جۇما, 18 قازان 2019
ماسقارا! 3190 28 پىكىر 28 ماۋسىم, 2019 ساعات 18:29

ەلباسى ءسوزىن "يت تارتقان تۋلاقشا" جۇلمالاعان كىم؟

ءبىزدىڭ ەلدە كەيبىر مەملەكەتتىك مەكەمەلەردىڭ مەملەكەتتىك ءتىلدى مويىنداعىسى كەلمەيتىنى وكىنىشتى. قازاق ءتىلىنىڭ قازاق ەلىندە وگەي كۇي كەشىپ ءجۇرۋىنىڭ باستى سەبەبى دە وسى.

پاۆلودار وبلىسى، جەلەزين اۋدانىنداعى «جەلەزين جالپى ءبىلىم بەرەتىن №1 ورتا مەكتەبى» مەملەكەتتىك تىلگە دەگەن قۇرمەتسىزدىكتىڭ ەلدە جوق «وزىق ۇلگىسىن» كورسەتىپ وتىر. تۇتاس سويلەمدى ءمان-ماعىناسى جوق قويىرتپاققا اينالدىرعان جەلەزيندىكتەردىڭ جانىندا بىرەر ارىپتەن نەمەسە سوزدەن جاڭىلعاندارمەن جىلاپ كورىسەتىن سەكىلدىمىز.

جەلەزيندىكتەر ناعىز جۇرەك جۇتقاندار ەكەن. باسقا-باسقا تۇڭعىش پرەزيدەنت نۇرسۇلتان نازارباەۆتىڭ ءسوزىن يت تارتقان تۋلاقشا جۇلمالاپتى. تاپ مىنا سويلەمنىڭ قاتە ەكەنىن قازاق تىلىنەن از عانا ساۋاتى بار ادام دا بايقار ەدى. سوندا بۇكىل ءبىر اۋداندا مەملەكەتتىك ءتىلدى بىلەتىن ءبىر ادام بولماعانى ما؟!

ءماتىندى قاراڭىز:

«وفيتسەر – بۇل تۇراقتى شاما اسكەرلەر، ورتالىق فيگۋرا، مي جولداس تا قورىعا اسكەرلەر، ۇيىمداستىرۋشى جەڭىستەر

ن.ءا.نازارباەۆ

7440 وفيتسەرلەردىڭ سوعىستارداعى جىلدا كەڭەس وداعىنىڭ قاھارمانىڭ اتاعى لايىقتاعان، 115 وفيتسەرلەردىڭ ولاردىڭ ولارى ەكى رەت»

اتالعان مەكتەپتىڭ العاشقى اسكەري دايىندىق كابينەتىنىڭ قابىرعاسىندا وسىنداي «كوركەم ءماتىن» كوزگە ۇرىپ تۇر. مىنا سويلەمنەن بىردەڭە ءتۇسىنۋ مۇلدە مۇمكىن ەمەس. ءتىپتى ەلەتروندى اۋدارماشىلاردىڭ ءوزى ءماتىندى مىناداي ءمانسىز ەتىپ اۋدارمايتىن شىعار. بۇل مەملەكەتتىك ءتىلدى مەنسىنبەۋ، قورلاۋ جانە بارىپ تۇرعان ماسقارا!

رەسەيمەن شەكارالاس جاتقان جەلەزين اۋدانىندا قازاقتاردىڭ ۇلەس سالماعى -  40,5 %. ال ورىستار - 46,15% ەكەن. اۋداندى قازىرگى تاڭدا قانات شايماردانۇلى قاشكيروۆ باسقارىپ وتىر. ءومىربايانىن شولىپ شىققان ەدىك، تەك پاۆلوداردا وقىپ، پاۆلوداردا قىزمەت ەتىپ كەلە جاتقان ازامات ەكەن. قول استىنداعى بىلدەي ءبىلىم بەرۋ وشاعى قازاق ءتىلىن ءدال بۇلاي قورلاعانىنا قاراعاندا، باسشىسىنىڭ ءوزى مەملەكەتتىك ءتىلدى مەڭگەرمەگەن بولۋى مۇمكىن.

سولتۇستىكتەگى كورشىمىزدىڭ سالقىنى قاتتى تيگەنىنەن بولار، ەلمىزدىڭ تۇستىك ايماعى مەملەكەتتىك تىلگە بەي-جاي قارايدى. ال ءبىز ءسوز ەتىپ وتىرعان مىنا جاعداي مۇلدە شەكتەن شىققاندىق. سول ءۇشىن دە اۋدان اكىمىنىڭ اتىن اتاپ، ءتۇسىن تۇستەپ وتىرمىز. مەملەكەتتىك تىلگە قۇرمەتسىزدىك تانىتقان جاۋاپتى ادامدارعا ءتيىستى شارا قولدانۋدى تالاپ ەتەمىز.

قۋانىش قاپپاس

Abai.kz

28 پىكىر