ماۋسىم ايىنىڭ 28-ءى كۇنى، ساعات 15.00-دە  نۇر-سۇلتان قالاسى، قر ۇلتتىق اكادەميالىق كىتاپحاناسىندا قر ۇلتتىق مەملەكەتتىك كىتاپ پالاتاسى «Smart qalamger» جوباسىمەن تانىستىرادى. جوبا قر مادەنيەت جانە سپورت مينيسترلىگى ءتىل ساياساتى كوميتەتىنىڭ قولداۋىمەن جۇزەگە اسقالى وتىر.

مادەنيەت جانە سپورت ءمينيسترى اقتوتى رايىمقۇلوۆا جاڭا جوبانىڭ تۇساۋىن كەسەدى  دەپ كۇتىلۋدە. سونىمەن قاتار، جوبانىڭ  تانىستىرىلىمىنا مىرزاتاي جولداسبەكوۆ، تولەن ابدىك، انەس ساراي، نەسىپبەك ايتۇلى، تۇرسىن جۇرتباي، ديحان قامزابەكۇلى،وڭايگۇل تۇرجان،  قۋانىش جيەنباي سىندى قالامگەرلەر باستاعان ءوز جەكە ۆەب-سايتىنا يە بولعان 100-دەن استام جازۋشى  قاتىسادى. تۇساۋكەسەر ءراسىمىن بەلگىلى اقىن قالقامان سارين جۇرگىزەدى.

بۇدان بىلاي قولىنا قالام ۇستاعان ءاربىر قالامگەر ءوزىنىڭ جەكە ۆەب-سايتىن تەگىن اشا الادى. «تسيفرلى قازاقستان» باعدارلاماسى اياسىندا جۇزەگە اسىرىلاتىن بۇل جوبا «اقپاراتتىق-تەحنولوگيالىق ورتالىعى» قوعامدىق قورىمەن بىرلەسىپ قولعا الىنىپ وتىر. جوبانىڭ ماقساتى:

• قازاقستان جازۋشىلار وداعىنىڭ مۇشەسى بولىپ تابىلاتىن ءاربىر قالامگەرلەردىڭ تەگىن ۆەب-سايتتارىن جاساپ بەرۋ جانە ولارعا تەحنيكالىق قولداۋ كورسەتۋ;
• قازاقستاندىق قالامگەرلەردىڭ شىعارمالارىن ءبىر جەرگە جيناقتاپ، ولاردىڭ بىرتەكتى ەلەكتروندى بازاسىن قۇرۋ;
• قر ۇلتتىق مەملەكەتتىك كىتاپ پالاتاسىنىڭ ءباسپاسوز مۇراعاتىن پايدالانا وتىرىپ، قالامگەرلەردىڭ تولىق بيبليوگرافيالىق انىقتامالىعىن جاساۋ;
• ولاردىڭ وقىرمانمەن، شەت ەلدىك جازۋشىلارمەن بايلانىسىن دامىتۋ.

تۇساۋكەسەر راسىمىندە قر ۇلتتىق مەملەكەتتىك كىتاپ پالاتاسىنىڭ ديرەكتورى ءادىل قويتانوۆ  جازۋشىلارعا ارناپ جاسالعان ۆەب-سايتتارمەن ەلوردالىق قاۋىمدى تانىستىرىپ، ءارى قاراي جۇرگىزۋ ءۇشىن سايت يەلەرىنە تاپسىرادى.

جاھاندانۋ داۋىرىندە ەلىمىز باسەكەگە قابىلەتتى، دامىعان ەلدەر قاتارىندا بولۋى ءۇشىن «تسيفرلى قازاقستان» باعدارلاماسىنىڭ ماڭىزى زور ەكەنى بارشاعا ءمالىم. جازۋشىلارعا جاڭا زاماننىڭ، ۋاقىتتىڭ تالابىنا ساي بولۋعا مۇمكىندىك بەرەتىن «Smart qalamger» جوباسى بۇكىل رەسپۋبليكاداعى جازۋشىلار تاراپىنان ۇلكەن قولداۋعا يە بولىپ وتىر.

Abai.kz