الماتىدا XVI ەۆرازيالىق مەديا فورۋم وتۋدە. ەكى كۇنگە ۇلاساتىن ايتۋلى شاراعا «استانا» حالىقارالىق قارجى ورتالىعى (احقو) باسقارۋشىسى قايرات كەلىمبەتوۆ تە قاتىستى. ول احقو الاڭىندا الداعى ۋاقىتتا جاھاندىق قارجىلىق مەديا حاب قۇرىلاتىنىن ءمالىم ەتتى. بۇل تۋرالى
abai.kz حابارلايدى.

احقو-نىڭ بۇگىنگى كۇنگە دەيىن جەتكەن جەتىستىكتەرىنە توقتالىپ وتكەن ول، وڭىرلىك قارجىلىق حابتىڭ ەلىمىزدەگى مەديا سالاسىن دامىتۋعا دا اتسالىساتىنىن اتاپ ءوتتى. ايتا كەتەرلىگى احقو بۇگىننىڭ وزىندە Bloomberg, CNN, Reuters سىندى الەمنىڭ بەدەلدى مەديا الپاۋىتتارىمەن جۇمىس جاسايدى.

«ءبىز اقپارات جانە قوعامدىق دامۋ مينيسترلىگىمەن بىرلەسىپ نۇر-سۇلتاندا جاھاندىق قارجىلىق مەديا حابتى قۇرۋ تۋرالى تۇجىرىمدامانى قاراستىرۋدامىز. احقو بۇگىندە ەۋروپا مەن قىتاي ەلىنىڭ ىسكەرلىك باق-ى جانە Bloomberg, CNN, Reuters سىندى كومپانيالارمەن تىعىز جۇمىس
جاساۋدا. ءبىز قازاقستان مەن ورتا ازيا ەلدەرىنە احقو ارقىلى ينۆەستيتسيا تارتۋ جۇمىسىنا جاھاندىق قارجىلىق مەديا حاب تا سۇبەلى ۇلەس قوسادى دەگەن سەنىمدەمىز. ولار احقو جايلى بارلىق جاڭالىقتى الەم ەلدەرىنە تانىستىرىپ وتىرادى»،-دەدى احقو باسقارۋشىسى قايرات كەلىمبەتوۆ.

بۇعان دەيىن احقو الاڭىندا الەمگە تانىمال «Bloomberg L.P.» ستۋدياسىنىڭ اشىلعانى بەلگىلى بولعان ەدى. الەمگە بەلگىلى الىپ تەلەارنا ستۋدياسىنىڭ احقو-دا اشىلۋى – تاڭسىق جاڭالىق ەمەس.
سەبەبى رەسمي تۇردە اشىلعانىنا ءبىر جىلدان استام ۋاقىت عانا وتكەن وڭىرلىك قارجىلىق حاب ەلگە ينۆەستيتسيا تارتىپ قانا قويماي، كوپتەگەن شەتەلدىك كومپانيالاردىڭ قازاقستانعا كەلىپ، جۇمىس جاساۋىنا سەبەپ بولدى. وعان دالەل، احقو-دا بۇگىننىڭ وزىندە 160 كومپانيانىڭ تىركەلۋى بولىپ
وتىر.

ەسكە سالساق، احقو 2019 جىلدىڭ ناۋرىزىندا الەمدىك قارجى ورتالىقتارى يندەكسىندە (Global Financial Centres Index) 37 ساتىعا كوتەرىلىپ، 102 ورىننىڭ 51 ورنىنا جايعاسقان بولاتىن. ال شىعىس ەۋروپا مەن ورتالىق ازيا ءوڭىرى بويىنشا ورتالىق ءبىرىنشى ورىندى يەلەندى. سونىمەن قاتار ورتالىق «يسلام قارجىسىنا ينستيتۋتسيونالدىق قولداۋ كورسەتكەنى ءۇشىن»، «يسلام قارجىسى
سالاسىندا ساياساتتى قۇرعانى ءۇشىن» جانە «ادام كاپيتالىن دامىتۋداعى باستامالارى ءۇشىن» يسلام قارجىسى سالاسىنداعى Global Islamic Finance Awards (GIFA) اتتى بەلدى جۇلدەنىڭ بىردەن ءۇش ماراپاتىنا يە بولدى.
بۇگىندە احقو الاڭىنا قازاقستان، اقش، ءباا، سينگاپۋر، قىتاي، ۇلىبريتانيا، گەرمانيا جانە فرانتسيا ەلدەرىنەن ءجۇز كومپانيا تىركەلىپ ۇلگەردى. ءبىر جىل ىشىندە سبەربانك، Master Card, Visa, Euroclear, ERG, SAP, «دامۋ» قورى سىندى ءىرى كومپانيالارمەن ىنتىماقتاستىق تۋرالى
مەموراندۋمعا قول قويىلدى. احقو وزىنە تىركەلگەن كومپانيالار سانىن 2020 جىلعا دەيىن 500-گە جەتكىزۋدى جوسپارلاپ وتىر.

نۇرا ماتاي

Abai.kz