"قازىر عانا ماعان اراباەۆ ءىسى اياسىندا قىلمىستىق ءىس اشىلعانىن ءبىلدىم. مەن ەشقاشان سۋديالاردىڭ ىسىنە ارالاسپاعانىمدى، ساياساتتىڭ لاس ەكەنىن ءبىلىپ، وعان ارالاسپاۋعا تىرىسقانىمدى ايتقىم كەلەدى. مەن ەشقانداي سۋديانى تانىمايمىن دا", - دەدى اتامباەۆا.

باس پروكۋراتۋرا ازاتتىق راديوسىنا مالىمەتتى راستادى. ماتەريالدار قۇقىق بۇزۋشىلىقتىڭ بىرىڭعاي رەەسترىندە تىركەلگەن.

رايسا اتامباەۆانىڭ پىكىرىنشە، ونىڭ وتباسى مەن بۇرىنعى پرەزيدەنتتىڭ جاقتاستارىن "جاپپاي قۋدالاۋ" ءجۇرىپ جاتىر.

"المازبەك شارشەنوۆيچتىڭ ۇلكەن ۇلى - سەيىتبەك اتامباەۆتى اياۋسىز ساباپ كەتتى. گيپستە، بالتاقپەن جۇرگەن بالانى كۇندە تەرگەۋگە الىپ كەتەدى. اتامباەۆتىڭ نەمەرە باۋىرىنا ەكى قىلمىستىق ءىس قوزعالعان. ۇلكەن ۇلدىڭ قايىن اتاسىنىڭ ۇيىندە ءتىنتۋ جۇرگىزىلگەن، ميليتسيا ونىڭ ۇيىنە ەسكەرتۋسىز، رۇقساتسىز كىرىپ، دۇنيە-مۇلكىن قوپارىپ كەتكەن", - دەدى رايسا اتامباەۆا.

ول "الا-ارچا" مەملەكەتتىك رەزيدەنتسياداعى ۇيىنە كىرە الماي، زاتتارىن الا الماي جۇرگەنىنە شاعىمداندى. كوي-تاشتاعى ءۇيدى مورلەپ تاستاسا، دالادا قالۋى مۇمكىن ەكەنىن ايتتى.

ەلدىڭ بۇرىنعى ءبىرىنشى حانىمى پرەزيدەنت سوورونباي جەەنبەكوۆتەن ونىڭ وتباسىن قۋدالاۋدى دوعارۋىن سۇرادى.

ماناس اراباەۆ 2 ماۋسىمدا ۇستالدى، وعان "جەمقورلىق" ايىبىمەن قىلمىستىق ءىس قوزعالعان.

2 شىلدەدە "الا-توو 24" تەلەارناسىنىڭ ەفيرىنەن شەتەل ينۆەستورلارىنىڭ مۇلىكتەرىن باسىپ الۋعا رايسا اتامباەۆانىڭ دا قاتىسى بارى ايتىلعان باعدارلاما كورسەتىلدى. ماناس اراباەۆ قۇقىق قورعاۋ ورگاندارىنا وسىلاي دەپ كۋالىك بەرگەن.

5 شىلدەدە ماناس اراباەۆ ۇيقاماققا اۋىستىرىلدى.

Abai.kz