قىزىلوردا وبلىسىندا كاسىپ باستاۋعا نيەتتى ازاماتتار سانى ارتقان. ولارعا «باستاۋ» جوباسى اياسىندا بيزنەستىڭ قىر-سىرىن ۇيرەنۋدە. بيىل قىزىلوردا وبلىسى بويىنشا 800 ازاماتتى اتالعان جوبا بويىنشا وقىتۋ كوزدەلىپ وتىر، - دەيدى اباي-اقپارات.

بۇگىنگى تاڭدا 555 ازامات وسى «باستاۋ» ارقىلى ءبىلىم السا، ونىڭ 44-ءى ءوز كاسىبىن باستاپ ۇلگەردى. ولاردىڭ 3-ەۋى «اۋىلشارۋاشىلىعىن قارجىلاي قولداۋ قورى» اق قىزىلوردا فيليالىنان 11,5 ملن تەڭگە نەسيە السا، 41-ءى «ەڭبەك» باعدارلاماسى شەڭبەرىندە وتكەن گرانتتىڭ جەڭىمپازى اتاندى. 41 جوباعا بەرىلگەن گرانت كولەمى 10,4 ملن تەڭگە تۇرادى.

قىزىلوردا قالاسىنا ىرگەلەس ورنالاسقان بىرقازان اۋىلىنىڭ تۇرعىنى ۇلجالعاس پەرنەەۆا مەملەكەت تاراپىنان بەرىلىپ جاتقان جەڭىلدەتىلگەن نەسيەنىڭ ارقاسىندا مال شارۋاشىلىقپەن اينالىسىپ جاتىر.

– «باستاۋ» جوباسىنىڭ 2018 جىلعى تۇلەگىمىن. ءبىر اي وقىپ، بىلىكتىلىگىمدى جەتىلدىرىپ، بيزنەس-جوسپارىمدى دايىندادىم. سونىمەن مال شارۋاشىلىعىمەن اينالىسۋ ءۇشىن «قىزىلوردا» وڭىرلىك ينۆەستيتسيالىق ورتالىعىنان 3 ملن تەڭگە نەسيە الىپ، 10 باس سيىر الدىق. قازىر تولدەپ، مال باسى كوبەيىپ جاتىر. ءسۇتىن، قاتىعىن ساتىپ، قۇرتىن، مايىن الىپ، تىرلىك قىلىپ جاتىرمىز»، - دەيدى ۇلجالعاس پەرنەەۆا.

قازىرگى كۇنى «باستاۋ» جوباسى ارقىلى ءبىلىم العان وبلىس تۇرعىندارى ءوڭىردىڭ تۇكپىر-تۇكپىرىندە سەرۆيستىك قىزمەت كورسەتۋ، مال شارۋاشىلىعى، ت.ب. سالالار بويىنشا جۇمىس ىستەپ جاتىر.

Abai.kz