جۇما, 20 قىركۇيەك 2019
ساڭلاق 2476 9 پىكىر 19 شىلدە, 2019 ساعات 15:08

قازاعى كوپ «قايرات» پەن اقشاسى كوپ «استانا»

باۋىرجان يسلامحان

قازاقستاندىق كوماندالار فۋتبولدان ەۋروماۋسىمعا جاڭا جورىعىن باستادى. جىلداعىداي بيىل دا ءتورت كوماندامىز ەۋرودودادا باق سىنايدى. ەل چەمپيونى «استانا» چەمپيوندار ليگاسىنىڭ، ال «قايرات»، «ورداباسى» جانە «توبىل» ەۋروپا ليگاسىنىڭ ءبىرىنشى ىرىكتەۋ كەزەڭىندە ونەر كورسەتتى.

ەۋروپاعا جورىقتىڭ جاڭا سەرياسىن 9 شىلدە كۇنى «استانا» باستاپ بەردى. ەلورداداعى «استانا ارەنا» الاڭىندا رۋمىنيالىق «چفر كلۋج» كومانداسىن قابىلداپ، 1:0 ەسەبىمەن جەڭىسكە جەتتى.

الايدا، ۋكراينالىق مامان رومان گريگورچۋك باپتايتىن «استانا» كلۋج قالاسىندا وتكەن قارىمتا كەزدەسۋدە 3:1 ەسەبىمەن جەڭىلىپ، چەمپيوندار ليگاسىنان شىعىپ قالدى. ولار ەندى ەۋروپا ليگاسىنىڭ ەكىنشى تۋرىندا اندوررانىڭ «سانتا-كولوما» كومانداسىمەن كەزدەسەدى.

چفر  – «استانا» - 3:1. جالپى ەسەپ - 3:2.

ەل چەمپيوندارى سوڭعى بىرنەشە جىل بويى ەۋروكۋبوكتاردىڭ توپتىق كەزەڭىندە ونەر كورسەتىپ ءجۇر. كارى قۇرلىقتىڭ كانىگى باسەكەسىندە جىل سايىن باق سىناۋ وڭاي شارۋا ەمەس. الايدا «استاناعا» ەل بيۋدجەتىنەن بولىنەتىن قارجى وتە مول. سوندىقتان، «سامۇرىق-قازىنانىڭ» سان ميلليونىن سارىپ ەتىپ وتىرعان كومانداعا قويىلار تالاپ تا ۇلكەن بولماق.

بىراق، بيىل جولى بولمادى. چەمپيوندار ليگاسىمەن ءبىرىنشى تۋردىڭ وزىندە قوش ايتىسىپ وتىر. قارسىلاسى قاتتى ءالسىز كوماندا ەمەس. تransfermarkt سايتىنىڭ مالىمەتىنشە، كومانداداعى ويىنشىلاردىڭ ترانسفەر نارىعىنداعى جالپى باعاسى 23,4 ملن ەۋرو. ال «استانا» ويىنشىلارىنىڭ قۇنى 25,23 ملن. دەمەك، قاعاز جۇزىندە قازاقستاندىق كوماندا مىقتىراق دەگەن ءسوز. بىراق ءىس جۇزىندە رۋمىنيا ەلىنىڭ وكىلى ۇزدىك شىقتى.

بۇدان دا ماڭىزدىسى - «استانا» تەك ناتيجەگە كوڭىل ءبولىپ، ەل فۋتبولىنىڭ دامۋىن ۇمىت قالدىرعان سەكىلدى. قانشا جىلدان بەرى ەۋروپادا ءساتتى ونەر كورسەتىپ جۇرگەنىمەن، بىردە-ءبىر جەرگىلىكتى ويىنشىنى جەتىلدىرىپ شىعارا المادى. دەمەك، «استانانىڭ» ناتيجەسى تىكەلەي لەگيونەرلەرگە بايلانىستى.

«چفر كلۋج» كومانداسىنا قارسى قوس ويىندا «استانا» ساپىندا بار بولعانى بەس قازاقستاندىق ويىنشى عانا الاڭعا شىقتى. ونىڭ ەكەۋى "جاڭا قازاق" - سەربيالىق نەناد ەريچ پەن رەسەيلىك ەۆگەني پوستنيكوۆ. سوندا تازا قازاقستاندىق ۇشەۋ، قازاق فۋتبولشىسى بىرەۋ عانا.

ءبىرىنشى ويىن:  نەناد ەريچ (ك،ق), ابزال بەيسەبەكوۆ، ەۆگەني پوستنيكوۆ، لۋكا شيمۋنوۆيچ، انتونيو رۋكاۆينا، يۋري لوگۆينەنكو، يۆان ماەۆسكي، رۋنار مار سيگۋرونسسون، مارين توماسوۆ (رانگەلو يانگا), رومان مۇرتازەۆ (فيرمين مۋبەلە), دورين روتاريۋ.

ەكىنشى ويىن:  نەناد ەريچ (ك،ق), ابزال بەيسەبەكوۆ (مارين انيچيچ), ەۆگەني پوستنيكوۆ، لۋكا شيمۋنوۆيچ، انتونيو رۋكاۆينا، يۋري لوگۆينەنكو، يۆان ماەۆسكي، رۋنار مار سيگۋرونسسون (رانگەلو يانگا), مارين توماسوۆ (فيرمين مۋبەلە), رومان مۇرتازەۆ، دورين روتاريۋ.

«توبىل»

18 ماۋسىم كۇنى جەرەبە تارتىلعاندا قازاقستاندىق كوماندالاردىڭ ىشىندە «توبىلعا» ەڭ قولايلى قارسىلاس تۇسكەن بولاتىن. قوستانايلىق كوماندا ەۋروپا ليگاسى ىرىكتەۋ كەزەڭىنىڭ العاشقى تۋرىندا ليۋكسەمبۋرگتىڭ «جەنەسس» كومانداسىمەن جولى تۇيىسكەن. «جەنەسس» جارتىلاي اۋەسقوي كوماندا. ويىنشىلارىنىڭ كوبى وزگە كاسىپپەن اينالىسادى. وسىعان قاراپ، قوستانايلىقتاردىڭ جولى بولدى دەسكەنبىز.

الايدا ءبارى باسقاشا بولدى. «توبىل» سىرت الاڭدا 0:0 ەسەبىمەن تەڭ تارقاستى. ال 18 شىلدە «استانا ارەنادا» وتكەن ويىن 1:1 ەسەبىمەن اياقتالدى. ءسويتىپ، سىرت الاڭدا سوققان گولدىڭ ارقاسىندا «جەنەسس» كەلەسى كەزەڭگە ءوتتى.

«توبىل» - «جەنەسس ەش» (1:1). جالپى ەسەپ - 1:1.

ءسوزدىڭ اشىعىن ايتقاندا، «توبىلدىڭ» ساتسىزدىگىن ماسقارا دەپ باعالاۋ كەرەك. قوستانايلىق كوماندا مەملەكەتتىك بيۋدجەتتىڭ ماي شەلپەگىنە تويىپ وتىر دەۋگە بولادى. بارلىق جاعدايى جاسالعان. ميلليونداردىڭ بەتىنە قاراماي 9 بىردەي شەتەلدىك ويىنشىعا جالاقى تولەپ وتىر. فۋتبول سۇيەر اكىم ارحيمەد مۇحامبەتوۆتىڭ ارقاسىندا سۋ جاڭا جابىق مانەج دە سالىنعان.

جوعاردا ءبىز ايتقان تransfermarkt سايتىنىڭ مالىمەتىنشە، «توبىل» ويىنشىلارىنىڭ ترانسفەر نارىعىنداعى باعاسى 14,95 ملن. ال قارسىلاسى «جەنەسستىڭ» جالپى قۇنى 1,45 ملن ەۋرو. دەمەك، «توبىل» ويىنشىلارى قارسىلاسىنان تۋرا 10 ەسە قىمبات. سالىستىرۋ ءۇشىن ايتساق، «توبىلدىڭ» گرۋزيالىق ويىنشىسى نيكا كۆەكۆەسكيريدىڭ ءبىر ءوزى «جەنەسستىڭ» جالپى ويىنشىسىنان قىمبات. كۆەكۆەسكيري 1,5 ملن ەۋرو تۇرادى.

ويىننان كەيىن «جەنەسس» باپكەرى نيكوليا حايسماننىڭ قازاقستاندىق جۋرناليست ەرمۇحامەد ماۋلەنگە بەرگەن سۇحباتى:

  - ءسىزدىڭ كومانداڭىزدىڭ ءبىر جىلدىق بيۋدجەتى قانداي؟

- ءبىزدىڭ بيۋدجەتىمىز «توبىلدان» 6 ەسە كەم دەپ ويلايمىن. سەبەبى ءبىزدىڭ جىلدىق بيۋدجەتىمىز 500 مىڭ ەۋرو.

- كومانداڭىزداعى ويىنشىلار فۋتبولدان وزگە دە ماماندىقتاردىڭ يەسى شىعار. ولار باسقا جۇمىس ىستەي مە؟

- ءيا، ونىڭىزبەن كەلىسەمىن. ءبىزدىڭ كوماندا وسىدان 13 كۇن بۇرىن جينالىپ جاتتىعۋ جۇمىستارىن باستادى. ولاردىڭ كوبىسى كۇندىز ءوز جۇمىستارىندا جۇرەدى دە، كەشكە جاتتىعۋعا كەلەدى. سوندىقتان دا بىزدە «توبىلعا» قارسى دايىندالۋعى كوپ مۇمكىندىك بولمادى.

ەندى ەكىنشى ماسەلە، «استانا» سەكىلدى «توبىل» دا لەگيونەرلەر لەگىنە سەنىم ارتادى. 9 تازا شەتەلدىك ويىنشىعا ەكى "جاڭا قازاق" - ۆيكتور دميترەنكو مەن دميتري ميروشنيچەنكونى (ەكەۋى دە رەسەي) قوسساق، بۇل كوماندادا جالپى 11 شەتەلدىك ويىنشى دوپ تەبەدى («استانادا» دا 11 شەتەلدىك بار).

«جەنەسسكە» قارسى ەكى ويىندا الاڭعا شىقان ويىنشىلار ءتىزىمى:

ءبىرىنشى ويىن: ەميل بالاەۆ (ق) - نيكيتا بوچاروۆ، ۆيكتور دميترەنكو، فەرناندەر كاسساي، دجابا كانكاۆا، رۋسلان ۆاليۋللين - ارتۋراس جۋلپا، نيكا كۆەكۆەسكيري - ازات نۇرعاليەۆ (ك), ميحايل گوردەيچۋك (باۋىرجان تۇرىسبەك), سەنين سەباي (ماكسيم فەدين);

ەكىنشى ويىن: ەميل بالاەۆ (ق) - نيكيتا بوچاروۆ، ۆيكتور دميترەنكو، فەرناندەر كاسساي، دجابا كانكاۆا، دميتري ميروشنيچەنكو (رۋسلان ۆاليۋللين) - ارتۋراس جۋلپا، نيكا كۆەكۆەسكيري، ازات نۇرعاليەۆ (ك) (ميحايل گوردەيچۋك), باۋىرجان تۇرىسبەك (ماكسيم فەدين) - سەنين سەباي;

«توبىل» بۇل ەكى ويىندا جوعاردا جازعان ەكى "جاڭا قازاقتى" قوسپاعاندا 4 قازاقستاندىق ويىنشىنى الاڭعا شىعاردى. ونىڭ ەكەۋى عانا قازاق فۋتبولشىسى.

«قايرات»

الماتىلىق «قايرات» ءبىزدىڭ ەلدەگى بىردەن-ءبىر جەكە قوجايىنى بار كوماندا. مەملەكەتتىك بيۋدجەتتىڭ ماسىلى ەمەس. كەمەلدەنگەن اكادەمياسى بار. جاستاردى تاربيەلەپ، ءوزىنىڭ بازاسىنان فۋتبولشى شىعارۋدى كوزدەيدى. شەتەلدىك ويىنشىلاردى دا شاقىرادى، وعان قارجىسى دا جەتەدى. بىراق، وزگەلەردەن ارتىقشىلىعى قازاقستاندىق ويىنشىلارعا كوپ مۇمكىندىك بەرەدى.

«قايراتتىڭ» جولى العاشقى تۋردا بوسنيالىق «شيروكي بريەكپەن» ءتۇيىستى. بۇل كوماندا بىزگە ءبىرازدان بەرى تانىس. ءبىر كەزدەرى پاۆلودارلىق «ەرتىس» پەن شىمكەنتتىك «ورداباسىنى» جارىس جولىنان شىعارعان. تاعى دا تransfermarkt دەرەگىنە جۇگىنسەك، ويىنشىلارىنىڭ باعاسى 5,5 ملن ەۋرو. ال «قايرات» ويىنشىلارىنىڭ ترانسفەر نارىعىنداعى باعاسى 20,35 ملن. دەمەك، قاعاز جۇزىندە «قايرات» فاۆوريت.

الماتىلىقتار مىقتىلىعىن ءىس جۇزىندە دە دالەلدەدى. ەكى ويىندى دا 2:1 ەسەبىمەن اياقتاپ، كەلەسى كەزەڭگە ءوتتى. ەندى ەكىنشى اينالىمدا «حاپوەل» (بەەر-شەۆا، يزرايل) كومانداسىمەن كۇش سىناسادى.

«قايرات» – «شيروكي بريەگ» 2:1 (0:0)

العاشقى ماتچ – 2:1. جالپى ەسەپ - 4:2.

گول: باگاريچ 90 (پەنالتيدەن), ورازوۆ 90+1, قۋات 90+3 

«قايراتتىڭ» قازاقستاندىق ويىنشىلارعا كوپ سەنىم ارتاتىنىن ايتتىق. سول سوزىمىزگە دالەل رەتىندە بوسنيالىق كوماندامەن وتكەن ەكى ويىندا الاڭعا شىققان ويىنشىلاردى جازايىق.

ءبىرىنشى ويىن: پوكاتيلوۆ، احمەتوۆ، سۇيىمباەۆ، جۋكوۆ، يسلامحان (كەيلەر), ەسەولا، ابىكەن (قۋات), ۆجەسينسكي، دۋگاليچ، ميكانوۆيچ، ورازوۆ (كوسوۆيچ)

ەكىنشى ويىن: پوكاتيلوۆ (ق), احمەتوۆ، سۇيىمباەۆ، قۋات، جۋكوۆ، يسلامحان، (ك), سەيداحمەت (ۆجەسينسكي), ەسەولا (ەپپەل),  ابىكەن (ورازوۆ), دۋگاليچ، ميكانوۆيچ.

«قايرات» ءبىرىنشى ويىندا 7, ەكىنشى ويىندا 8 قازاقستاندىقتى نەگىزگى قۇرامدا الاڭعا شىعاردى. ەكى ويىندا ونەر كورسەتكەن 10 قازاقستاندىقتىڭ جەتەۋى قازاق فۋتبولشىسى. ونىڭ ۇستىنە، ەركەبۇلان سەيداحمەت 2000 جىلى، رامازان ورازوۆ 1998 جىلى، ايبول ابىكەن 1996 جىلى دۇنيەگە كەلگەن جاس ويىنشىلار.

«ورداباسى»

شىمكەنتتىكتەرىڭ دە جەرەبەدە جولى بولدى دەۋگە بولادى. گرۋزيالىق «تورپەدو» بيىل قارجىلىق قيىندىققا ۇشىراپ، ءتورت اياعىن تەڭ باسا الماي جۇرگەن كوماندا. ال «ورداباسىنىڭ» جاعدايى جامان ەمەس. بيىل چەمپيوناتتاعى ناتيجەلەرى دە جاقسى. ويىنشىلارىنىڭ ترانسفەر نارىعىنداعى باعاسى «تورپەدودان» 5 ەسە قىمبات. «ورداباسى» ويىنشىلارى 15,93 ملن ەۋرو بولسا، «تورپەدو» 3,35 ملن ەۋرو.

«ورداباسى» قارسىلاسىن سەنىمىد جەڭدى دەۋگە بولادى. الدىمەن ءوز الاڭىندا 1:0 ەسەبىمەن باسىم تۇسكەن شىمكەنتتىكتەر گرۋزيا جەرىندە 0:2 ەسەبىمەن جەڭىسكە جەتتى. قوس ويىننىڭ قورىتىندىسى 3:0. ەندى كەلەسى كەزەڭدە چەحيانىڭ «ملادو بولەسلاۆ» كومانداسىمەن كەزدەسەدى.

«تورپەدو» ك – «ورداباسى» 0:2 (0:0)

العاشقى ويىن – 0:1. جالپى ەسەپ - 3:0.

ءبىر وكىنىشتىسى، «ورداباسى» ساپىندا دا وتاندىق ويىنشىلار از. 7 تازا لەگيونەر جانە 4 "جاڭا قازاق" بار. «تورپەدوعا» قارسى ەكى ويىندا دا شەتەلدىك ويىنشىلارعا باسىمدىلىق بەرىلدى.

ءبىرىنشى ويىن: نەپوگودوۆ، مالانگۋ، ەرلانوۆ، مەحانوۆيچ (ششەتكين), تولەبەك (باديبانگا), جانعىلىشباي (بىستروۆ), دياكاتە، مالىي، دوسماعامبەتوۆ، فونتانەلو، جواو پاۋلو

ەكىنشى ويىن: نەپوگودوۆ (ق), مالىي، فونتانەللو (ك), ەرلانوۆ، بىستروۆ، دياكاتە، ماحلانگۋ، كوۆالچۋك (مەحانوۆيچ), دوسماعامبەتوۆ، پاۋلو ء(شامشى), ششەتكين (باديبانگا).

العاشقى ويىندا 6 قازاقستاندىق الاڭعا شىقتى دەگەنىمىزبەن، ونىڭ ەكەۋى (نەپوگودوۆ پەن مالىي) قازاقستان ازاماتتىعىن العان ۋكراينالىقتار. ال ەكىنشى ويىندا الاڭعا شىققان تازا قازاقستاندىقتار ۇشەۋ عانا - تەمىرلان ەرلانوۆ، تيمۋر دوسماعامبەتوۆ جانە الەكسەي ششەتكين.

سونىمەن، ءتورت كوماندامىزدىڭ بىرەۋى جارىس جولىنان شىعىپ قالدى. ال «استانا» دەڭگەيى ءبىر ساتى تومەن چەمپيونات ەۋروپا ليگاسىنا "قۇلادى". دەمەك، بيىلعى ەۋروماۋسىم ءبىز ءۇشىن ءساتتى باستالعان جوق. شىنىن ايتقاندا، ءبىزدىڭ ەلدە فۋتبول ءوز قۇنىن اقتايتىن سپورت ەمەس. مەملەكەتتىك بيۋدجەتتەن الادوپقا بولىنەتىن قارجى اسا مول. حالقى قوڭىرقالتا كۇن كەشەتىن قازاقستاندا فۋتبولشىلار ميلليونداپ جالاقى الادى.

شەتەلدىك ساراپشىلاردىڭ زەرتتەۋىنشە، قازاقستان پرەمەر ليگاسى فۋتبولشىلارعا جالاقى تولەۋدەن الەم بويىنشا 25-شى ورىندا تۇر. ەلىمىزدە دوپ تەبەتىن فۋتبولشىلار ورتا ەسەپپەن جىلىنا 148 513 دوللار (ايىنا 12 376 دوللار) تابىس تابادى. بۇل ورتاشا ەسەپ. بۇلاردىڭ اراسىندا اينا 50-100 مىڭ، جىلىنا 1 ملن دوللارعا دەيىن جالاقى الاتىندار بار. بۇنداي جوعارى جالاقى ارينە لەگيونەرلەرگە تولەنەدى. قۇرامىندا 11 شەتەلدىك ويىنشىدان بار «استانا» مەن «توبىل» مەملەكەتتىڭ قارجىسىن كەلىمسەكتەرگە ساناپ بەرىپ وتىر.

قاراپايىم حالىق اۋىزىنان جىرىپ بەرگەن اقشاعا سەمىرگەن فۋتبولشىلارىمىز وزگە ەلدىڭ اۋەسقوي كومانداسىنان جەڭىلگەنىن نامىس كورمەيدى. بولماسا وزدەرىن «توبىل» دەگەنگە ءتىلى كەلمەي «توبول» دەپ اتاپ جۇرگەن قوستانايلىقتار «جەنەسستەن» جەڭىلگەن سوڭ حالىق الدىندا ەسەپ بەرۋى كەرەك ەدى.

فۋتبول – وزگە ەلدەردە مەملەكەت قازىناسىنا ميلليونداعان قارجى قۇيىپ وتىرعان تابىس كوزى. ال بىزدە ەل بيۋجەتىنىڭ مايلى جىلىگىن مۇجىگەن ماسىل سپورت. فۋتبول كلۋبتارىنا مەملەكەت قارجىسىن اياماي ساناپ بەرۋ بار دا، سول قارجىعا ساي ناتيجە تالاپ ەتۋ جوق. ايتپەسە ەكونوميكالىق قۋاتى ورتا دەڭگەيلى قازاقستان فۋتبولشىلارعا جالاقى تولەۋدەن الەم بويىنشا 25-ءشى ورىندا تۇرماس ەدى.

قۋانىش قاپپاس

Abai.kz

9 پىكىر