ەكى اپتا بۇرىن، 14 مامىردا قازاقستان قورعانىس ءمينيسترىنىڭ ورىنباسارى گەنەرال-لەيتەنانت ءمۇسلىم التىنباەۆ "قازاقستاننىڭ قورعانىس ۆەدومستۆوسى رەسەيدەگى باس اسكەري شىركەۋ قۇرىلىسىنا بەلگىلى ءبىر سومادا قارجى اۋداردى" دەگەن. ول "قازاقستان اتىنان ەكىنشى دۇنيەجۇزىلىك سوعىسقا قاتىسقانداردىى ەسىمدەرى رەسەيدەگى باس اسكەري شىركەۋدە ساقتالاتىنىن" ايتقان. التىنباەۆ شىركەۋ قۇرىلىسىنا نۇر-سۇلتاننىڭ قانشا قارجى اۋدارعانىن ايتپاعان.
قورعانىس مينيسترلىگىنىڭ ازاتتىققا ايتۋىنشا، رەسەيدەگى شىركەۋ قۇرىلىسىنا جىبەرىلگەن 1 ميلليون رۋبل دەمەۋشىلەردەن الىنعان. "دەمەۋشىلەر اتتارىن اتاماۋدى ءوتىندى. سەبەبى بۇل كومەك جارناما جاساۋ ءۇشىن ەمەس، باتىرلارعا ماڭگى ەسكەرتكىش ورناتۋ ءۇشىن كورسەتىلگەن" دەپ جازادى ۆەدومستۆو وكىلى.
مينيسترلىك جاۋابىندا قازاقستاننىڭ قورعانىس مينيسترلىگى ەكىنشى دۇنيەجۇزىلىك سوعىسقا قاتىسقان قازاقستاندىق ارداگەرلەرگە "تاعزىم ەتۋ ماقساتىندا ارحيۆ ماتەريالدارىن جيناپ جاتقانىن" ايتقان.
- وسىعان بايلانىستى قازاقستان رەسەي قورعانىس مينيسترلىگىنە ارداگەرلەردىڭ سۋرەتتەرىن، قىسقاشا بيوگرافيالىق مالىمەتتەرىن، سوعىستا قازا تاپقان ارداگەرلەردىڭ ەرلىكتەرى تۋرالى دەرەكتەردى جولدادى. بۇل ماتەريالدار "ەسكە الۋ جولى" گالەرەياسىن قۇرۋ كەزىندە پايدالانىلادى، - دەيدى ۆەدومستۆو.
رەسەي اسكەرىنىڭ باس شىركەۋى ەلدەگى ەڭ ءىرى ءدىني كەشەندەردىڭ ءبىرى بولادى دەپ جوسپارلانعان. ونى بيلىك ماسكەۋ ىرگەسىندەگى كۋبينكا قالاسىندا ەكىنشى دۇنيەجۇزىلىك سوعىستاعى جەڭىستىڭ 75 جىلدىعىنا وراي – 2020 جىلى سالىپ ءبىتۋى ءتيىس. رەسەي قورعانىس مينيسترلىگى شىركەۋدىڭ حالىقتىڭ قايىرىمدىلىققا دەپ بەرگەن قارجىسىنا سالىنىپ جاتقانىن ايتقان.
رەسمي ستاتيستيكا بويىنشا، 2019-2021 جىلدارعا بەكىتىلگەن بيۋدجەت بويىنشا، بيىل قازاقستان قورعانىس مينيسترلىگىنە 315,9 ميلليارد تەڭگە بولىنگەن. بۇل سوما 2021 جىلعا قاراي 296,41 ميلليارد تەڭگەگە ازايادى.
Abai.kz
