بۇگىن ءماجىلىستىڭ جالپى وتىرىسىنان كەيىن ىشكى ىستەر ءمينيسترى ەرلان تۇرعىمباەۆ تىلشىلەرگە جاڭاوزەندەگى جاعدايعا قاتىستى پىكىر ءبىلدىردى. 

-ءبىر توپ ادام قىتايدىڭ 55 كاسىپورنى سالىنادى ەكەن دەگەنگە سەنىپ، الاڭعا شىقتى. بۇگىنگى تاڭدا بۇل اقپارات جالعان ەكەنى انىقتالدى جانە ەشقانداي قىتايدىڭ كومپانياسى سالىنبايدى. ارينە، بىرلەسكەن كاسىپورىندار بار جانە قىتاي ينۆەستيتسياسى بار. بىراق الەۋمەتتىك جەلىلەردە جالعان اقپارات تارالىپ كەتتى. ونىڭ زاڭسىز ەكەنىن ايتقىم كەلەدى. ەگەر زاڭسىز ميتينگكە شاقىرۋشىلار بولسا، وندا ىشكى ىستەر ورگاندارى بۇل ىسكە ارالاسادى. ازىرگە قوعامدىق ءتارتىپتى بۇزۋعا قاتىستى ەشقانداي دەرەك تىركەلگەن جوق. بارى تىنىش»، - دەدى تۇرعىمباەۆ.

مينيستر جاڭاوزەندە وبلىس اكىمىنىڭ ازاماتتارمەن كەزدەسۋى ءوتىپ، حالىققا ءتۇسىندىرۋ جۇمىستارىن جۇرگىزگەنىن اتاپ ءوتتى.

ايتا كەتەيىك، 2 قىركۇيەكتەن بەرى ماڭعىستاۋ وبلىسىندا ورنالاسقان جاڭاوزەن قالاسىندا ميتينگ ءوتىپ جاتىر. حالىق  - قىتايدىڭ 55 كاسىپورنى سالىنباسىن دەگەن تالاپ قويىپ جاتىر.

Abai.kz