بەيسەنبى, 19 قىركۇيەك 2019
532 1 پىكىر 13 تامىز, 2019 ساعات 11:19

ۇكىمەت ارىستى قالپىنا كەلتىرۋگە 56,1 ملرد تەڭگە جۇمسالاتىنىن ايتتى

قارۋ-جاراق قويماسىنداعى جارىلىستان زارداپ شەككەن ارىس قالاسىن قالپىنا كەلتىرۋ بيۋدجەتى – 56,1 ميلليارد تەڭگە. بۇل تۋرالى قازاقستان پرەمەر-ءمينيسترىنىڭ ءبىرىنشى ورىنباسارى – قارجى ءمينيسترى ءاليحان سمايلوۆ Tengrinews.kz سايتىنا ايتتى.

سمايلوۆتىڭ سوزىنشە، ارىستى جوندەۋگە ۇكىمەت قورىنان – 27,5 ملرد تەڭگە، جەرگىلىكتى بيۋدجەتتەن – 20 ملرد تەڭگە، «سامۇرىق-قازىنا» قورىنان – 6 ملرد تەڭگە بولىنگەن. بۇدان بولەك، دەمەۋشىلەر مەن قايىرىمدىلىق كومەكتەن 2,6 ملرد تەڭگە جينالعان.

بۇل قارجى ارىستىڭ ءار تۇرعىنىنا 100 مىڭ تەڭگە وتەماقىنى تولەۋگە، قالاداعى ۇيلەر مەن الەۋمەتتىك نىسانداردى جوندەۋگە، جاڭا ۇيلەر سالۋعا جۇمسالادى.

4 شىلدەدە مينيستر سمايلوۆ ارىستى قالپىنا كەلتىرۋگە 34,5 ميلليارد تەڭگە قاجەت دەگەن ەدى.

2019 جىلدىڭ 24 ماۋسىمىندا ارىس ماڭىنداعى قارۋ-جاراق قويماسىندا جارىلىس بولدى. جارىلىستان قالاداعى عيماراتتاردىڭ ءبىراز بولىگى قيراعان. سول كۇنى ارىس قالاسىنان 40 مىڭنان استام ادام جاقىن ماڭداعى ەلدىمەكەندەرگە قاشتى. جارىلىستان ءۇش ادام قازا تاپقان. ونىڭ ەكەۋى - اسكەري قىزمەتكەر، بىرەۋى - بەيبىت تۇرعىن. جۇزدەگەن ادام اۋرۋحاناعا تۇسكەن. سولاردىڭ ءبىرى 8 جاسار ايان ەربولۇلى 2 تامىزدا اۋرۋحانادا كوز جۇمدى. ارىستاعى جارىلىستان قاشىپ بارا جاتقان ونى كولىك قاققان.

ارىستاعى جارىلىستان قاشىپ شىمكەنتكە بارعان تۇرعىندار قارۋ قويماسىنا جاقىن ورنالاسقان قالاعا بارمايتىندارىن ايتىپ، بيلىكتەن باسقا جاققا كوشىرۋدى تالاپ ەتكەن. بىراق بيلىك ارىستىقتاردىڭ بۇل تالابىنا قۇلاق اسپاي، تۇرعىنداردى قالاعا قايتارعان. نۇر-سۇلتان ارىس قالاسىنىڭ ماڭىنداعى وق-ءدارى قويماسىن باسقا جاققا كوشىرۋگە ۋادە ەتكەن.

ۇكىمەت ارىستاعى جوندەۋ جۇمىستارى 1 تامىزعا دەيىن اياقتالادى دەگەنىمەن قالادا جۇمىس ءالى جالعاسىپ جاتىر. تۇرعىنداردىڭ كەيبىرى جوندەۋ جۇمىستارىنا كوڭىلى تولمايدى.

8 تامىزدا ارىسقا جوندەۋ جۇمىستارىنا بارعان نۇر-سۇلتان تۇرعىنى ەرمەك تۇتەبەكوۆ جول اپاتىنان قايتىس بولدى.

Abai.kz

1 پىكىر