جەكسەنبى, 15 قىركۇيەك 2019
دات 12802 47 پىكىر 22 تامىز, 2019 ساعات 11:44

ەلباسىنا جالعان اقپارات بەرگەن كىم؟

قازاقستان رەسپۋبليكاسى پرەزيدەنتى
اكىمشىلىگىنىڭ باسشىسى
ق.ە. كوشەرباەۆقا

قۇرمەتتى قىرىمبەك ەلەۋۇلى!

ەلباسىنىڭ 21 تامىزدا وتكەن "نۇر وتان" پارتياسىنىڭ ساياسي كەڭەسىنىڭ كەڭەيتىلگەن ماجىلىسىندە ايتقان «1 ميلليون [شەتەل قازاعىن] شاقىردىق. بۇلاي بىردە-ءبىر ەل جاسامادى. ولارعا بالالارىڭ ۇيلەنسىن، ءوسسىن دەسەك، [ورالماندار] ماعان بەر دەپ اقشا سۇرايدى...» دەگەن ءسوزى (اقپارات «ازاتتىق» راديوسىنىڭ سايتىنان الىندى) الەۋمەتتىك جەلىلەردە جۇرتتىڭ پىكىر-تالاسىن تۋدىردى. ءسوز يەسىنە اششى-اششى سىندار دا ايتىلىپ جاتىر.

ارينە، ەلباسى نۇرسۇلتان نازارباەۆ دايەكسىز سويلەمەيدى. قولىنا تۇسكەن مالىمەتتەرگە سۇيەنە وتىرىپ، پىكىر بىلدىرەدى، سوڭىنان نۇسقاۋ بەرەدى.

ماسەلە – «[ورالماندار] ماعان بەر دەپ اقشا سۇرايدى...» دەگەن سول اقپاراتتى پارتيا توراعاسىنا كىمنىڭ قانداي نەگىزگە سۇيەنە وتىرىپ بەرگەندىگىندە بولىپ وتىر. جۇرتقا تۇسىنىكتى بولۋ ءۇشىن الدىمەن وسى جاعىن انىقتاپ الۋىمىز كەرەك.

ورالمان – تاريحي وتانىندا تۇراقتى تۇرۋ ماقساتىندا قازاقستان رەسپۋبليكاسىنا كەلگەن جانە وسى زاڭدا بەلگىلەنگەن تارتىپپەن ءتيىستى مارتەبە العان، قازاقستان رەسپۋبليكاسى ەگەمەندىك العان كەزدە ونىڭ شەگىنەن تىس جەردە تۇراقتى تۇرعان ەتنيكالىق قازاق جانە ونىڭ قازاقستان رەسپۋبليكاسى ەگەمەندىك العاننان كەيىن ونىڭ شەگىنەن تىس جەردە تۋىلعان جانە تۇراقتى تۇرعان ۇلتى قازاق بالالارى.

قولدانىستاعى «حالىقتىڭ كوشى-قونى تۋرالى» قازاقستان رەسپۋبليكاسىنىڭ 2011 جىلعى 22 شىلدەدەگى №477-IV زاڭىنا ساي، جەرگىلىكتى اتقارۋشى ورگاندار قازاقستان رەسپۋبليكاسىنا ورالمانداردى قابىلداۋدىڭ وڭىرلىك كۆوتاسىنان تىس قونىس اۋدارعان ورالماندارعا جانە ولاردىڭ وتباسى مۇشەلەرىنە تۇراقتى تۇرعىلىقتى جەرىنە جول ءجۇرۋ جانە مۇلكىن تاسىمالداۋ شىعىندارىن وتەۋدى قامتيتىن بىرجولعى جاردەماقىلار بەلگىلەۋى مۇمكىن. جاردەماقىلاردى تولەۋدىڭ ءتارتىبى مەن شارتتارىن وبلىستاردىڭ، رەسپۋبليكالىق ماڭىزى بار قالالاردىڭ، استانانىڭ اكىمدىكتەرى حالىقتىڭ كوشى-قونى ماسەلەلەرى جونىندەگى ۋاكىلەتتى ورگان بەكىتەتىن ۇلگىلىك قاعيدالار نەگىزىندە بەكىتەدى.

قازىرگى تاڭدا بۇل كومەك قازاقستاننىڭ بارلىق وڭىرىنە كەلىپ جاتقان ورالماندارعا جاسالىپ جاتقان جوق. تەك، قازاقستان رەسپۋبليكاسى ۇكىمەتىنىڭ 2016 جىلعى 18 اقپانداعى №83 قاۋلىسىمەن ورالمانداردى قونىستاندىرۋ ءۇشىن ارنايى بەكىتىلگەن وڭىرلەرگە كوشىپ كەلگەن اعايىندارعا عانا بەرىلەدى.

ال، الىس-جاقىن شەتەلدەردەن كوشىپ كەلىپ، قازاقستان رەسپۋبليكاسىنىڭ ازاماتتىعىن العان قانداستارىمىزدىڭ ءجونى بولەك. ولار «ورالمان» بولىپ سانالمايدى. سەبەبى، «ورالمان» مارتەبەسi قازاقستان رەسپۋبليكاسىنىڭ ازاماتتىعىن العاننان كەيiن توقتاتىلادى.

مۇنداي ازاماتتاردى ەسكى اتاۋىمەن «ورالمان» دەپ بولمەي، قازاقستان رەسپۋبليكاسىنىڭ ازاماتى رەتىندە قاراۋىمىز كەرەك!

بەكەر وبالى نە، قانداستارىمىز بۇل كۇندە جوعاردا ايتىلعانداي  «حالىقتىڭ كوشى-قونى تۋرالى» زاڭىندا كورسەتىلگەن بۇل اقپاراتتان تۇگەلگە جۋىق حاباردار. سونداي-اق، ولاردىڭ ءوز كۇشىنە سۇيەنىپ ءومىر سۇرۋگە داعدىلانىپ ورالعانىن، ءوزىن ءوزى جۇمىسپەن قامتۋعا شەبەر ەكەنىن جەرگىلىكتى حالىق ۇلگى ەتىپ ايتادى.

كوشى-قون ساياساتىنىڭ باسى-قاسىندا كەلە جاتقان ازامات جانە «نۇر وتان» پارتياسىنىڭ حالىقپەن تىعىز ارالاسىپ جۇمىس ىستەپ جۇرگەن قىزمەتكەرى رەتىندە اشىق ايتا الام، سوڭعى جىلدارى «ورالمان» مارتەبەسىن العان قانداستارىمىزدىڭ  پارتياعا الەۋمەتتىك كومەك سۇراپ كەلۋى ازايعان. ءتىپتى، جوق دەپ ايتۋعا بولادى. ءبىز دە ءوز تاراپىمىزدان بۇل تاقىرىپتا كۇن قۇرعاتپاي جازىپ، جۇرتقا ءتىلىمىز تەسىلگەنشە ايتىپ كەلەمىز.

ولار كوبىنە قۇجاتتانۋ ماسەلەسىمەن كوبىرەك كەلەدى. سوڭعى ۋاقىتتا قىتايدان كەلگەن قانداستارىمىزدىڭ «ورالمان» مارتەبەسىنىڭ مەرزىمى ءوتىپ كەتۋىنە بايلانىستى ءبىراز شۋدىڭ بولعانى راس. تۇڭعىش پرەزيدەنت نۇرسۇلتان نازارباەۆ پرەزيدەنتتىك وكىلەتتىگىن توقتاتۋعا نەبارى ءتورت-بەس-كۇن قالعاندا ارنايى جارلىق شىعارىپ، «ورالمان» مارتەبەسىنىڭ مەرزىمىن 2019 جىلدىڭ 31 جەلتوقسانىنا دەيىن ءبىر مارتە ۇزارتىپ بەرۋ تۋرالى شەشىم قابىلدادى. ءسويتىپ، بۇل ماسەلەنى ءوزى شەشىپ بەرىپ كەتتى...

قۇرمەتتى قىرىمبەك ەلەۋۇلى!

كوشى-قون – ۇلت كوشباسشىسى نۇرسۇلتان نازارباەۆتىڭ ەل تاۋەلسىزدىگىن جاريالاۋدان بۇرىن جولعا قويعان تۇڭعىش ءھام ۇلى ساياساتى!

نۇرسۇلتان ءابىشۇلىنىڭ كەمەڭگەر تۇلعا، كورەگەن باسشى ەكەنىن تورتكۇل دۇنيەگە بىردەن تانىتقان دا – وسى الىستا جۇرگەن اعايىندى اتاجۇرتقا شاقىرۋ تۋرالى شىعارعان باتىل ءارى تاريحي شەشىمى!

ءبىز – شەتتەن ورالعان قازاقتار ەلباسى نۇرسۇلتان ءابىشۇلى نازارباەۆتىڭ وسىناۋ قامقورلىعى ءۇشىن ءدان ريزامىز جانە ول كىسىگە ماڭگى قارىزارمىز!

ايتپاقشى، 2010 جىلعى «قىزىلاعاش وقيعاسى» كەزىندە وبلىس اكىمىنىڭ وسى اۋىلعا شەتەلدەن كوشىپ كەلىپ قونىستانعان اعايىندى «وقشاۋلاپ» قويىپ، ەلباسىنا «سەندەردىڭ بۇل ەلگە ەڭبەكتەرىڭ سىڭگەن جوق!» دەگىزگەنى ەسىمىزدە.

2011 جىلعى جاز بويى جالعاسقان «جاڭاوزەن ەرەۋىلىن» تيمۋر قۇلىباەۆتىڭ ورالماندار ۇيىمداستىردى دەپ جاريالاعانىن جۇرت ءالى ۇمىتا قويعان جوق.

ءسويتىپ، وسى قارالاۋشىلاردىڭ كەسىرىنەن «حالىقتىڭ كوشى-قونى تۋرالى» زاڭى 2013 جىلى جەلتوقساندا قانداستارىمىزعا ءتورت جىلسىز ازاماتتىق بەرىلمەيتىن ەتىلىپ، قاتاڭداتىلىپ قابىلدانىپ تىنعان بولاتىن.

دەمەك، ەلباسى قازاق كوشىن قانشاما ارانداتۋشىلاردىڭ تار جول-تايعاق كەشۋىنەن امان الىپ ءوتىپ، ۇلى دالا ەلىنە ەكى ميللينعا جۋىق قانداسىن  جەتكىزدى...

قىسقاسى، بۇل جەردە ەلباسىنىڭ كىناسى جوق. اقپارات بەرۋشى نەمەسە ەلباسىنىڭ كوشى-قون ساياساتىنا قارسى بىرەۋلەر تاعى دا ارانداتىپ جىبەرگەن بولۋى مۇمكىن!

سىزدەن اتالعان ماسەلەگە بايلانىستى تەكسەرۋ جۇرگىزىپ، ەلباسىنا «ورالماندار ماعان بەر دەپ اقشا سۇرايدى...» دەپ اقپارات بەرگەن كىم ەكەنىن جانە بۇل اقپاراتتى ەلباسىنا قانداي نەگىزگە سۇيەنىپ ايتقانىن انىقتاۋدى سۇرايمىن.

ىزگى نيەتپەن،

اۋىت مۇقيبەك

Abai.kz

47 پىكىر