كەشە الماتى قالاسى تۇركسىب اۋداندىق سوتى ساياساتكەر التىنبەك سارسەنباەۆتى ءولتىردى دەپ ايىپتالعان ۆيتالي ميروشنيكوۆتىڭ تۇرمە جازاسىن شارتتى جازاعا اۋىستىرۋ تۋرالى ءوتىنىشتى قاراستىردى.

Zona.kz سايتىنىڭ مالىمدەۋىنشە، قۇقىق قورعاۋشى مارجان اسپاندياروۆا مەن التىنبەك سارسەنباەۆتىڭ اعاسى رىسبەك سارسەنباي سۋديا جانات جىلقىباەۆانى سوتقا بەرۋ تۋرالى ءوتىنىش بەرگەن. الايدا ولاردىڭ ءوتىنىشى قابىلدانباپتى.

ال، ميروشنيكوۆ سوت وتىرىسىنا ۆيدەوروليك ارقىلى قاتىسقان. بىراق، م.اسپاندياروۆا ۆيدەونىڭ دىبىس ساپاسى ناشار بولعاندىقتان ونىڭ سوت زالىنا جەتكىزىلۋىن تالاپ ەتكەن.

ءوز كەزەگىندە ر.سارسەنباي اتالعان سوت وتىرىسى باستالۋعا ەكى ساعات قالعاندا عانا بىلگەنىنە نارازى بولدى. ال جابىرلەنۋشىلەردىڭ قالعان تۋىستارىنا بۇل تۋرالى مۇلدە حابارلانباعان.

ايتا كەتەيىك، 2006 جىلدىڭ 11 اقپانىندا 11 ساعات 40 مينۋتتا الماتى وبلىسى، تالعار اۋدانى “كوكتوبە” كەنتى مەن “12 بريگادا”  اۋىلدارىنىڭ اراسىندا ساياساتكەر التىنبەك سارسەنبايۇلى  مەن ونىڭ ەكى كومەكشىسىنىڭ مايىتتەرى تابىلدى.

اتالعان قىلمىسقا تاپسىرىس بەردى دەپ ايىپتالعان ەرجان وتەمباەۆ 20 جىلعا باس بوستاندىعىنان ايىرىلدى. ال، 2014 جىلى وتەمباەۆقا قاتىستى ۇكىم قايتا قارالىپ، جازا 13 جىلعا دەيىن ازايتىلدى. الايدا، 2018 جىلى ە.وتەمباەۆ قايتىس بولدى.

ال، كىسى ولىمىنە كىنالى دەپ تانىلعان رۋستام يبراگيموۆ ءولىم جازاسىنا كەسىلدى. الايدا، قازاقستاندا  ولىم جازاسىن قولدانۋعا موراتوري جاريالانعاندىقتان، يبراگيموۆقا كەسىلگەن ۇكىم ورىندالمادى.

سونىمەن قاتار، تاعى ءبىر  ايىپتى ميروشنيكوۆ 20 جىلعا سوتتالعان بولاتىن. بىراق، قازىر ونى مەرزىمىنەن  بۇرىن بوستاۋ تۋرالى ءوتىنىش قاراستىرىلىپ جاتىر.

ودان بولەك، اتالعان قىلمىستىق ءىس بويىنشا ۇقك «ارىستان» ارنايى جاساعىنىڭ جاۋىنگەرلەرى مەن باسقا ايىپتالۋشىلار ۇزاق مەرزىمگە سوتتالعانى ايتىلعان.

نۇربيكە بەكسۇلتانقىزى

Abai.kz