وتىر.

سوندىقتان قازاق كۇرەسىنىڭ دامۋىنا اتسالىسىپ جاۋاپتى تۇلعالار ۇلتتىق سپورتتىڭ وليمپيادا قاتارىنا ەنگىزۋ ءۇشىن قاجەتتى ناقتى قادامداردى اتاپ، سول بويىنشا جۇمىس توبىن قۇرىپ ۇلگەردى.

بۇقارالىق اقپارات قۇرالدارىنا بەرگەن سۇحباتىندا حالىقارالىق «Qazaq kuresi» فەدەراتسياسىنىڭ پرەزيدەنتى قانات بوزىمباەۆ «ۇلتتىق سپورتىمىزدىڭ وليمپيادالىق ويىندار قاتارىنان تابىلۋىنا بار كۇش-جىگەرىمىزدى سالامىز» دەگەن بولاتىن.  ونىڭ پىكىرىنشە، حالىقارالىق فەدەراتسيانىڭ قۇرىلعانىنا از بولسا دا، وسى ۋاقىت  ارالىعىندا اۋقىمدى شارالار مەن ناتيجەلى جۇمىستار اتقارىلدى. فەدەراتسيا قۇرامىنا ەۋروپا مەن ازيا ەلدەرىنىڭ 28 ۇلتتىق  فەدەراتسياسى كىرەدى. ەسەسىنە الەمدە ۇلتتىق سپورتىمىزعا قىزىعۋشىلىق تانىتقاندار سانى كۇن ساناپ ارتۋدا.

فەدەراتسيا جىل سايىن حالىقارالىق تۋرنيرلەر مەن ءىس-شارالار وتكىزۋدى داستۇرگە اينالدىرعان. فەدەراتسيا قۇرىلعان 2 جىل ىشىندە: قازاق كۇرەسىنەن الەم چەمپيوناتى-2017 (استانا، قازاقستان), 2018 جىلى جاتتىقتىرۋشىلار مەن تورەشىلەرگە ارنالعان حالىقارالىق سەمينار (تبيليسي، گرۋزيا), قازاق كۇرەسىنەن ەۋروپا چەمپيوناتتارى (گرۋزيا مەن پولشا), 2018 جىلى وقۋ-جاتتىعۋ جيىنى (الماتى، قازاقستان), ازيا چەمپيوناتتارى (قازاقستان مەن موڭعوليا),  فەدەراتسيا قولداۋىمەن «الەم بارىسى» ءتۋرنيرى وتكىزىلدى. سونداي-اق، 2018 جىلى 3 ۇلتتىق چەمپيونات وتكىزىلسە، قازىر ۇلتتىق چەمپيوناتتار سانى 10-نان اسىپ ءتۇستى.

البەتتە، قارقىندى قولداۋدىڭ ارقاسىندا ۇلتتىق سپورتىمىز بۇگىندە الەمگە كەڭ ناسيحاتتالىپ، ۇلكەن تانىمالدىلىققا يە.  قازاق كۇرەسىمەن گرۋزيا، قىتاي، ەۋرووداق ەلدەرى، يران جانە ت.ب. ەلدەرى اينالىسا باستادى.

Abai.kz