سەيسەنبى, 18 اقپان 2020
اقمىلتىق 1946 0 پىكىر 28 تامىز, 2019 ساعات 11:03

قورىقشى نۇرعاليەۆتىڭ ولىمىنە قاتىستى سوت باستالدى

27 تامىزدا قاراعاندىدا وبلىستىق اۋدانارالىق قىلمىستىق ىستەر سوتى قورىقشى ەرلان نۇرعاليەۆتىڭ ولىمىنە قاتىستى ءىستى قاراي باستادى. جاۋاپقا تارتىلىپ جاتقاندار – قىزىلوردا وبلىسىنىڭ جەتى تۇرعىنى.

32-53 جاس اراسىنداعى كۇدىكتىلەر «جوعالۋ قاۋپى تونگەن جانۋارلاردى زاڭسىز اتتى» دەپ ايىپتالعان. ۇشەۋى «جاساعان قىلمىستارىن جاسىرۋ ءۇشىن نۇرعاليەۆتى ءولتىردى جانە تاعى ءبىر قورىقشى پەتر نيتسىكتى ولتىرمەك بولدى» دەگەن ايىپ قوسا تاعىلعان.

كىسى ءولتىردى دەپ ايىپتالعان ۇشەۋ قاماۋدا وتىر. ال قالعان تورتەۋى كەپىلمەن بوساتىلعان. جەتى كۇدىكتى بۇرىن سوتتالماعان. كۇدىكتىلەر تەرگەۋ كەزىندە وزدەرىنە تاعىلعان ايىپتاردى مويىندامادى. «17 كيىكتى اتتى» دەگەن ايىپتى دا جوققا شىعارادى. ولار قاسقىرعا اڭشىلىق قۇرعاندارىن ايتادى.

بۇل ىستە ەرلان نۇرعاليەۆتىڭ اعاسى نۇرلان نۇرعاليەۆ پەن 53 جاستاعى قورىقشى پەتر نيتسىك – جابىرلەنۋشى. ولار سوتتا مورالدىق شىعىن تۋرالى ايتپادى، بىراق الدا بۇل جايتقا ورالاتىندارىن جەتكىزدى. جابىرلەنۋشىلەر ازاتتىق تىلشىسىنە ايىپتالۋشىلارعا ەڭ قاتاڭ جازا تالاپ ەتەتىندەرىن ايتتى.

نۇرلان نۇرعاليەۆتىڭ پايىمداۋىنشا، «زاڭسىز اڭشىلىق» ايىبىمەن سوتتالعان ءتورت ايىپتالۋشىنى «ادام ولتىرۋگە سەپتەستى» دەپ جاۋاپقا تارتۋ كەرەك.

العاشقى سوت وتىرىسىنا ايىپتالۋشىلاردىڭ جانە قورىقشىنىڭ تۋىستارى كەلدى. زالدا ورىن بولماي، سۋديا بەكزات شالعىمباەۆ ءبىراز ادامدى سىرتقا شىعاردى. سوت قازاق تىلىندە ءوتىپ جاتىر. وتىرىسقا اۋدارماشى دا كەلگەن.

بيىل 13 قاڭتاردا قورىقشى ەرلان نۇرعاليەۆ براكونەرلەر قولىنان مەرت بولعان. Toyota Land Cruiser كولىگىندەگى براكونەرلەر ەكى قورىقشى پەتر نيتسىك پەن ەرلان نۇرعاليەۆكە قارسىلىق تانىتىپ، شابۋىلداعان.

اۋىل شارۋاشىلىعى مينيسترلىگىنىڭ اقپاراتى بويىنشا، كولىكتەن تۇسكەن "شىمىر دەنەلى قارۋلى" ادامدار ينسپەكتورلاردى ۇرىپ، ءىز جاسىرعان. قاتتى جارالانعان ەكى ينسپەكتوردى كەيىن وزگە ارىپتەستەرى تاۋىپ العان. ەرلان نۇرعاليەۆتى 14 قاڭتاردا تۋىستارى استاناداعى №1 قالالىق ەمحاناعا جەتكىزگەن. ءبىر تاۋلىكتەن ارتىق ەس-ءتۇسسىز جاتقان نۇرعاليەۆ 15 قاڭتاردا قايتىس بولعان.نيتسىك جاراقاتتانىپ، اۋرۋحاناعا جاتىپ شىققان.

قورىقشىنىڭ ءولىمى قازاقستاندا شۋ تۋعىزدى. ايىپتاۋ اكتىسىنە ساي، براكونەرلەر 17 كيىكتى اتقان. ونىڭ شىعىنى – 45 ميلليون تەڭگە.

بيىل شىلدەدە "وحوتزووپرومنىڭ" تاعى ءبىر ينسپەكتورى 43 جاستاعى قانىش نۇرتازينوۆ براكونەرلەر قولىنان قازا تاپتى. ونىڭ سەرىگى سامات وسپانوۆقا دجەرزينسك قالاسىنداعى اۋرۋحانادا وپەراتسيا جاسالدى.

Abai.kz

0 پىكىر