ەل-جۇرتقا ەسىم-سويى ەتەنە تانىس ەسترادا جۇلدىزدارى ارىسقا باردى.

اتاپ ايتساق، ارىستاعى شەتىن وقيعادان زارداپ شەككەن تۇرعىندار مەن اسكەريلەرگە كومەك كورسەتىپ، قولداۋ ءبىلدىرۋ ءۇشىن التىنبەك قورازباەۆ، مايرا ءىلياوسۆا، ساكەن مايعازيەۆ، نۇرلان البان، ءمولدىر اۋەلبەكوۆا باستاعان ونەر جۇلدىزدارى ارىس قالاسىنداعى مويىنتاس ەلدى-مەكەنىنە كەلدى.

بۇل اقپارات قر مادەنيەت جانە سپورت مينيسترلىگىنىڭ الەۋمەتتىك جەلىدەگى رەسمي پاراقشاسىندا جاريا بولدى.

سونىمەن قاتار، ەۆاكۋاتسيالانعان جەرگىلىكتى تۇرعىندار مەن اسكەريلەردىڭ دەمالىس ۋاقىتتارىندا وتاندىق فيلمدەردىڭ كورسەتىلىمى ۇيىمداستىرىلعان.

وسىعان دەيىن 25 ماۋسىم كۇنى  ارىس قالاسىندا زارداپ شەككەندەرگە كومەك كورسەتۋ جانە ءبىرىنشى قاجەتتىلىك زاتتارىن (كيىم-كەشەك، ازىق-تۇلىك، سۋ، ءدارى-دارمەك ت.ب.) جيناۋ ماقساتىندا الماتىداعى ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ جانە نۇر-سۇلتانداعى قر ۇلتتىق اكادەميالىق كىتاپحانا جانىنان ارنايى شتابتار قۇرىلعان.

ال 27 ماۋسىم كۇنى ارىس قالاسىنا "ارىس، ءبىز بىرگەمىز!" گۋمانيتارلىق كومەك كەرۋەنى جونەلتىلەدى.

ەستەرىڭىزگە سالا كەتەيىك، قر مادەنيەت جانە سپورت مينيسترلىگى جانە مينيسترلىككە قارايتىن ۇيىمداردىڭ قىزمەتكەرلەرى، "نۇر وتان" پارتياسىنىڭ "مادەنيەت" باستاۋىشش پارتيا ۇيىمىنىڭ مۇشەلەرى جەرگىلىكتى حالىققا كومەك كورسەتۋ قورىنىڭ ەسەبىنە ءبىر كۇندىك جالاقىلارىن اۋدارعان بولاتىن.

Abai.kz