بەيسەنبى, 27 اقپان 2020
1136 0 پىكىر 27 تامىز, 2019 ساعات 12:29

«مۇعالىم مارتەبەسى» تۋرالى زاڭ قاشان قابىلدانادى؟

پرەزيدەنت پارمەن بەرىپ، ەلباسى ەكىلەپ ايتقان «مۇعالىم مارتەبەسى» تۋرالى زاڭ قازىر قۇزىرلى ورگانداردىڭ قاراۋىندا ەكەن. ال زاڭنىڭ قاشان قابىلداناتىنى تۋرالى مينيستر اسحات ايماعامبەتوۆ ەگجەي-تەگجەيلى ايتىپ بەرىپتى.

«ەڭ باستىسى قازىر زاڭ جوباسىنىڭ قابىلدانۋى. بۇل ازىرگە زاڭ جوباسى عانا. تولىق زاڭ ەمەس. وسىنىڭ باسىن اشىپ الايىق. ءبىز اۋەلى وسى زاڭ جوباسىن بيىلعى جىلدىڭ سوڭىنا دەيىن قابىلداتىپ الۋىمىز كەرەك. مەملەكەت باسشىسىنىڭ تاپسىرماسى سولاي»، دەيدى ۇكىمەت دالىزىندە تىلشىلەرمەن جولىققان مينيستر ايماعامبەتوۆ.

بۇعان قوسا، مينيستر مۇعالىمدەرگە قوسىمشا ۇستەمە اقى مەن مەن جالاقىنى كوبەيتۋ ماسەلەسىنە دە توقتالعان ەكەن. سونىمەن ءبىلىم ءمينيسترى بىلاي دەيدى:

«ەگەر دەپۋتاتتار ءبىز ۇسىنعان زاڭ جوباسىن ماقۇلداپ، ول جىل سوڭىنا دەيىن قابىلداناتىن بولسا، وندا سول زاڭ جوباسىنىڭ اياسىندا ءبىلىم جانە عىلىم مينيسترلىگىنىڭ، ۇكىمەتتىڭ قاۋلىسى نەگىزىندە بىرنەشە نورماتيۆتىك-قۇقىقتىق اكتىلەردى ەنگىزۋگە مۇمكىندىك بولادى.

ال ەندى كەلەسى وقۋ جىلىنان باستاپ، داپتەر تەكسەرۋگە، سىنىپ جەتەكشىلىك جاسايتىندارعا، بىلىكتىلىگىن ارتتىرعان مۇعالىمدەرگە، ماگيستر دارەجەسىن العان مۇعالىمدەرگە قوسىمشا ۇستەم اقىلار تاعايىندالادى. ءبىزدىڭ بولجامىمىزشا، كەلەسى وقۋ جىلىنان باستاپ ءبىز تولىق دايىن بولامىز. بۇل جوسپارلار تولىقتاي جۇزەگە اسىرىلادى. سەبەبى، ول ءۇشىن بيۋدجەت قاراستىرىلعان. رەسپۋبليكالىق بيۋدجەت كوميسسياسىنىڭ وتىرىسى ءوتتى. مەملەكەت باسشىسى تىكەلەي تاپسىرما بەرگەن سوڭ، ءتيىستى قارجى سوماسى ەسەپتەلىپ بولىنەتىن بولدى»، دەيدى مينيستر.

Abai.kz

0 پىكىر