سەنبى, 25 قاڭتار 2020
502 0 پىكىر 27 تامىز, 2019 ساعات 17:03

قىزىلوردالىق داستان ايتباي ياندەكس كومپانياسىنان شاقىرتۋ الدى

قىزىلوردا قالاسىنىڭ تۇرعىنى، جاس ونەرتاپقىش داستان ايتباي رەسەيلىك ياندەكس كومپانياسىنان شاقىرتۋ الدى،-دەپ حابارلايدى قازاقپارات. 

داستان ايتباي كوپتەگەن يننوۆاتسيالىق جوبالار بويىنشا ەلگە تانىلىپ كەلەدى. ول بىلتىر يننوۆاتسيالىق  قۇلاققاپ جاساپ شىعاردى. قازىر ەكىنىڭ ءبىرى قۇلاققاپتى پايدالانادى. دەگەنمەن ول قاۋىپسىزدىكتى ساقتاۋ بارىسىندا كوپتەگەن قيىندىقتار تۋدىرادى. داستان قۇلاققاپتىڭ ىشىنە قاۋىپسىزدىك سيگنالىن ورناتقان. ماسەلەن، كولىك، جول-كولىك، جەدەل جاردەم قىزمەتتەرىنىڭ سيگنالى ەستىلگەندە قۇلاققاپتاعى اۋەن اۆتوماتتى تۇردە توقتايدى.

سونداي-اق، داستان ۆيرۋسقا قارسى قورعانىس رەتىندە قولدانىلاتىن ارنايى جوبانى ويلاپ تاپتى . وعان «كافكا» باعدارلاماسى دەگەن اتاۋ بەرىلگەن. ونى ۆيرۋسقا قارسى ۆيرۋس دەۋگە نەگىز بار. جوبا بويىنشا ول ۆيرۋستى ءوز قاقپانىنا تۇسىرەدى. وعان ءوزىنىڭ ۆيرۋستارىن جۇكتەپ جىبەرە الادى. ناتيجەسىندە جىبەرىلگەن ۆيرۋس قايتادان بۇرىنعى «ۇياسىنا» بارىپ، ارقالاپ كەلگەن جۇگى ارقىلى ءوزىن-ءوزى جويىپ جىبەرەدى.

«الداعى ۋاقىتتا ءوز ءبىلىمىمدى رەسەي استاناسى - ماسكەۋ قالاسىندا جەتىلدىرگىم كەلەدى. بۇل - ۇلكەن تاجىريبە الاڭى. مۇنداي ءىرى كومپانيامەن بىرگە جۇمىس جاساۋ وزىمە جاسالعان ۇلكەن مۇمكىندىك دەپ سانايمىن»، - دەدى داستان ايتباي.

Abai.kz

0 پىكىر