قىزىلوردالىق سپورتشىلار 2019 جىلدىڭ 6 ايىندا زور جەتىستىككە جەتىپ ۇلگەرگەن. الەم جانە ازيا چەمپيوناتتارىندا 48 مەدال سىر سپورتشىلارىنا ەنشىلەسە ،قر چەمپيوناتتارىندا بارلىعى 907 مەدالدى قانجىعاعا بايلاعان. ونىڭ ء272–ى التىن، 248-ءى كۇمىس، 387-ءى قولا جۇلدە،- دەپ حابارلايدى اباي-اقپارات.

سونىمەن قاتار سپورتپەن جۇيەلى تۇردە شۇعىلدانۋشىلار سانى 231613 ادامعا جەتكەن. ال بالالار-جاسوسپىرىمدەر سپورت مەكتەپتەرى، سپورت كلۋبتارىندا دەنە شىنىقتىرۋ جانە سپورتپەن شۇعىلداناتىن 7-18 جاس ارالىعىنداعى بالالار مەن جاسوسپىرىمدەر سانى 23058 قۇراپ وتىر. بۇل جونىندە وبلىستىق دەنە شىنىقتىرۋ جانە سپورت باسقارماسىنىڭ باسشىسى ولجاس اكيموۆ ايتتى.

– حالىقتىڭ سپورتتىق نىساندارعا قولجەتىمدىلىگىن ارتتىرۋ ماقساتىندا، بالالار مەن جاسوسپىرىمدەر سپورت مەكتەپتەرى جەلىسىن ۇلعايتۋ جانە شۇعىلدانۋشىلار سانىن ارتتىرۋ بارىسىندا مەملەكەتتىك-جەكەشەلىك ارىپتەستىك اياسىندا بيىل 21 جوبانى جۇزەگە اسىرۋ جوسپارلانىپ وتىر. بىلتىرعى جىلى 9 جوبا ىسكە قوسىلدى،- دەيدى ول.

سونداي-اق، باسقارما باسشىسى وبلىس سپورتشىلارىن 2020 جىلى توكيو قالاسىندا وتەتىن وليمپيادا ويىندارىنا جولداما الۋىن قامتاماسىز ەتۋ، الەم، ازيا جانە قازاقستان رەسپۋبليكاسىنىڭ چەمپيوناتتارىنا سپورتشىلاردىڭ دايىندىعى مەن قاتىسۋىن قامتاماسىز ەتۋ جۇمىستارى جۇرگىزىلىپ جاتقاندىعىن حابارلادى.

و.اكيموۆ وبلىس تۇرعىندارىن سپورت نىساندارمەن قامتۋ ماسەلەسىنە دە توقتالدى. ونىڭ ايتۋىنشا، الداعى ۋاقىتتا «لوكوموتيۆ» ستاديونىنا كۇردەلى جوندەۋ جۇمىستارى باستالىپ، «ءنۇرسات» تەننيس ورتالىعىنىڭ 4 جابىق تەننيس كوردىنىڭ قۇرىلىس جۇمىستارىن اياقتاۋ جۇمىستارى جالعاسپاق.

Abai.kz