كاسپي ەكونوميكالىق فورۋمىنا رەسەي، قازاقستان، ازەربايجان، يران، تۇركىمەنستاننىڭ بيزنەس پەن ۇكىمەت وكىلدەرىنەن بولەك، كاسپي ەلدەرىنە جاقىن ەلدەردەن دەلەگاتسيالار دا قاتىسادى دەپ جوسپارلانعان.

فورۋمدا نەگىزىنەن ەكونوميكا، كاسىپكەرلىك، ءىرى جوبالارعا جاعداي جاساۋ، ينۆەستيتسيا تارتۋ ماسەلەلەرى تالقىلانباق. قازاقستان جاعىنان ازىرگە وعان ناقتى كىم قاتىساتىنى بەلگىسىز.

بۇعان دەيىن فورۋم اياسىندا رەسەي پرەمەر-ءمينيسترى دميتري مەدۆەدەۆ پەن تۇركىمەنستان پرەزيدەنتى گۋربانگۋلى بەردىممۇحامەدوۆتىڭ كەزدەسەتىنى جايلى حابارلانعان. مەدۆەدەۆ فورۋمنىڭ پلەنارلىق وتىرىسىندا ءسوز سويلەپ، يننوۆاتسيالىق تەحنولوگيالار كورمەسىنە قاتىسادى.

ازاتتىقتىڭ تۇركىمەن قىزمەتىنىڭ حابارلاۋىنشا، قازىرگى كەزدە قاراپايىم ازاماتتار ءۇشىن تۋريستىك ايماق جابىلعان. اپتا ورتاسىنان بەرى تۋريستىك ورىندا دەمالىپ جاتقانداردى قوناق ۇيدەن شىعارا باستاعان.

تۇركىمەن قىزمەتى تىلشىلەرىنىڭ حابارلاۋىنشا، "اۆازاعا" جاقىن تۇركىمەنباشى قالاسى مەن ونىڭ ماڭىنداعى ەلدى مەكەندەردە قوزعالىس شەكتەلگەن. قازىرگى كەزدە "اۆازاعا" تۇركىمەنستاننىڭ بارلىق بيلىك وكىلدەرى كەلگەن. ولاردىڭ اراسىندا پرەزيدەنت بەردىمۇحاممەدوۆ پەن ۇكىمەت مۇشەلەرى دە بار.

تۇركىمەنستاننىڭ ەكراننان تۇسپەيتىن پرەزيدەنتى گۋربانگۋلى بەردىمۇحاممەدوۆ سوڭعى بىرنەشە اپتا بويى رەسمي جاڭالىقتان كورىنبەي قالىپ، ونىڭ ءولىمى جايلى، دەنساۋلىعىنىڭ سىر بەرگەنى تۋرالى ءتۇرلى سىبىستار تاراعان.

سىبىستاردى جويۋ ءۇشىن 4 تامىزدا ەلدىڭ مەملەكەتتىك تەلەارناسى پرەزيدەنتتىڭ دەمالىسىن قالاي وتكىزىپ جاتقانى تۋرالى جارتى ساعاتتىق تەلەحابار كورسەتتى. پرەزيدەنتتىڭ ءبىر ايعا سوزىلاتىن دەمالىس ۋاقىتى رەسمي تۇردە 15 تامىزدا اياقتالادى.

Abai.kz