جۇما, 29 ناۋرىز 2024
بىلگەنگە مارجان 11028 2 پىكىر 18 شىلدە, 2019 ساعات 14:54

ابايدىڭ 175 جىلدىعىن اتاپ ءوتۋ تۋرالى مەملەكەتتىك كوميسسيا قانداي شەشىمگە كەلدى؟

بيىل مامىر ايىندا مەملەكەت باسشىسى قاسىم-جومارت كەمەلۇلى توقاەۆ قازاقتىڭ باس اقىنى اباي قۇنانبايۇلىنىڭ 175 جىلدىق مەرەيتويىن مەملەكەتتىك دەڭگەيدە اتاپ ءوتۋ تۋرالى زاڭعا قول قايعان ەدى. 

"2020 جىلى قازاق حالقىنىڭ ۇلى اقىنى، اعارتۋشىسى اباي قۇنانبايۇلىنىڭ 175 جىلدىق مەرەيتويىن جوعارى ۇيىمداستىرۋشىلىق جانە مازمۇندىق دەڭگەيدە مەرەكەلەۋدى قامتاماسىز ەتۋ ماقساتىندا 2019 جىلعى 1 شىلدەگە دەيىن 2020 جىلى قازاق حالقىنىڭ ۇلى اقىنى، اعارتۋشىسى اباي قۇنانبايۇلىنىڭ 175 جىلدىق مەرەيتويىن دايىنداۋ جانە وتكىزۋ جونىندەگى مەملەكەتتىك كوميسسيا قۇرىلسىن", دەپ جازىلعان پرەزيدەنت جارلىعىندا.

ال بۇگىن ەلوردادا اباي قۇنانبايۇلىنىڭ 175 جىلدىق مەرەيتويىن اتاپ ءوتۋ تۋرالى مەملەكەتتىك كوميسسيانىڭ العاشقى وتىرىسى ءوتتى.

حاكىم اتامىز، ۇلى ويشىل، رەفورماتور اباي قۇنانبايۇلىنىڭ 175 جىلدىق مەرەيتويىن اتاپ وتۋگە قاتىستى ءىس-شارالارعا دايىندىق باستالىپ كەتتى. توي قامىنا كىرىسكەن مەملەكەتتىك كوميسسيانىڭ العاشقى وتىرىسىن بۇگىن ۆيتسە-پرەمەر گۇلشارا ابدىحالىقوۆا جۇرگىزىپ، نەگىزگى باياندامانى مادەنيەت جانە سپورت ءمينيسترى اقتوتى رايىمقۇلوۆا جاسادى.

اتالعان جيىندا اباي قۇنانبايۇلىنىڭ 175 جىلدىعىن اتاپ ءوتۋدىڭ باستى جوسپارى ءھام اتقارىلاتىن شارالاردىڭ جوباسى قارالدى. ول بويىنشا حالىقارالىق، رەسپۋبليكالىق جانە وڭىرلىك دەڭگەيلەردەگى 500-گە جۋىق شارا قامتىلعان.

سونىڭ ىشىندە:

1. 2020 جىلى قاراشا ايىندا، پاريجدە ءوزىمىزدىڭ ابايتانۋشى عالىمدار مەن شەتەلدىك ادەبيەتشى-عالىمداردىڭ قاتىسۋىمەن اباي قۇنانبايۇلىنىڭ مەرەيتويىنا وراي عىلىمي-تاجىريبەلىك كونفەرەنتسيا وتەدى.

2. ابايدىڭ شىعارماشىلىق مۇرالارى كوپ تارالعان شەت تىلدەرىنە اۋدارىلىپ (بۇرىن سوڭدى تارجىمالانعانى بار ءبارى), ناسيحاتتالادى.

3. قۇنانباي وسكەنبايۇلىنىڭ ەل باسقارۋ ىسىندە ايتقان شەشەندىك سوزدەرى، جوسىنى، ابايدىڭ بالالارى مەن شاكىرتتەرىنىڭ ەڭبەكتەرى كىتاپ بولىپ جارىققا شىعادى.

4. تۇرسىن جۇرتبايدىڭ "قۇنانباي" اتتى زەرتتەۋ ەڭبەگى باسپادان جارىق كورمەك.

5. باق-تا، سونىڭ ىشىندە تەلەارنالاردى، عالامتوردا ابايعا ارنالعان باعدارلامالار مەن كونتەنتتەر كوبەيمەك.

6. "جيدەباي-ءبورىلى" قورىعىنا باراتىن جول كۇردەلى جوندەۋدەن ءوتىپ، مۋزەي ءۇيى زاماناۋي قۇرالدارمەن جاراقتالماق.

7. حالىقارالىق مادەني "اباي ءۇيى" شاڭاراق كوتەرمەك، ت.ب.

داۋرەن قۋات، مەملەكەتتىك كوميسسيانىڭ مۇشەسى، بەلگىلى جازۋشى، "قازاق ادەبيەتى" گازەتىنىڭ باس رەداكتورى:

- ءسوز كەزەگى تيگەندە مەن مىنا جايتتاردى ايتتىم: 1. ابايتانۋ عىلىمى مۇمكىندىگىنشە الەمدىك دەڭگەيدى قامتۋى كەرەك (بەرى دەگەندە تۇركى ەلدەرىنىڭ ادەبيەتشى-عالىمدارىن جۇمىلدىرىپ باستاساق تا ازىرگە ازدىق ەتپەيدى). ول ءۇشىن مەملەكەت تاراپىنان ارنايى قارجى ءبولىنىپ، ابايتانۋشى شەتەلدىك عالىمدار قازاقستاندىق گرانتتارعا يە بولۋى ءتيىس. ابايتانۋشى عالىمدار مەن ادەبيەتشى، ويشىلداردىڭ ەڭبەگى جىل سايىن جازۋشىلار وداعىندا قورتىندىلانىپ وتىرۋى قاجەت. (بۇل بايقاۋعا ابايعا ارنالعان ولەڭدەر، پروزالىق شىعارمالار دا ەنۋى مۇمكىن).

2. ابايعا ارنالعان اقىندار مۇشايراسىمەن بىرگە اباي ەڭبەكتەرىن جاڭاشا تالداپ، ساراپتايتىن عالىمدار مەن فيلوسوفتاردىڭ، ادەبيەتشىلەردىڭ، كاسىپكەرلەردىڭ، ساياساتكەرلەردىڭ، قاراپايىم وقىرمانداردىڭ اراسىندا دا جىل سايىن ءمۇشايرا ءوتىپ تۇرۋى كەرەك. سوندا ءبىز ابايدىڭ وقىرمانى عانا بولىپ وتىرا بەرمەيمىز، اباي الەمىنە ەنۋگە تالپىنامىز، ەسەيەمىز.

3. ابايتانۋدىڭ مەكتەپ پەن مەكتەپكە دەيىنگى مەكەمەلەرگە ارنالعان وقۋ ادىستەمەلىك نۇسقاسى جاسالىپ، ءبىلىم بەرۋ باعدارلاماسىنا ەنۋى كەرەك.
وعان قوسا، يسپان اقىنى حورحە پادرون مەن قازاقستان جازۋشىلار وداعى جانە "فوليانت" باسپاسى اراسىنداعى ءۇش جاقتى كەلىسىمگە (يسپان تىلىنە ءتارجىمالاۋ، باسۋ، تاراتۋ، ناسيحاتتاۋ) ۇكىمەت تاراپىنان قولداۋ بولسا، دەگەن تىلەگىمىزگە ۆيتسە-پرەمەر دە، مينيستر دە ريزاشىلىقپەن كەلىسىمدەرىن ءبىلدىردى. 

ءتۇيىن. "تويعا دايىندىق ءالى دە پىسىقتالادى، كوپشىلىكتىڭ اقىل-كەڭەسىنە، ۇسىنىسىنا، اسىرەسە، ابايتانۋشىلاردىڭ سوزىنە دەن قويامىز", - دەگەن مەمكوميسسيا بۇگىنگى جۇمىسىن قورتىندىلادى.

Abai.kz

2 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1575
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2268
عيبىرات

قايسار رۋحتى عازيز جان

مۇحتار قۇل-مۇحاممەد 3580