مەملەكەتتىك-جەكەمەنشىك ارىپتەستىك اياسىندا 500 ورىندىق كوپبەيىندى وبلىستىق اۋرۋحانا جانە قازالى اۋدانىنداعى ورتالىق اۋداندىق ەمحانا، قىزىلوردادا قان ورتالىعى سالىنادى. بۇل جوبالار 2022 جىلعا دەيىنگى وبلىستىڭ الەۋمەتتىك-ەكونوميكالىق دامۋىنىڭ كەشەندى جوسپارىنا ەنگىزىلگەن.

بۇگىن ۇكىمەت وتىرىسىندا قىزىلوردا وبلىسىنىڭ اكىمى قىرىمبەك كوشەرباەۆ وبلىستىڭ 2022 جىلعا دەيىنگى كەشەندى دامۋ جوسپارىن تانىستىردى. جوسپار 12 باعىت، 119 ءىس-شارادان تۇرادى.

وبلىستىڭ كەشەندى دامۋ جوسپارى شەڭبەرىندە الەۋمەتتىك سالادا 15 جوبانى ىسكە اسىرۋ جوسپارلانۋدا.

"دەنساۋلىق ساقتاۋ سالاسىندا مەملەكەتتىك-جەكەمەنشىك ارىپتەستىك اياسىندا 500 توسەكتىك كوپبەيىندى وبلىستىق اۋرۋحانا جانە 5,7 ملرد. تەڭگەگە قازالى اۋدانىندا ورتالىق اۋداندىق ەمحاناسى مەن قىزىلوردا قالاسىندا قان ورتالىعى سالىنادى ", - دەدى وبلىس اكىمى.

سونىمەن قاتار، وبلىستىڭ ەلدىمەكەندەرىندە (جوسالى، اقاي، جالاعاش، شيەلى، تاسبوگەت) 5 دەنە شىنىقتىرۋ-ساۋىقتىرۋ كەشەنىنىڭ قۇرىلىسى جوسپارلانۋدا.

ەسكە سالايىق، اعىمداعى جىلدىڭ اقپان ايىندا قازاقستان رەسپۋبليكاسى قاۋىپسىزدىك كەڭەسىنىڭ وتىرىسىندا ءوڭىر تۇرعىندارىنىڭ الەۋمەتتىك-ەكونوميكالىق جاعدايىن جاقسارتۋ جانە دامۋ قارقىنىن ارتتىرۋ ماقساتىندا وبلىستىڭ وزەكتى ماسەلەلەرى قارالدى. قاۋىپسىزدىك كەڭەسىنىڭ وتىرىسىندا كەڭەس توراعاسى-ەلباسى ن.ءا.نازارباەۆ 2022 جىلعا دەيىن وبلىستى دامىتۋدىڭ كەشەندى جوسپارىن ازىرلەۋدى تاپسىرعان ەدى.

ءوڭىردى دامىتۋدىڭ كەشەندى جوسپارى قۇنى 219,7 ملرد.تەڭگە بولاتىن 119 ءىس-شارادان تۇرادى.  كەشەندى جوسپار 12 باعىتتى قامتيدى.ولار - ونەركاسىپ، اگروونەركاسىپتىك كەشەن، كاسىپكەرلىكتى دامىتۋ، كولىك ينفراقۇرىلىمى، تۇرعىن ءۇي كوممۋنالدىق شارۋاشىلىعى، ەكولوگيا جانە تابيعاتتى پايدالانۋ، حالىقتى الەۋمەتتىك قورعاۋ، دەنساۋلىق ساقتاۋ، سپورت، سۋ تاسقىنىنا قارسى ءىس-شارالار، تۇرعىن ءۇي قۇرىلىسى جانە ينجەنەرلىك-كوممۋنيكاتسيالىق ينفراقۇرىلىمدى دامىتۋ.

Abai.kz