بەيسەنبى, 14 قاراشا 2019
ساڭلاق 1751 4 پىكىر 20 قىركۇيەك, 2019 ساعات 13:57

قۇرامىندا جالعىز قازاقستاندىق ويىنشى بار «استانا» ميۋ-دان جەڭىلدى

«استانا» ەۋروپا ليگاسى توپتىق كەزەڭى اياسىنداعى العاشقى ماتچىن سىرت الاڭدا انگليالىق «مانچەستەر يۋنايتەد» كومانداسىنا قارسى وتكىزىپ، 1:0 ەسەبىمەن جەڭىلىپ قالدى.

ءتورتىنشى جىل قاتارىنان ەۋروپا ليگاسىنىڭ توپتىق كەزەڭىندە باق سىناپ جاتقان ەلوردالىق كوماندا مانچەستەر قالاسىنا ۇلكەن ۇمىتپەن اتتانعان. ارينە ميۋ-ءدى جەڭىپ، ءۇش ۇپاي ەنشىلەيمىز دەپ ۇمىتتەنبەگەن بولار، بىراق، اتاقتى «ولد ترا́ففورد» ستاديونىندا دوپ تەبۋدىڭ ءوزى ماقتانىش دەگەندى ءجيى ايتىپ ءجۇردى. ءتىپتى «استانانىڭ» اينالاسىنداعى باسشى-قوسشىلار قازاق فۋتبولىنا "اتاسىندا كورمەگەندى بوتاسىندا كورسەتتىك" دەگەنگە كەلتىرىپ، بۇل وقيعانىڭ تاريحي جەتىستىك ەكەنىنە سەندىرگىسى كەلدى.

«مانچەستەر يۋنايتەدتىڭ» ەۋروپاداعى ەڭ بەدەلدى كوماندالاردىڭ ءبىرى ەكەنىنە داۋىمىز جوق. «قىزىل سويقاندار» دەپ اتالاتىن بۇل كوماندانىڭ جانكۇيەرلەرى الەمنىڭ ءار تۇكپىرىنەن تابىلادى. الايدا، سوڭعى جىلدارى «سويقانداردىڭ» ساعى سىنعان. ءوز ەلىنىڭ ۇزدىگى اتانۋدان ءۇمىتى ۇزىلگەلى بەس-التى جىل بولدى. سوعان قاراماستان ميۋ ءبىزدىڭ «استانانىڭ» قاسىندا الىپتىڭ الىبى ەكەنى ءسوزسىز.

سونىمەن «ولد ترا́ففوردتاعى» ويىن ءوتتى. «مانچەستەر يۋنايتەد» جاسىل الاڭعا ءبىر عانا نەگىزگى قۇرام ويىنشىسىن شىعاردى. شابۋىلدا تاحيت چونگ، مەيسون گرينۆۋد سەكىلدى جاس بالالارعا باس-كوز بولۋ ءۇشىن ماركۋس رەشفورد الاڭعا شىقتى. قالعان فۋتبولشىلاردىڭ ءبارى دە «قىزىل سويقانداردىڭ» نەگىزگى قۇرامىنان ورىن الا الماي، قوسالقى قۇرامدا وتىرعاندار.

ال «استانانىڭ» باس باپكەرى رومان گريگورچۋك بار مىقتىسىن الاڭعا شىعاردى. ءبىر وزگەرىس، تىرەۋشى جارتىلاي قورعاۋشى پوزيتسياسىنا يۋري لوگۆينەنكونىڭ ورنىنا حورۆاتيالىق لۋكا شيمۋنوۆيچ شىقتى. بىراق، بۇل اسا كورەگەن شەشىم بولا قويماعان سەكىلدى، ەكىنشى تايم باسىندا يۋري ءوز ورنىنا ورالدى.

وسى جەردە ايتا كەتەر ءبىر ماسەلە، «استانا» ساپىندا بۇل كەزدەسۋدى بىرىنشى مينۋتتان باستاعان 11 فۋتبولشىنىڭ تەك بىرەۋى عانا تازا قازاقستاندىق. سول قاپتالداعى قورعاۋشى ديمتري شومكودان باسقا ون ويىنشى شەتەلدەن كەلگەن شەبەرلەر. راس، قاقپاشى ەريچ پەن ورتالىق قورعاۋشى پوستنيكوۆتا قازاقستاننىڭ كوك پاسپورتى بار. بىراق، بۇنىڭ ءبىرىنشىسى سەربيادا تۋىپ-وسكەن، سوڭعىسى رەسەيدىڭ ەكىنشى سورتتى ويىنشىسى. ال قالعانى لەگيونەرلەر.

قۇرامىندا قازاق تۇگىلى قازاقستاندىق ويىنشى از ەلوردالىق كومانداعا ەلدە قالعان ميلليونداعان قازاق جانكۇيەرلىك ەتتى. قازاقستاننىڭ كومانداسىن قازاقتان باسقا كىم قولدايدى دەيسىز؟! ەلدەگى وزگە ۇلت وكىلدەرىنىڭ رەسەيلىك كوماندالارعا جانكۇيەر ەكەنى جاسىرىن ەمەس، ولار ءۇشىن «استانانىڭ» جەڭىسىنەن «زەنيتتىڭ» جەڭىلىسى الدەقايدا ارتىق.

ال الاڭداعى ويىن جايلى ايتۋدىڭ ءوزى ارتىق. ەگەر قازاقستاندىق كوماندا قاتىسىپ جاتىر دەمەسەڭىز، ءتۇن ۇيقىڭىزدى ءبولىپ مىناداي ويىندى تاماشالاۋدىڭ قاجەتى شامالى. 11 ويىنشىمەن ءوز قاقپامىزدىڭ الدىنا جاتىپ الىپ قورعانعان «استانا» انگليالىق جانكۇيەرلەردىڭ كۇلكىسىن كەلتىرگەن بولۋ كەرەك. 90 مينۋت بويى قارسىلاس قاقپاسىنا بىردە-ءبىر تۋرا سوققى باعىتتاي الماساق تا، ءوز قاقپامىزعا ءبىر گول عانا وتكىزگەنىمىزبەن ماقتانامىز ەندى...

بۇنداي ماتچتاردى وزگە ەلدىڭ كوماندالارى ءتيىمدى پايدالانا بىلەدى. جەڭىلسە دە بارىنشا جاقسى ونەر كورسەتىپ، ۇزدىك مامانداردىڭ كوزىنە ءتۇسىپ قالۋعا تىرىسادى. سول ماقساتتا كومانداداعى جاس ءارى تالانتتى ويىنشىلاردى الاڭعا شىعارىپ، ءوزىن كورسەتۋگە مۇمكىندىك بەرەدى. ال «استانا» 35, 37 جاستاعى سەربيالىق، رەسەيلىك ويىنشىلاردى الاڭعا شىعاردى. 90 مينۋت بويى قورعاندى، ەشقانداي شابۋىل جاسامادى، ونەر كورسەتتى دەۋگە مۇلدە كەلمەيدى. سونىڭ وزىندە جەڭىلىپ قالدى. تىم قۇرىعاندا ۇلتتىق قۇراما مۇشەسى يۋري پەرتسۋحتى ويناتۋ كەرەك ەدى. جاس ويىنشى تاجىريبە جينار ەدى، مۇمكىن مامانداردىڭ كوزىنە تۇسەر ەدى...

ەۋروپا ليگاسى. توپتىق كەزەڭ

ەۋروپا ليگاسى-2019/20. L توبى. 

«مانچەستەر يۋنايتەد» - «استانا» - 1:0(0:0)

گول: مەيسون گرينۆۋد 73

«مانچەستەر يۋنايتەد»: سەرحيو رومەرو، اكسەل تۋانزەبە، فيل دجونس، ماركوس روحو، ديەگو دالوت، ەندجەل گومەس، نەمانيا ماتيچ، فرەد، ماركۋس رەشفورد، تاحيت چونگ، مەيسون گرينۆۋد.

«استانا»: نەناد ەريچ (ك،ۆ), دميتري شومكو، جاركو توماشەۆيچ، ەۆگەني پوستنيكوۆ، انتونيو رۋكاۆينا، يۆان ماەۆسكي، لۋكا شيمۋنوۆيچ(يۋري لوگۆينەنكو 46), رۋنار مار سيگۋرونسسون، رومان مۋرتازاەۆ(رانگەلو يانگا 46), مارين توماسوۆ، دورين روتاريۋ.

«استانا» - ەلىمىزدەگى ەڭ "باي" كلۋب. «سامۇرىق-قازىنانىڭ» سان ميلليونىن سارىپ ەتىپ وتىرعان كوماندا قارجىدان قىسىلعان ەمەس. «استانانىڭ» بيىلعى جىلدىق بيۋدجەتى 10 ميللياد تەڭگە. بۇل مالىمەتتى كلۋبتىڭ باس ديرەكتورى ميحايل گۋرمان ءوزى ايتقان.

جاقىندا عانا حالىقتىڭ ەسەبىنەن كۇن كورىپ وتىرعان وسى كلۋبقا قاتىستى كەلەڭسىز جايدى ءسوز ەتكەن ەدىك. وندا كەشەگى قارسىلاسى «مانچەستەر يۋنايتەدتى» ءوز الاڭىندا قابىلدايتىن ويىننىڭ بيلەت باعاسى تىم قىمبات ەكەنىن ايتتىق. «استانا» - «مانچەستەر يۋنايتەد» ويىنىندا ەڭ قىمبات بيلەت 55 مىڭ تەڭگە ەكەن.

«مانچەستەر يۋنايتەدكە» قارسى ويىن:

1-ءشى كاتەگورياداعى ورىنداردىڭ بيلەت باعاسى - 55 000 (ەلۋ بەس مىڭ) تەڭگە;
2-ءشى كاتەگورياداعى بيلەتتەر - 40 000 (قىرىق مىڭ) تەڭگە;
3-ءشى كاتەگورياداعى بيلەتتەر - 25 000 (جيىرما بەس مىڭ) تەڭگە;
4-ءشى كاتەگورياداعى بيلەتتەر - 16000 (ون التى مىڭ) تەڭگە;
5-ءشى كاتەگورياداعى بيلەتتەر - 11,000 (ون ءبىر مىڭ) تەڭگە;
6-ءشى كاتەگورياداعى بيلەتتەر - 4000 ء(تورت مىڭ) تەڭگە.

قازاقستان چەمپيوناتى اياسىنداعى ويىنداردا «استانا ارەنادا» بيلەت باعاسى 200-500 تەڭگەدەن. ال ەۋروپا ليگاسىندا باعا 100 ەسە قىمباتتاپ وتىرعانىن اقپارات قۇرالدارى جارىسا جازعانىمەن، كلۋب باسشىلارى بۇعان جاۋاپ بەرە قويعان جوق...

قۋانىش قاپپاس

Abai.kz

4 پىكىر